Prezident İlham Əliyev Avropa İttifaqının ölkəmizdəki nümayəndəliyinin yeni təyin olunmuş rəhbəri Petr Mixalkonun etimadnaməsini qəbul edərkən deyib ki, biz Avropa İttifaqına səylərin səfərbər olunması və postmüharibə vəziyyətinə töhfə verilməsi prosesində böyük tərəfdaşımız və dürüst vasitəçi kimi güvənirik:
“Bizim ənənəvi əməkdaşlıq sahələrimiz yaxşı məlumdur və biz böyük nailiyyət əldə etmişik. On il bundan əvvəl bu binada Avropa İttifaqı ilə Azərbaycan arasında enerji sahəsində əməkdaşlığa, enerji təhlükəsizliyinə dair Bəyannamə imzalandı. Bu, Cənub Qaz Dəhlizinin icrası istiqamətində çox mühüm addım idi. Bundan sonra əməli addımlar atıldı və ötən ilin son günündən bu yana biz artıq əməli nəticələri görürük. Azərbaycan qazı artıq Avropa bazarındadır.
Əlbəttə ki, bizim böyük layihə olan Cənub Qaz Dəhlizinin tamamlanması ilə bağlı planlarımız bununla məhdudlaşmır. Biz görürük ki, Avropa İttifaqının bir çox başqa üzvlərinin də təchizatçısı ola bilərik. Biz təchizatımızın coğrafiyasını genişləndirmək üçün Avropa İttifaqı ilə birgə işləməyi planlaşdırırıq - xüsusilə indi, qışda hər kəs görəndə ki, alternativ marşrut baxımından alternativ mənbə məhz enerji təhlükəsizliyidir.
Avropa Komissiyasının bizim nəqliyyat sektorumuza böyük əhəmiyyət verməsi məni çox qane edir. Prezident Şarl Mişelə səfəri zamanı ona bizim Dəniz Ticarət Limanının, Azad İqtisadi Zonanın imkanları təqdim olundu. Biz Avropa təsisatlarının bu sahəyə ciddi yanaşmasını görürük. Bu, təkcə iqtisadi, nəqliyyat sahəsində əməkdaşlıq baxımından deyil, həm də ümumilikdə regionda sabitlik və təhlükəsizlik baxımından həqiqətən də çox ümidverici sahə ola bilər. Çünki əməkdaşlıq ölkələri birləşdirir, onları bir-birindən asılı edir, onlar faydanı paylaşa bilir. Həmin səbəbdən də bu, hər hansı yanlış anlaşılma risklərini minimuma endirir. Siz bəlkə də bilirsiniz ki, biz Azərbaycanda nəqliyyat infrastrukturu şəbəkəsinin bütün vacib elementlərini tamamlamışıq və biz hazırıq, artıq bu potensialdan istifadə edirik. Sizin qeyd etdiyiniz digər sahələr də çox mühümdür. Humanitar, təhsil, sözsüz ki, Azərbaycanın demokratik inkişafı ilə bağlı bütün bu məsələlər bizim gündəliyimizdədir və biz Avropa İttifaqı ilə sıx şəkildə işləyirik.
Əlbəttə, indi düşünürəm ki, ən mühüm sahələrdən biri postmüharibə dövründə inkişafın, davamlı sülhün və əməkdaşlığın bərqərar olmasına Avropa İttifaqının töhfəsidir və biz buna hazırıq. Siz bəlkə də mənim bununla bağlı bəyanatlarımı eşitmisiniz. Mən nəzərdə tutduğumu deyirəm, bu, bizim siyasətimizdir. Biz səhifəni çevirmək, qonşumuz Ermənistanla əlaqələr qurmaq istəyirik. Biz sülh razılaşması, delimitasiya, kommunikasiyaların açılması ilə bağlı danışıqlara başlamağa hazırıq. Bu proses qismən başlayıb. Lakin düşünürəm ki, əgər Avropa İttifaqı fəal iştirak etsə, mən belə bir istəyin olduğunu görürəm, bu, bir çox sahələrdə bizə kömək edə bilər. Ümumilikdə Cənubi Qafqazda vəziyyət 30 il ərzində olmayan tamamilə yeni bir miqyas ala bilər. Bu da sabitlik, proqnozlaşdırılma və sülhün çox mühüm amili ola bilər. Əminəm ki, siz çox məşğul olacaqsınız, çünki görüləsi çox iş var. Mən sizə və ailənizə uğurlar, Azərbaycanda yaxşı vaxt keçirməyi arzulayıram".
Göründüyü kimi, Prezident postmüharibə dönəmində Ermənistanla münasibətlərin normaya salınmasında Avropa İttifaqının vasitəçilik səylərini görmək istəyir. Tərəflər buna razılıq verərsə, Avropa İttifaqı Minsk Qrupu formatını əvəzləyə bilərmi?
Politoloq Rəşad Bayramov “Bakı-Xəbər”ə bildirdi ki, ölkə başçısı olduqca incə məqama toxunub: “Məlumdur ki, ATƏT-in Minsk Qrupu Qarabağ münaqişəsinin həlli ilə məşğul olmaq üçün yaradılıb. Həmin qurum uzun onilliklər ərzində bir addım da olsun irəliləyişə imza ata bilmədi. Vasitəçilik missiyası effekt verməyən bir təşkilat əslində özü özünü buraxmalıdır. Ancaq biz görürük ki, onlar davam etməkdə maraqlıdırlar. Xüsusilə də münaqişənin bitmədiyini qabartmaqla, status məsələsini gündəmə gətirməyə çalışırlar. Fikir verirsinizsə, Prezident Avropa İttifaqının görmək istədiyi vasitəçiliyində Qarabağla bağlı məqamı nəzərdə tutmur. Biz bəyan edirik ki, münaqişə bitib. Qarabağ mövzusunda müzakirə ediləsi nəsə yoxdur. Ancaq bizimlə Ermənistan arasında münasibətlərin normallaşmasına ehtiyac var. Sərhədlərin dəqiqləşdirilməsi, Sülh sazişinin imzalanması kimi mövzular. Avropa İttifaqı bu məsələni öz üzərinə götürə bilər. Buna kimsə etiraz da edə bilməz. Çünki Minsk Qrupunun fəaliyyət istiqaməti münaqişə ilə bağlı olub və artıq həmin münaqişə yoxdur. Burada söhbət iki ölkə arasındakı münasibətlərdə vasitəçilik missiyasından gedir. Düşünürəm ki, bu istiqamətdə ciddi nəticə əldə oluna bilər. Çünki Avropa İttifaqı ciddi təsir rıçaqları olan bir qurumdur. Minsk Qrupu. nədənsə, deyilən istiqamətdə münasibətlərin qurulmasına səy göstərmirdi. Bizim Prezidentin çağrışından sonra iki ölkə rəhbərinin görüşdürülməsilə bağlı addım atmaq qərarına gəldilər. Biz çox doğru olaraq, müzakirə predmeti kimi iki ölkə arasındakı münasibətlərin normallaşmasını qabardırıq. Bizə Qarabağla bağlı hansısa qurumun səmərəsiz vasitəçilik cəhdləri lazım deyil. Bu məsələni özümüz həll etmişik”.
Məhəmmədəli QƏRİBLİ
