Yeri gəldi-gəlmədi insan haqlarından, demokratiyadan, bəşəri dəyərlərdən danışan və zaman-zaman ermənilərə qahmar çıxan Fransa növbəti biabırçılıqla üzləşib. Yayılan yeni hesabata görə, Fransa Katolik Kilsəsində 1950-ci ildən bəri əksəriyyəti oğlanlar olmaqla 216 min uşağa cinsi təcavüz edilib. Təhqiqatın nəticələrinə görə, Fransada kilsələrdə təcavüzə məruz qalanların sayı 330 minə yüksələ bilər. Təcavüz törədənlər əsasən kilsələrin işçiləri və katolik məktəblərin müəllimləri olub.
İki il yarım davam edən bu təhqiqat zamanı minlərlə məhkəmə, kilsə və polis sənədləri öyrənilib, şahidlər dinlənilib. Fransa qanunlarına görə, zaman müddəti keçmiş çox köhnə işlər üzrə cinayət təqibi tətbiq olunmur. 2500 səhifəlik hesabatda deyilir ki, qurbanların əksəriyyəti 10-13 yaş arası oğlanlar olub. Sənəddə qeyd olunur ki, Kilsə nəinki bu təcavüzlərin qarşısını almayıb, hətta bu barədə məlumat da verməyib və beləliklə qurbanların bir çoxunu təcavüzçülərlə baş-başa buraxıb. O da məlum olub ki, Kilsə öz qurbanlarına münasibətdə qəddar və laqeyddir. Təhqiqatın rəhbəri Jan-Mark Sove deyib ki, burada böyük bir laqeydlik və təsisatlanmış ört-basdır baş verib: “Qurbanlara inanmayıblar, onları dinləməyiblər. Dinləyəndə isə belə nəticə çıxarıblar ki, qurbanlar başlarına gələn təcavüzə görə hətta məsuliyyət də daşıyır”.
Komissiya bildirir ki, 115 min keşişin arasında 3200 cinsi təcavüzçünün olduğu aşkar edilib, amma bu rəqəm, çox güman, hələ tam deyil. Hesabatda deyilir ki, Katolik Kilsəsi ailə və dostların çevrəsindən sonra cinsi təcavüzlərin ən çox baş verdiyi ən böyük mühit olub.
Bütün bunlar bəşəri dəyərlərin qoruyucusu qismində çıxış edən Fransada necə böyük biabırçı hadisələrin baş verdiyini ortaya qoyur.
“Avropada ən çox Fransada inanclı müsəlmanlar diskriminasiyaya məruz qalır”
Məsələyə münasibət bildirən şərqşünas Seyid Camal Əzimbəylinin sözlərinə görə, bu, Avropa üçün, xüsusən də Fransa üçün böyük bir utancdır: “Bu, görünməmiş bir biabırçılıqdır. Deyərdim ki, bəlkə də Fransa tarixində belə biabırçı hal yaşanmayıb. Əslində, Katolik kilsələrində belə biabırçı halların baş verməsi yeni deyil. Dəfələrlə bu kimi bıabırçılıqlar yaşanıb, sadəcə bunların bir çoxu gizlədilir. Bu, xristianlığa, onun dəyərlərinə ciddi zərbədir. Fransa özünü tolerant, hüquqi bir dövlət kimi dünyaya təqdim edir, amma əslində bütün bunlar yalnız sözdədir. Məsələ ondadır ki, Avropada ən çox Fransada inanclı müsəlmanlar diskriminasiyaya məruz qalır. İslamafobiyanın müxtəlif təzahürləri məhz Fransada özünü daha çox göstərir. Müsəlman miqrantlar sıxışdırılır, linç edilir. Bir sözlə, müxtəlif diskriminasiyalara məruz qalırlar. Fransa həm siyasi, həm də iqtisadi və mədəni çəkisinə görə Avropada öncül dövlətlərdən biridir. Necə olur ki, Fransa kimi bir dövlətin xüsusi xidmət orqanlarının bütün bunlardan xəbəri olmayıb? Hesab edirəm ki, bu mümkün olan iş deyil. Sadəcə, siyasi və Kilsənin maraqlarından çıxış edib bunu ört-basdır etməyə çalışıblar. Ancaq nə qədər çalışsalar da, sonda hər şey ortaya çıxdı”.
Şərqşünas hesab edir ki, bütün bunlar Fransaya güclü zərər vuracaq.
Vidadi ORDAHALLI
