“VMedia"nın Youtube” kanalı ermənilərin daha bir saxta iddiasını ifşa edib. Belə ki, Ağrıdağın (Araratın) Ermənistana məxsus olması ilə bağlı iddianı ifşa edən yeni videoçarx hazırlayıb.
“VMedia” üzə çıxarıb ki, İncildə adı çəkilən Ararat dağı Türkiyənin Ermənistanla deyil, Suriya ilə sərhədi yaxınlığındadır.
Kanalın müəllifləri bildirirlər ki, ermənilər onları Böyük və Kiçik Ararat adlandırır və özlərininki hesab edirlər: “Bu o səviyyəyə çatıb ki, onlara milli simvol statusu verilib və onların təsvirləri ölkənin gerbində yer alıb. Burada əsas diqqət, əfsanələrə görə, Nuhun gəmisinin bu dağa yan alması haqqında söhbətlərə ayrılır. Məsələ burasındadır ki, “Ermənistana məxsus” Ararat dağının "İncil"də haqqında danışılan dağla əlaqəsi heç vaxt və heç bir ciddi alim tərəfindən təsdiq edilməyib”.
Videoçarxda ermənilərin Ararat dağının onlara məxsusluğu haqqında əfsanələrlə Roma Papası II İohan Pavel və Müqəddəs Patriarx Kirill kimi böyük kilsə xadimlərini də aldatmağa nail olduqları qeyd olunur. Lakin bu nağıllarla ermənilər ciddi tarixçiləri aldada bilməyiblər. Məsələn, Dövlət Ermitajının direktoru Mixail Piotrovskiy bildirib ki, qədimdə olmuş və "İncil"də adı çəkilən Araratla indiki Ararat arasında heç bir əlaqə yoxdur.
“İncil"də Nuhun gəmisinin torpağa yan aldığı yer kimi “araratlıların dağı” göstərilir. Həmin dağ şimalda Mesopotamiya ovalığına, cənubda isə Van gölünə çatırdı. Həmin dağın Assuriyanın şimalında yerləşməsi göstərir ki, "İncil"dəki daşqın və Nuhun gəmisi haqqında əfsanə Mesopotamiya ovalığını əhatə edib və ondan kənara çıxmayıb. Bəşəriyyətin ən qədim mənbələrindən biri olan "İncil" ümumdünya daşqını haqqında məşhur mifi təsvir edərkən İkiçayarası əfsanələrini işıqlandırıb. Bu əfsanələrdə isə ümumdünya daşqını haqqında əfsanələrin “Mesopotamiyadan kənarda” yaradılmasının mümkün olmadığı göstərilir. Bu səbəbdən, həm qədim dövrdə, həm də orta əsrlərdə Nuhun gəmisinin yan aldığı dağı Qafqazda deyil, Türkiyənin Suriya ilə hazırki sərhədi yaxınlığında axtarıblar. Bu səbəbdən, gəmini Türkiyə-Ermənistan sərhədində deyil, başqa dağda axtarmaq lazımdır”, - kanalın müəllifləri yazır.
“Söhbət təkcə Ermənistanın deyil, bütün Yaxın Şərqin tarixini əhatə edən və dünya miqyasına malik meqafeykdən gedir. Dünya tarixi elmi isə bu feyki təkzib edir! Ermənistan dövlətinin özünə hansısa simvollar yaratmaq və onları dövlət gerbində yerləşdirmək, istorioqrafiyada, təhsildə, mədəniyyətdə istifadə etmək, həmçinin turizm sahəsində istismar etmək hüququnu mübahisələndirmək fikrimiz yoxdur. Elmə zidd olaraq, buna inanıb-inanmamaq artıq Ermənistanla maraqlanan hər kəsin şəxsi seçimidir”, - videoçarxda deyilir.
“Həmin missionerlər ermənilər üçün təməlli bir yer seçmək üçün “Ararat” nağılını uydurdular, “İncil”də adı sadalanan “Ararat”ın guya Ağrıdağ olduğunu ortaya atdılar”
Qafqaz Tarixi Mərkəzinin rəhbəri Rizvan Hüseynov “Bakı-Xəbər”ə bildirdi ki, ermənilərin iddiası böyük bir saxtakarlıq üzərində qurulub. “Bu saxtakarlığın da arxasında heç də erməni durmayıb. Bu saxtakarlığın sahibi, yiyəsi ermənilər deyil, Avropadan olan bir qrup dini və siyasi qüvvələrdir. “Ararat” uydurmasından əvvəl ermənilər Ağrıdağ deyirdi. Sonradan ermənilərin Sis Masis dediyi dağ silsiləsinin adını “Ararat” qoymaq Avropadan gələn bir qrup missionerin əməlidir. Yəni Osmanlı dönəmində, XIX əsrdə Osmanlının zəif dönəmində fərqli-fərqli Avropa ölkələrindən, hətta Amerikadan Osmanlıya xristian missionerlər gəlirdilər və orada Şərq xristianları ilə, həmçinin də ermənilərlə təbliğat, siyasi-ideoloji işlər aparırdılar. Həmin missionerlər ermənilər üçün təməlli bir yer seçmək üçün “Ararat” nağılını uydurdular, “İncil”də adı sadalanan “Ararat”ın guya Ağrıdağ olduğunu ortaya atdılar. Onlar ermənilər üçün sakral-müqəddəs bir nöqtə inşa etdilər və sonradan bir qrup kitablarda bu çap olundu, bu saxta məlumat erməni ictimaiyyəti və ziyalıları arasında yayıldı. Dediyim kimi, bu uydurmanın arxasında Avropadan gələn bir qrup ideoloji maraqlar var. Ermənilər inandılar ki, bu belədir və sonradan ondan istifadə etməyə başladılar”.
R.Hüseynovun sözlərinə görə, missionerlərin özləri XIX əsrdə qeyd edirdilər ki, Ağrıdağın ətrafında, ümumiyyətlə o bölgədə yaşayan erməni toplumu “Ararat” tanımırdı, Ağrıdağa elə Ağrıdağ deyirdilər. “Missionerlər özləri yazırdı ki, ermənilər Nuh Peyğəmbərin gəmisinin bura gəlməsi uydurmasını bilmirlər. Faktiki olaraq, XIX əsrdə erməni toplumuna bu yalan yeridildi, müxtəlif kitablarda yazıldı, geniş təbliğ olundu, hətta ermənilərə, o cümlədən də Avropa elmi dairələrində tədris olundu, köklü şəkildə oturduldu. Nəyə görə? Çünki sırf bu bölgənin, bu dağın erməniyə verilməsi ilə buradan erməni separatizmi, erməni milli hərəkatı hər tərəfə şaxələndi, həm Anadoluya, həm Qafqaza, həm də müasir İran ərazisinə yayıldı. Erməni separatizmi layihəsinin əsas hərəkat nöqtəsi olaraq bu dağ seçildi”-deyə R.Hüseynov qeyd etdi.
İradə SARIYEVA
