Ermənistanda Paşinyanın Qarabağ müharibəsi ərəfəsində səsləndirdiyi “Şuşa bədbəxt və qaranlıq şəhər idi” sözləri ilə bağlı qalmaqal davam edir.
Məsələ ondadır ki, Ermənistan baş nazirinin bu sözlərini təkrarlaması ölkədə birmənalı qarşılanmayıb. Müxalif “Blognews” saytı məlum açıqlama ilə bağlı dərc etdiyi təhlil yazısında Paşinyanı tənqid edib. Yazıda bildirilir ki, Paşinyan hələ də Şuşanın əhəmiyyətini dərk etmir. Qeyd olunur ki, Şuşa kimdədirsə, regionun lideri odur: “Baş nazir Nikol Paşinyan parlamentdə ermənilərin Şuşaya ehtiyac duymadıqları ilə bağlı tezisini bir daha təsdiqlədi. Şuşada olan hər kəs bilir ki, bura qeyri-adi şəhərdir. Şuşa tanrı tərəfindən inşa edilmiş bir qaladır. Ona nəzarət etmək bütün Qarabağa nəzarət etmək deməkdir. Şuşa Cənubi Qafqazda hökmranlığın açarıdır. Şuşa kimdədirsə, Cənubi Qafqazın hökmranı odur. Ermənilər bu şəhərə nəzarət edəndə Qarabağ bizim, Zəngəzur təhlükəsiz idi. Biz bu bölgədə hakim hərbi-siyasi qüvvəyə çevrilmişdik. Şuşa əldən çıxandan sonra rollar dəyişdi. İndi hakim azərbaycanlılardır, biz isə təhdid altındayıq. Zəngəzuru itirməmək üçün Rusiya və İrana ehtiyacımız var. Ümidimiz yalnız onlaradır”.
Görünən odur ki, erməni işğalçıları Şuşanı itirdikdən sonra hələ də ciddi xof içindədirlər. Bir növ etiraf edirlər ki, Şuşanın əldən çıxması ilə Ermənistanın etibarlı təhlükəsizliyindən söhbət gedə bilməz.
“Bu, Ermənistanın dövlət olaraq öz sərhədlərini qoruya bilməməsindən irəli gələn bir narahatlıqdır”
Məsələyə münasibət bildirən hərbi ekspert Ramil Məmmədlinin fikrincə, ermənilərin Şuşa ilə bağlı belə xof içində olmaları təsadüfi deyil: “Əvvəla, Şuşa olduqca hərbi-strateji əhəmiyyətə malikdir. Çünki şəhər olduqca unikal bir coğrafi məkanda yerləşir. Şuşanın bizdə olması bir sıra hərbi və digər üstünlükləri özündə ehtiva edir. Şuşanın bizdə olması hərbi nöqteyi-nəzərdən imkan verir ki, Laçın dəhlizi ilə Xankəndi arasındakı yeganə əlaqə yolunu bağlayaq. Vəziyyət gərginləşəcəyi təqdirdə Xankəndini tez bir zamanda separatçı tör-töküntülərindən təmizləmək mümkün olacaq. Artıq bu zaman Ağdərə, Əsgəran, Xocalı və Xocavənd şəhərləri uğrunda döyüş aparmağa ehtiyac olmayacaq. Avtomatik olaraq həmin yaşayış məntəqələri bizim nəzarətimizə keçəcək. Bax, bu dərəcədə böyük hərbi-strateji əhəmiyyətə malikdir Şuşa. Laçın və Şuşanın bizdə olmasının ermənilərdə Zəngəzurla bağlı xof yaratmasına gəldikdə isə, bu, Ermənistanın dövlət olaraq öz sərhədlərini qoruya bilməməsindən irəli gələn bir narahatlıqdır. Çünki 30 ildir müstəqillik qazanıblar, amma Ermənistanın Gürcüstanla olan sərhədi xaric, digər ölkələrlə olan sərhədlərini Rusiya qoruyur. Belə bir bədbəxt durumdadırlar. Ona görə də ermənilər Ermənistanın var olmasının nicat yolunu Rusiya və İranda axtarırlar. Çünki tarixən ermənilər böyük dövlətlərin kölgəsinə sığınıblar. Ona görə də əvvəlki kimi yenə də hansısa dövlətə sığınmağa məhkumdurlar”.
Hərbi ekspert onu da qeyd etdi ki, mövcud reallıq Azərbaycanın üstünlüklərini diqtə edir.
Vidadi ORDAHALLI
