Ermənistanın baş naziri Nikol Paşinyan parlamentin iclasında müxalifətçi deputatın replikasına cavab verərək, Litvada erməni diasporu ilə görüşdə səsləndirdiyi Şuşa haqda fikrini bir daha təkrarladı. Belə ki, erməni müxalifətçilərinin etirazlarına cavab olaraq Paşinyan təkidlə dedi: “Erməni işğalı zamanı Şuşa bədbəxt və tutqun bir şəhər idi”.
Üstəlik, Paşinyan Serj Sarkisyana eyham vuraraq qeyd etdi ki, Baden-Baden şəhərinə daha çox sərmayə qoyulub, nəinki Şuşaya: “Nə qədər sərmayə qoyulmuşdu? Gəlin hesablayaq, Şuşaya nə qədər sərmayə qoyulub, Baden-Badenə nə qədər sərmayə qoyulub (Ermənistanın baş naziri Baden-Baden şəhərində Qarabağ klanının liderlərinin, xüsusən də keçmiş prezident Serj Sarkisyan və onun qohumlarının korrupsiya kapitalını nəzərdə tutur). Gəlin bu rəqəmləri müqayisə edək, yoxsa etməyək? Bu suallarla nə demək istəyirsiniz? Yoxsa sizə elə gəlir ki, Şuşada yalnız siz olmusunuz? Mən orada yox idim, başqa insanlar da yox idi və heç kəs bilmirdi orada vəziyyət necə idi. Elə bil biz paralel reallıqlarda yaşayırıq. Dediklərim doğrudu”.
Bax, budur reallıq. Kişilikdən danışan Sarkisyan və onun qohumları korrupsiya hesabına əldə etdikləri vəsaitləri məhz Avropa ölkələrinə köçürdü. Əgər o doğrudan da erməni xalqının mənafeyini düşünsəydi, o zaman yoxsul Ermənistanın sərvətini bu cür yağmalamazdı.
“Tarix Sarkisyanın bütün cinayətlərini bax, beləcə ortaya qoyacaq”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Paşinyanın Şuşa ilə bağlı səsləndirdiyi fikirlərdə məntiq var: “Bəli, 1992-ci ilin mayında Şuşa işğal edildikdən sonra 28 il ərzində ermənilər orada demək olar heç bir abadlıq işləri aparmadılar. Əksinə, şəhəri dağıtdılar. Şuşada bir neçə imkanlı erməninin özünə villa tikməsindən savayı heç nə etmədilər. Şuşadakı bir sıra tarixi abidələri, evləri, binaları dağıtdılar. Ona görə ki, Şuşa heç vaxt onlar üçün doğma şəhər olmayıb. Tarixən Şuşada azərbaycanlılar yaşayıb. Baxmayaraq ki, Rusiyanın imperiya siyasətinə uyğun olaraq Qarabağda ermənilərin sayı süni şəkildə artırıldı, amma Şuşada hər zaman azərbaycanlılar üstünlük təşkil edib. Bunun nəticəsi idi ki, orada hansısa quruculuq işləri aparmadılar. Düzdür, Şuşanı Ağdamın gününə salmadılar, amma orada quruculuq işləri də görmədilər. Serj Sarkisyana gəldikdə isə, bir vaxtlar hansı vəzifədə olmasından asılı olmayaraq o quldurdur. Çünki o, bilavasitə ərazilərin işğal edilməsinə, kənd və şəhərlərin talan edilməsinə rəhbərlik edib. Bütün yaşayış evlərini və digər tikililəri kərpic-kərpic sökdülər. Onun bir hissəsini Ermənistana apardılar, digər hissəsini də tikinti materialı kimi İrana satdılar. Bütün bunlar yaxın tarixdə baş verdiyi üçün hər şeyi yaxşı bilirik. Ermənistanda “Qarabağ klanı”nı təmsil edən qüvvələr yaxşı kapitala malikdir. Nəyin hesabına? Məhz Qarabağın sərvətlərinin Sarkisyan kimi quldurlar tərəfindən talan edilməsi hesabına. Tarix Sarkisyanın bütün cinayətlərini bax, beləcə ortaya qoyacaq”.
Professor hesab edir ki, bütün bunlar araşdırılmalıdır.
Vidadi ORDAHALLI
