Sosial şəbəkələrdə və digər internet platformalarında yayılan məlumatlara görə, İranın Azərbaycana qarşı davranışlarına, bu ölkədəki müxtəlif qüvvələrin apardığı yanlış siyasətə etiraz edən Güney Azərbaycan fəallarına qarşı bu ölkənin xüsusi xidmət orqanları tərəfindən təzyiqlər göstərilməyə başlayıb. Məlumatlarda qeyd edilir ki, onlar təqib edilir, izlənir və telefonlarına mütəmadi olaraq zənglər gəlir. Artıq molla rejiminin soydaşlarımıza qarşı amansız təzyiq və təqiblərin əhatəsini genişləndirdiyi, onların səsini kəsmək üçün hər vasitədən istifadə etdiyi deyilir.
“Güney azərbaycanlıları Azərbaycan Respublikasına rəğbət bəslədikləri üçün təqib edilirlər”
Siyasi şərhçi Azər Həsrət bizimlə söhbətində qeyd etdi ki, İran islam rejimi soydaşlarımıza qarşı uzun illərdir bu siyasəti davam etdirir, son zamanlar isə şiddətin təzyiqini bir qədər də artırıb. “Güney Azərbaycanda, bütövlükdə İranda güney azərbaycanlıların, türklərin rejim tərəfindən təqib ediləməsi yeni hadisə deyil. İran fars rejimi uzun illərdir, konkret olaraq 1979-cu ildən bəri nəinki türklərin, o cümlədən orada yaşayan bütün xalqların insan hüquqlarını ayaqlar alıtına atıb. Yəni orada səsini çıxaran hər kəsə qarşı şəriət adındn sui-istifadə edərək təqiblər tətbiq edilir. Güney azərbaycanlıları Azərbaycan Respublikasına rəğbət bəslədikləri üçün təbqib edilirlər. Onlar təbii ki, bizim soydaşlarımızdır, Azərbaycan dövləti bizim dövlətimizdir, amma bütövlükdə dünya azərbaycanlılarının dövlətidir. Dünyanın harasında olmasından asılı olmayaraq, bütün azərbaycanlılar dövlətimizə rəğbət bəsləyir, bu və ya digər mənada fayda verməyə çalışırlar. Güneydəki soydaşlarımız bu təəssübkeşliyi, rəğbəti göstərərkən, təəssüflər olsun ki, İran rejiminin, özəlliklə də teokratik rejimin təqiblərinə, basqılarına məruz qalırlar. Onların hazırda daha çox təqib edilməsi isə İran rəhbərliyinin yarıtmaz siyasətinə sadəcə olaraq obyektiv yanaşmalarından qaynaqlanır”.
A.Həsrət qeyd etdi ki, İranın həm dövlət rəsmiləri, həm də dini liderləri Azərbaycana qarşı xoşagəlməz fikirlər səsləndirib və buna da davam edirlər, eyni zamanda Azərbaycan ərazilərini uzun illər işğalda saxlayan Ermənistana qucaq açıb, onlarla iş birliyindədirlər. “Heç şübhəsiz, İran rejiminin bu davranışlarına Güney Azərbaycandakı soydaşlarımız biganə qala bilməzdi. Soydaşlarımız dinc şəkildə, qanunlar çərçivəsində öz mövqelərini ifadə edirlər, amma molla rejimi qanun anlamadığı üçün hazırda soydaşlarımıza qarşı təqibləri daha da gücləndirib. Amma bir şeyi unudurlar ki, bu təqibləri, təzyiqləri nə qədər sürətləndirsələr belə, Güney Azərbaycanda, bütövlükdə İranda yaşayan 40 milyon türk tez və ya gec öz hüquqlarını əldə edəcək. O zaman isə bu gün onları təqib edənlər çox böyük peşmançılıq keçirəcəklər”-deyə A.Həsrət vurğuladı.
İradə SARIYEVA
