Amerika Erməniləri Milli Komitəsi absurd formada ABŞ Dövlət Departamentini ABŞ-Ermənistan regional və ikitərəfli siyasətindəki sistemli uğursuzluqlarını araşdırmağa çağırıb.
Sözügedən məsələ ilə bağlı təşkilatın sədri Raffi Qambaryan Senatın Xarici Əlaqələr Komitəsinin sədri Robert Menendezə, Konqresin Nümayəndələr Palatasının Xarici Əlaqələr Komitəsinin rəhbəri Qreq Meeksə və Nümayəndələr Palatasının digər üzvlərinə yazdığı məktubda bildirib ki, Ermənistanın suveren əraziləri Azərbaycanın işğalı (!) altında qalmaqda davam edir. Təşkilat Türkiyənin pilotsuz uçuş aparatlarında ABŞ-da istehsal olunan hissələrin tapılmasından da narazıdır. Qambaryan ATƏT-in Minsk Qrupunun Qarabağla bağlı sülh danışıqlarında diplomatik uğursuzluqlarına xüsusi diqqət çəkərək bildirib ki, ABŞ-ın iştirakı ilə baş verən uğursuzluq Türkiyənin bölgəyə cəlb edilməsinə səbəb olub. Daha sonra ağlını itirən təşkilatın rəhbəri məktubunun sonunda “Ermənistan ərazisinin işğalına görə” Azərbaycan rəhbərlərinin məsuliyyətə cəlb edilməsini xahiş edib. Həmişə olduğu kimi, yenə də erməni lobbisi öz ampluasındadır. Yenə də günahkar axtarıb məsuliyyəti digər ölkələrin boynuna yıxmaq istəyirlər.
“Bunlar o dərəcədə xəstə təfəkkürə malikdilər ki, beynəlxalq hüququn bizim tərəfimizdə olduğunu həzm etmək istəmirlər”
Məsələyə münasibət bildirən AMİP sədri Arzuxan Əlizadənin sözlərinə görə, Birləşmiş Ştatlardakı erməni lobbisi bütün vasitələrlə çalışır ki, müharibədən sonra Qarabağda yaranmış yeni reallıqları dəyişsin: “Hər dəfə bir şey uydururlar. Gah Konqresin palatalarında Azərbaycanla bağlı qadağaların qəbul olunmasını gündəmə gətirirlər, gah da digər qərəzli xarakterli təşəbbüslərlə çıxış edirlər. İndi də müharibədə üzləşdikləri məğlubiyyətin səbəbini Dövlət Departamentində axtarırlar. Sual olunur, niyə erməni lobbisi 1994-cü ildə əldə olunan atəşkəsdən sonra ABŞ-ın proseslərdə iştirakı ilə bağlı təşəbbüslə çıxış etmirdi? Cavab aydındır. Ona görə ki, vəziyyət onların xeyrinə idi. Ərzilərimiz Ermənistanın işğalı altında idi və düşünürdülər ki, zaman ermənilərin xeyrinə işləyir. Bilavasitə ABŞ-ın köməyilə bir dəfə - 2001-ci ildə Azərbaycan və Ermənistan prezidentlərinin Ki Uelsdə görüşü keçirilib. Həmin görüşdə də nəticə əldə olunmayıb. Birləşmiş Ştatlar ATƏT-in Minsk Qrupunun həmsədri olsa da, ondan sonra proseslərdə passiv iştirak edib. Maraqlıdır ki, bütün bunlar erməni lobbisini əsla narahat etməyib. Necə ki Azərbaycan öz ərazi bütövlüyünü güc yolu ilə azad etdi, ondan sonra ABŞ-ın regionda aktiv rol oynaması bunların yadına düşdü. Erməni lobbisini yandırıb-yaxan odur ki, müharibə zamanı prezident Trampın timsalında hakim Respublikaçılar Partiyası bitərəf mövqedə dayandı. Onlar bunun belə olacağını güman etmirdilər. Bəlkə də Demokratlar Partiyası hakimiyyətdə olsaydı, situasiya fərqli olardı. Bunlar o dərəcədə xəstə təfəkkürə malikdirlər ki, beynəlxalq hüququn bizim tərəfimizdə olduğunu həzm etmək istəmirlər. Azərbaycan beynəlxalq hüquqa əsaslanaraq və BMT-nin 4 qətnaməsindən çıxış edərək öz ərazi bütövlüyünü bərpa edib. Bunun Dövlət Departamentinə nə aidiyyəti var? Erməni lobbisi hesab edir ki, gərək ABŞ bunların yerinə gəlib müharibədə iştirak edəydi”. Partiya sədri hesab edir ki, erməni lobbisinin Konqresdə öz imkanlarından istifadə edərək müxtəlif bədnam təşəbbüslərlə çıxış etməsi nəyisə dəyişə bilməyəcək. Vidadi ORDAHALLI
