Məlum olduğu kimi, “Müstəqillik Günü haqqında” qanun layihəsinə təklif edilən dəyişikliyə görə, bundan sonra mayın 28-i Müstəqillik Günü, oktyabrın 18-i isə Müstəqilliyin bərpası Günü kimi ölkədə qeyd ediləcək.
Bu dəyişiklik nə dərəcədə əsaslı ola bilər?
Qeyd edək ki, bu məlumat yayıldıqdan sonra məsələ birmənalı qarşılanmır, sosial şəbəkələrdə geniş müzakirə edilir, lehinə olanlarla yanaşı əleyhinə olanlar da var. Əsasən də qeyri-mütəxəssislər buna qarşı çıxır.
“Çox təəssüf ki, 18 Oktyabrın dəyərini azaltmaq meyilləri var, mən də bunun tam əleyhinəyəm”
AVCİYA-nın vitse-prezidenti, tarix elmləri doktoru, professor Məhərrəm Zülfüqarlı bildirdi ki, Azərbaycan XX əsrdə dövlət müstəqilliyi ilə bağlı iki böyük əlamətdar hadisə yaşayıb, onlardan biri 28 May Respublika günüdür. “1918-ci il 28 may XX əsrdə əvvəlki əsrlərin davamı olaraq şərəfli tariximizin başlanğıcıdır. 18 oktyabr 1991-ci il isə dövlət müstəqilliyimizin bərpası tarixidir. Yəni bu rəsmi sənədlərdə də belə gedir. Çünki Azərbaycan Respubkikası Azərbaycan Xalq Cumhuriyyətinin varisidir. Amma bu iki şərəfli tarixi bir-birinə qarşı qoymaq fikri tamamilə səhvdir. Bəziləri deyir ki, əsl müstəqillik günü 28 maydır, başqaları isə 18 oktyabrın müstəqillik günü olduğunu bildirir. Hətta 18 oktyabra belə səhv yanaşma da var ki, bəziləri iddia edir ki, SSRİ dağılırdı, nəticədə başqa respublikalar kimi Azərbaycan da müstəqil oldu. Çox təəssüf ki, 18 oktyabrın dəyərini azaltmaq meylləri var, mən də bunun tam əleyhinəyəm. Hər ikisində də Azərbaycan xalqı böyük qəhrəmanlıqlar göstərib. 1918-ci ildə mart qırğınından keçərək dövlət müstəqilliyinə nail oldu. 18 oktyabr isə 1988-ci ilin fevralından başlanan Milli Azadlıq Hərəkatının məntiqi nəticəsi oldu. Bütün xalqlar kimi Azərbaycan xalqı da dövlət müstəqilliyini bərpa etdi. SSRİ-nin dağılması məsələsini “yenidənqurma konsepsiyası”ndan istifadə edərək Qarabağ problemi ilə başladılar. Bu, Azərbaycan xalqının seçimi deyildi, SSRİ-ni dağıtmaq istəyən böyük dövlətlərin seçimi idi. Xalqımız isə gərgin mübarizə nətiscəsində, 20 yanvar faciəsindən keçərək dövlət müstəqilliyini öz qanı-canı ilə bərpa etdi. 18 oktyabr çağdaş Azərbaycan tarixinin şərəfli səhifəsidir ki, bu günkü respublikamızın yaranmasının əsasını qoydu. Ona görə də, mənə belə gəlir ki, termin olaraq Azərbaycan Respublikasının müstəqillik günü 28 May 1918-ci il, dövlət müstəqilliyinin bərpası isə 18 Oktyabr 1991-ci ildir. Termin olaraq belə gedir, çünki burada varislik ənənəsi var. Hər ikisi şərəfli tarixdir, hər ikisi də mübarizə ilə əldə olunduğuna görə qeyd olunmalıdır”.
M.Zülfüqarlının sözlərinə görə, 18 oktyabrın qeyri-iş günü olması bərpa edilməlidir. Əvvəldən bunu dəstəklədiyini deyən M.Zülfüqarlının bildirdiyinə görə, 18 Oktyabrın iş günü olması təəssüf doğurur, bu tarix qeyri-iş günü olmalıdır.”18 Oktyabr rəsmi bayram günü olsa da, amma iş günüdür. Bu da 18 Oktyabrın dəyərinin bir qədər azaldılmasına gətirub çıxara bilər. Yenə də deyirəm, hər ikisi Azərbaycan xalqının dövlət müstəqilliyi yönündə atılan addımlardır, bizim üçün əzizdi” - deyə bildirən M.Zülfüqarlı hər iki tarixin təntənəli şəkildə qeyd edilməli olduğunu bildirdi: “Biri Azərbaycanın dövlət müstəqilliyinin yaranması, o biri isə bərpası günüdür. Çox zaman müəllimlər də bu terminləri işlədəndə səhvə yol verirlər. 18 Oktyabra Azərbaycanın müstəqillik günü deyirlər. Amma bu səhvdir”.
İradə SARIYEVA
