İranın ali dini rəhbəri Əli Xamneyinin SEPAH-dakı nümayəndəsi Hüseyn Əliyi Türkiyə və Azərbaycanı təhdid edib.
İranın hərbi gücünün yüksək olduğunu iddia edən Hüseyn Əliyi deyib ki, İsrail ABŞ-ın bölgədəki məğlubiyyətindən sonra onun yerini doldurmaq üçün İranın şimal-qərb sərhədlərində yerləşmək arzusundadır: "İran buna imkan verməyəcək. Türkiyə və Azərbaycan bilməlidirlər ki, Qərb ölkələrinə inanıb onların bölgədə yerləşmələrinə şərait yaratsalar, Əfqanıstanın taleyini yaşayacaqlar”.
O, Azərbaycan və Türkiyə Zəngəzurda dəhliz açacaqları halda, İranın yalnız iqtisadi ziyan görəcəyini söyləyib: "Ancaq onlar bunun qarşılığında ağır və sarsıdıcı cavab alacaqlar”.
Hüseyn Əliyi düşmənlərin İranın şimal-qərb sərhədləri və Qafqaz bölgəsində sionizmin dirçəlişinə çalışdıqlarını iddia edib, onların buna nail ola bilməyəcəklərini deyib. Göründüyü kimi, İranın rəsmi nümayəndəsi çox açıq mətnlə Azərbaycanı və Türkiyəni təhdid edib. Ən maraqlısı isə budur ki, Zəngəzur dəhlizinə qarşı çıxaraq, bindan ölkəsinin ziyan görəcəyini deyib. Ortada təzad var. Çünki İran rəsmi səviyyədə bəyan edib ki, 3+3 formatında iştiraka hazırdır. Bu elə həm də Zəngəzur dəhlizi üzərində qurulacaq bir iqtisadi əməkdaşlıq formatı anlamına gəlir. Zəngəzur dəhlizi doğrudanmı İrana iqtisadi ziyan gətirə bilər, yoxsa İran bununla bəhanə edir?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, İranın son davranışlarında bizə qarşı aydın şəkildə qərəz və kin hiss edilir: “Xüsusilə də 44 günlük müharibədə Azərbaycanın Ermənistan üzərində parlaq qələbəsindən sonra bu amil özünü daha qabarıq şəkildə büruzə verməyə başladı: “Əslində, bu bizim üçün təəccüblü deyil. Çünki İran birinci Qarabağ müharibəsi, ondan sonrakı işğal dönəmində də Ermənistana açıq dəstək verib. Biz bu dəstəyi 44 günlük müharibənin gedişi zamanı da gördük. Silahla dolu maşınlar İrandan Ermənistana keçirdi. Post-müharibə dönəmində isə daha da aqressivləşib. Bunun çox sadə izahı var. Çünki Azərbaycan bölgədə olduqca ciddi iqtisadi, siyasi və hərbi gücə çevrilir. Bu da İrana sərf etmir. Bilir ki, nə vaxtsa Azərbaycanın birləşməsi məsələsi gündəmə gələ bilər. Qüdrətli Azərbaycan həm də sayı 40 milyona yaxınlaşan İrandakı soydaşlarımızın qürur yeridir.Azərbaycan bütün qonşuları ilə mehriban münasibıtlərin qurulmasının tərəfdarıdır. Hətta düşmən Ermənistanla belə, sülh şəraitində yaşamaq istədiyimizi bəyan edirik. İranla bağlı da münasibıtimiz belə olub. Təəssüf ki, İran kimi aqressiv bir ölkə uzanan bu əli tutmağı yox, onu geri çevirməyi seçir. Son vaxtlar İranın dini liderləri tərəfindən bizim təhdid olunmğımız olduqca gülünc görünür. Biz güclü və tam müstəqil ölkəyik. Çox güclü müttəfiqlərimiz var. Biz öz iqtisadi və hərbi gücümüzə güvənərək, ərazilərimizi işğaldan azad etdik. İran çalışır ki, bizi hansısa ölkələrin yedəyində gedən dövlət kimi qələmə versin. Ancaq bu qeyri-mümkündür. Çünki biz hər zaman müstəqil siyasət yürütmüşük. Zəngəzur dəhlizinin isə İrana heç bir iqtisadi ziyanı ola bilməz. Əksinə, İran bu amildən yaxşı yararlana bilər. Əgər uzaq Çin bu dəhlizin açılmasından fayda götürməyi düşünürsə, İrana niyə ziyan olsun? Görünür, İran hər məsələni öz arşını ilə ölçməyə öyrəşib və bölgədə sülhün deyil, gərginliyin olmasını istəyir. Bu cür təhdidlərlə bizi yolumuzdan çəkindirə bilməzlər. Biz öz siyasətimizi davam etdirəcəyik. Xalqımız və biz siyasətçilər daima dövlətimizə dəstəyik. Necə deyərlər, “gələcəkləri varsa, görəcəkləri də olacaq”. Ancaq yaxşı olar ki, İran bu ritorikadan əl çəksin”.
Mıhəmmədəli QƏRİBLİ
