Ermənilərin bütün qonşu dövlətlərə ərazi iddiaları olduğu məlumdur. Bu iddianı rəsmən Türkiyə və Azərbaycana bildirsə də, Gürcüstan və İrana hələ ki, bildirməyib. Ancaq artıq Gürcüstana qarşı belə bir iddianın irəli sürülməsinin zamanı gəldiyini erməni mediası gündəmə gətirib. Gürcüstanın Cavaxetiya adlanan bölgəsində ermənilərin kompakt yaşadığı məlumdur. Ona görə də ermənilər yenidən bu kartdan istifadə etmək istəyirlər.
Ermənistanın “Armenianreport” saytında “Satqın gürcülər antierməni bayrağı altında dayandılar” başlıqlı yazıda açıq formada bu iddialar ortaya qoyulub: “Ermənistanın bu satqın gürcüləri yerinə oturtmaq üçün təsir imkanları var və onlardan biri də Cavaxkdır. İrəvan müstəqilliyin bütün 30 ili ərzində Cavaxk fəallarının orada yaşayan yerli əksəriyyət üçün milli-mədəni muxtariyyət əldə etmək cəhdlərini fəal şəkildə dayandırdı.
O vaxt artıq Ermənistanın kifayət qədər problemləri var idi və bizim səlahiyyətlilərimiz, Cavaxk icmasının çoxsaylı istəklərinə baxmayaraq, Tbilisi ilə münasibətləri gərginləşdirmək istəmirdi. Ancaq indi antierməni təxribatları ilə gürcülər bizi sözün əsl mənasında Cavaxk ermənilərinin istəklərinə diqqət yetirməyə və bu bölgənin Ermənistana inteqrasiya edilməsi məsələsini həll etməyə məcbur edir. Tbilisi başa düşməlidir ki, Cavaxk erməniləri Ermənistana qoşulmaq üçün referendum keçirsələr, nəticə gürcüləri məyus edəcək”.
Görünən odur ki, 90-cı illərin əvvəllərində Gürcüstanda baş qaldıran erməni separatizmi yenidən boy göstərmək istəyir. Baxmayaraq ki, Ermənistan xarici ölkələrlə əlaqələrini əsasən Gürcüstan üzərindən həyata keçirir, amma görünür, bu faktoru da artıq nəzərə almaq istəmirlər.
“Bu minvalla onlar Qara dənizin sahilinə çıxmaq istəyirlər”
Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, Gürcüstanda erməni separatizminin alovlanması bir qığılcıma bənddir: “Uzun illərdir Cavaxetiyada kompakt yaşayan ermənilər bununla bağlı təşkilatlanırlar. Sadəcə, bunun üçün əlverişli vəziyyət tam yaranmadığı üçün gözləmə mövqeyindədilər. Ermənilərin Cavaxetiya ilə bağlı planları ciddidir. Bu minvalla onlar Qara dənizin sahilinə çıxmaq istəyirlər. Düzdür, Cavaxetiyanın Qara dənizə burbaşa çıxışı yoxdur. Ancaq arada 40 kilometrlik ərazi var ki, oranı işğal etməklə belə bir planları var. Ermənistanın açıq dənizə çıxışı olmadığı və Qarabağ məsələsinə diqqəti yönəltdiyi üçün bu məsələ gündəmdə deyildi. Lakin ötən il Qarabağda məğlubiyyətə uğradıqları üçün bənzər ssenarini Cavaxetiyada həyata keçirməyi düşünürlər. Hesab edirlər ki, Gürcüstan Azərbaycanla müqayisədə daha zəif dövlətdir və arxasında Türkiyə kimi dövlət yoxdur”.
Bu baxımdan partiya sədri hesab edir ki, Gürcüstanda erməni separatizmi hər an başlaya bilər.
Vidadi ORDAHALLI
