İranın xarici işlər naziri Hüseyn Əmir Abdullahian Rusiyanın “Rossiya 24” kanalına müsahibəsində açıq-aşkar Azərbaycanın ünvanına şər-böhtan söyləyib. Azərbaycana təzyiq üçün absurd ittihamlarını davam etdirən İran, artıq bütün sərhədləri aşmağa başlayıb.
Nazir bir daha Azərbaycan ərazisində “terrorçuların və sionistlərin” mövcud olduğunu iddia edib. Hələ bu da azmış kimi, guya Azərbaycanın bu faktı “etiraf” etdiyinə eyham vurub: “Biz orada Qarabağdakı müharibə zamanı peyda olan terrorçuların mövcudluğunu qeyd edirik. Rəsmi danışıqlarda Azərbaycan nümayəndələri bizə vəd etdilər ki, regionun terrorçulardan təmizlənməsi üçün tədbirlər görəcəklər...”
30 ilə yaxın müddətdə İranla sərhəddə terrorçu və separatçı rejimin tör-töküntüləri olub. İran rejimi də bundan geninə-boluna istifadə edib və erməni terrorçu qardaşları ilə hər cür ticarətlər qurub. Lakin Azərbaycan 44 günlük müharibə dövründə həmin terrorçuları da öz ərazisindən təmizlədi.
İranlı nazirin Azərbaycanın adından danışdığı bu yalana, şərə hələlik rəsmi Bakı münasibət bildirməyib. Hər halda, Azərbaycan XİN Abdullahianın bu son şər-böhtanına cavab verməli və iranlı nazirdən izahat tələb etməlidir. Azərbaycan rəsmilərindən kiminsə ölkəmizdə terrorçuların mövcudluğunu etiraf etməsi nə dərəcədə inandırıcı görünə bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, bir il əvvəl Azərbaycan Ordusunun başladığı əks- hücum əməliyyatları zamanı güya bizim ərazimizdə Suriyadan gələn terrorçuların olması ilə bağlı bəyanatı ilk olaraq Fransa prezidenti Emmanuel Makron verdi: “2021-ci ilin oktyabr ayının 1-də verilən həmin bəyanata Prezident İlham Əliyev dərhal reaksiya verdi və bunun böhtan olduğunu söylədi, eyni zamanda sübutlar tələb etdi. Buna baxmayaraq, ortaya heç bir sübut, dəlil qoyulmadı. Sonradan eyni məzmunlu bəyanatlar başqa ölkələrin rəsmiləri tərəfindən də işlədildi. Azərbaycan Prezidenti Xocalı Soyqırımı ilə bağlı böyük mətbuat konfransı keçirdi. Həmin konfransda İranın dövlət media agentliyinin jurnalisti Prezidentə terrorçuların mövcudluğu ilə bağlı sual verdi. Həmin suala Prezident kəskin cavab verərək bildirdi ki, belə sualı qonşu, dost ölkənin jurnalistinin verməsi onu təəccübləndirdi. Sonrakı proseslər göstərdi ki, İran özünü dost ölkə kimi aparmadı. Dəfələrlə onlara səhvləri izah edilsə də, münasibətlərində dönüş etmədilər. Biz dəfələrlə rəsmi şəkildə bəyan etmişik ki, 10 milyonluq əhalinin kənardan terrorçu gətirməsinə ehtiyacı yoxdur. Çünki bizim qarşımızda əhalisinin sayı iki milyon olan Ermənistan dururdu. Bizim belə bir ölkəni məhv etməyə öz potensialımız da kifayət qədərdi. Yenə də başa düşmək istəmədilər. İran xarici işlər nazirinin bəyanatı isə açıq-aşkar şantaj və böhtandır. Azərbaycan heç vaxt belə bir bəyanat verməyib, verə də bilməz. Görünür o, bizim XİN-dən belə bir bəyanatın verildiyinə ictimaiyyəti inandırmağa çalışır. İran rəsmisinin belə ləyaqətsiz fənddən istifadə etməsi olduqca ağrıdıcı məqamdır. Bu cür vasitələrə əl atırlarsa, demək ki, ən axırıncı yola qədəm qoymaq qərarına gəliblər. Hətta Azərbaycan hakimiyyətinə də böhtan atmaqdan çəkinmirlər. Yaxşı olardı ki, İran bu cür vasitələrdən imtina edib, münasibətləri düzəltməyi düşünsün. İran münasibətlərimizi pozmaq üçün əlindən gələni etdi. Bundan sonra çalışmalıdır ki, eyni bacarığı tam fərqli istiqamətdə etsin. İnanıram ki, İran tezliklə öz səhvlərindən nəticə çıxarıb, doğru yola gələcək”.
Məhəmmədəli QƏRİBLİ
