“Bu adam ömrü boyu oğru, cinayətkar, saxtakar, xain, satqın, fərari kimi tanınıb. Serjikin oğurluğu haqqında Ermənistanda bilməyən yoxdur. Bu gün onunla əlbir olan “müharibə qəhrəmanları” artıq ya həbsdədir, ya cəhənnəmdədir. “Tuşonka” satan və artıq cəhənnəmdə yanan, Serjikin sağ əli olan “general” Ermənistan ordusunun və Serjikin əsl simasını göstərir. Müharibə zamanı “tuşonka” satan general hansı sözlərə layiqdir? Serjikin sağ əli olan, müharibə dövründə müdafiə naziri vəzifəsində çalışan hərbi cinayətkar bu yaxınlarda Ermənistanda həbs edildi, oğurluğa görə. Nasaz silahlar alırdı, pullarını da qoyurdu cibinə. Bu haqda bizdə kifayət qədər məlumatlar var, həm müharibədən əvvəl, həm müharibə zamanı hansı əməllərdən çıxırdılar. Ayaqları altında torpaq yanırdı, Azərbaycan Ordusu hər gün irəli gedirdi, Ermənistan müdafiə naziri kontraktlar imzalayıb, nasaz silahlar aldırıb, qiymət fərqini də cibinə qoyurdu. Onlar Serjikin yetirmələridir, onun kimi oğrulardır”.
Bu fikirləri Prezident İlham Əliyev Tərtər rayonunun Suqovuşan qəsəbəsində çıxışı zamanı Ermənistanın sabiq prezidenti Serjik Sarkisyan haqqında səsləndirib. Azərbaycan Prezidentinin Serjik Sarkisyanın oğru, cinayətkar olması haqqında dediklərini Ermənistanda da təsdiq edirlər. Belə ki, Ermənistanın Baş Prokurorluğuna Serjik Sarkisyanın dövlət başçısı olduğu dövrdə Almaniyanın Baden-Baden kurortuna etdiyi çoxsaylı səfərlər barədə məlumat təqdim olunub. “Azatutyun” radiosu bildirir ki, prokurorluq bu səfərlərin məqsədi və səfərlər üçün dövlət vəsaitlərinin mümkün israf olunmasını araşdıracaq. Bundan əvvəl “Məlumatlı vətəndaşlar birliyi” proqramının koordinatoru Daniel İonnisyan bildirmişdi ki, “Faktların yoxlanması platformasının” üçüncü prezidentin Baden-Baden səfərləri barədə təhqiqatının sənədlərini cinayət-hüquqi qiymətin verilməsi üçün hüquq-mühafizə orqanlarına təqdim edəcək. İonnisyan bildirir ki, ictimai birlik Serj Sarkisyanın hərəkətlərinin Cinayət Məcəlləsinin mənimsəmə, israfçılıq və vəzifə səlahiyyətlərini aşma maddələri üzrə araşdırılmasını istəyir. Baş Prokurorluqdan bildiriblər ki, bu barədə məlumat Xüsusi İstintaq Xidmətinə göndərilib və bu qurumda bu iş üzrə materiallar hazırlanır.
Bundan əvvəl Serj Sarkisyanın prezident olduğu 10 il ərzində Baden-Badenə 16 dəfə səfər etdiyi barədə iddialar səslənmişdi. “Fip.am” jurnalist təhqiqatı saytı məsələ ilə bağlı bildirib: “Ermənistanın keçmiş prezidenti Serjik Sarkisyan 10 illik prezidentliyi dövründə dəfələrlə dövlət hesabına və hökumət təyyarəsi ilə Almaniyanın məşhur Baden-Baden kurortuna səfər edib. Sarkisyan bu kurort şəhərində 10 ildə 16 dəfə olub”. Saytın yazdığına görə, bu səfərlərdən biri də 2016-cı ilin dördgünlük müharibəsindən dərhal sonra olub. Təhqiqatçıların iddiasında qeyd edilir ki, Sarkisyan həmin ilin 6-7 aprelində Almaniyaya rəsmi səfərindən də Baden-Badenə baş çəkmək üçün istifadə edib. Lakin bu təhqiqatın hesabatı dərc olunandan sonra Sarkisyanın vəkili Amram Makinyan Facebook səhifəsində iddia edib ki, keçmiş prezidentin Berlinə rəsmi səfərdən əvvəl Baden-Badenə getməsi barədə iddia tam dezinformasiyadır. Bununla belə, “fip.am” saytı yazır ki, uçuşlar barədə məlumatları mülki aviasiya komitəsi təqdim edib. Bu məlumatlarda Prezident Aparatının sorğusu ilə 2008-ci ilin 1 yanvarından 2018-ci ilin 1 yanvarınadək yerinə yetirilən uçuşların siyahısı var. Siyahıda Baden-Badenə uçuşların vaxtları göstərilib. Vəkil Makinyan iddia edib ki, mülki aviasiya komitəsindən verilmiş məlumatlar ya qərəz, ya da yanlışlıq ucbatından təhrif olunub. Makinyan adıçəkilən rəsmi səfərin proqramını dərc edib. “Azatutyun” isə yazır: “Maraqlıdır ki, Makinyan yalnız Almaniyaya 2016-cı il müharibəsindən sonra edilən rəsmi səfərə toxunur və adı çəkilən başqa reyslər barədə susur”. Ümumiyyətlə isə, Sarkisyanın prezidentliyi dövründə müxalifət dairələri onun tez-tez Baden-Badenə gedib orada kazinoya baş çəkdiyini iddia edirdilər. “Fip.am” saytının təhqiqatında iştirak etmiş jurnalist Anya Qriqoryanın sözlərinə görə, araşdırma elə bu iddialarla bağlı aparılıb. Jurnalist bildirib ki, Sarkisyanın Baden-Badenə səfərlərindən heç biri rəsmi olmayıb. Keçmiş prezident kurort şəhərinə adətən məzuniyyətləri vaxtı gedirmiş. Qriqoryan onu da vurğualayıb ki, Sarkisyan bəzi rəsmi səfərlərindən də Baden-Badendə olmaq üçün istifadə edib. Bir neçə həftə bundan əvvəl hakim “Vətəndaş müqaviləsi” partiyasından millət vəkili Xaçatur Sukiasyan iddia etmişdi ki, Serj Sarkisyan kazinoda 100 milyon dollardan çox pul uduzub və pulu borcu ödəmək üçün torbalarla daşıyırmışlar.
Bundan başqa, Sarkisyan iri məbləğdə pul mənimsəməkdə ittiham olunub. Belə ki, sabiq prezident 400 milyon dollar məbləğində dövlət vəsaitini mənimsəməkdə və həmin vəsaitin müxtəlif vasitələrlə xarici dövlətlərə yönəldilməsində ittiham olunur. Qeyd olunur ki, Sarkisyan mənimsədiyi pulların böyük qismini Avropadakı offşor zonalara və Rusiyaya köçürüb.
Samirə SƏFƏROVA
