Qondarma rejimin rəhbəri Araik Arutunyana sui-qəsd olub.
Bu barədə voskanapat.info saytının əməkdaşı Karen Andriyan yazıb.
Erməni jurnalistin iddialarına görə, Arutunyana qarşı iki gün əvvəl səhər saat 11 radələrində Xankəndidə sui-qəsd olub. Məlumatda qeyd olunur ki, Arutunyan avtomobilindən düşərkən ona silahlı hücum olub. Nəticədə Araik yaralanıb. Xəbərdə bildirilir ki, sui-qəsdi həyata keçirənlər isə “Qayıdan qəhrəmanlar” adlı təşkilatın üzvləridir.
Hələlik Arutunyanın vəziyyəti ilə bağlı heç bir məlumat yoxdur. “Hücum edən şəxsin zərərsizləşdirildiyini şəhər sakinləri təsdiq edir”,- deyə Karen Andriyan bildirib.
Qondarma “prezidentə” edilən bu sui-qəsdin arxasında hansı maraqlar dura bilər? Burada yerli ermənilərin əli var, yoxsa xarici qüvvələrin?
“Bunu yalnız Ermənistandakı revançistlərə bağlı olan siyasi güclər edə bilər”
Təhlükəsizlik məsələləri üzrə ekspert Elşən Həsənov “Bakı-Xəbər” ə bildirdi ki, hələlik bu məlumatı Ermənistanın rəsmi dairələri və ya qondarma qurumun nümayəndələri təsdiqləmir: “Ancaq hesab edirəm ki, məlumat yanlış deyil. Çünki erməni mənbələri tərəfindən yayılıb və təkzib edilmir. Ola bilər ki, sui-qəsd baş tutmayıb. Qarşısı alınsa belə, bu çox maraqlı və təhlil olunası hadisədir. Burada bir neçə versiya nəzərdən keçirilə bilər. Bunda Ermənistanın və ya başqa xarici qüvvələrin əli var, yoxsa yerli ermənilərin? Ermənilər terrora meylli xalqdır. Hətta dövlət səviyyəsində belə terrorlar törədiblər. Qarabağla bağlı danışıqlarda irəliləyiş olan kimi, onlar parlamentdə sui-qəsd törətdilər. Bir neçə dövlət rəsmisini gülələdilər. Hesab edirəm ki, Araikə edilən sui-qəsdin də arxasında ermənilərə aid maraqlı siyasi qüvvələr durur. Xarici qüvvələrin bu məsələdə marağının olduğunu inandırıcı saymıram. Arikə sui-qəsd baş tutsaydı, onlar bundan nə qazana bilərdilər? Heç nə! Çünki Qarabağa bütün nəzarət bizim əlimizdədir. Sülhməramlıların nəzarətində olan hissədə isə Araikin ciddi rolu yoxdur. Faktiki olaraq, tam zərərsizləşmiş vəziyyətdədir. Yəni ermənilərin yaşadığı hissədə qarşıdurmanın olması heç bir xarici gücün marağında deyil. Bunu yalnız Ermənistandakı revançistlərə bağlı olan siyasi güclər edə bilər. Çünki son vaxtlar Araik yerli erməniləri Azərbaycan əsgərlərinə qarşı getməməyə çağırıb. Alban kilsəsinin damındakı əski parçası olan “bayrağı” endirməyə də o tapşırıq verdi. Ola bilər ki, son vaxtlar o, Ermənistandan gələn təlimatlar üzrə deyil, öz bildiyi kimi hərəkət edir. Biz bu incə detalları bilmirik. Ancaq ortada olan fakta görə deyə bilərik ki, bununla Qarabağdakı saxta rejimə ciddi xəbırdarlıq etmiş olublar. Azərbaycan addım-addım öz yurisdiksiyasını tam təmin etməyə doğru gedir. Yaxın zamanlarda Araiklərə ümumiyyətlə ehtiyac olmayacaq. Bunu ermənilər anladığı üçün, indidən tədbir görmək İstəyirlər ki, onun yerinə daha radikal adamı gətirsinlər. Araik də anlayır ki, Azərbaycanın bayrağı altına keçmədən oralarda yaşamaq çətin olacaq”.
Məhəmmədəli QƏRİBLİ
