“Teleqram” platformasında yayılan məlumata görə, İran Azərbaycana görə Türkiyə ilə sərhəd qapısını bağlayıb. Rəsmi Tehranın heç bir xəbərdarlıq etmədən Türkiyə ilə Kapıköy sərhəd qapısını “koronavirus” bəhanəsi ilə qapatdığı bildirilir. Hadisəni əks etdirən videogörüntülərdən açıq görsənir ki, insanlar bu acı olaydan nə qədər əziyyət çəkir.
İran hələ atdığı addımın səbəblərinə izah verməsə də, şərhçilər bildirir ki, olayın arxasında Azərbaycanla yaşanan gərginlik durur.
“Proseslərin gedişi İranın özünün əleyhinə çevriləcək”
“Müasir İnkişaf” Birliyinin rəhbəri Mübariz Göyüşlü bizimlə söhbətində bildirdi ki, qonşu dövlətlər arasında bu cür halların yaranması təəssüfedicidir. “Qonşu ölkələr arasında belə bir vəziyyətin yaranması heç də ürəkaçan mənzərə deyil. Hesab edirəm ki, İranın Ali dini rəhbərliyi, siyasi rəhbərliyi qərarları soyuq başla qəbul etməyə çalışmalıdırlar. Onsuz da İranın blokada və təcrid vəziyyətə salınması, eləcə də dünyanın aparıcı dövlətlərinin təzyiqləri ilə nəticəsində düşdüyü durum elə də yaxşı deyil. İrana qarşı heç bir ərazi iddiası irəli sürməyən, həmişə mehriban qonşuluq siyasətinə üstünlük verən Azərbaycanla, bu ölkəyə qarşı təzyiqlər zamanı onu müdafiə etməkdən çəkinməyən Türkiyə ilə gərgin münasibətlərə səbəb olan addımlar atmaq qəbuledilən deyil. Bu qətiyyən xoş olan mənzərə deyil və hesab etmirəm ki, İran üçün hansısa müsbət nəticələr doğura bilər. Əgər İran daxilindəki radikallar düşünürlərsə ki, bununla Türkiyənin, yaxud Azərbaycanın gözünü qorxudub onları nədənsə çəkindirə bilərlər, yaxud bu cür davranışlar sərgiləməklə nə isə əldə edə biləcəklər, yanılırlar. İran Azərbaycan və Türkiyə ilə münasibətlərini yalnız qarşılıqlı hörmət üzərində davam etdirməlidir. Bu ölkə xoşagəlməz siyasətdən əl çəkməlidir. İranın Türkiyə ilə sərhəd qapısını bağlaması barədə yayılan xəbər təəssüf doğurur”.
M.Göyüşlü hesab edir ki, İran rəhbərliyi, ayətullahları qızışdırıcılıq mövqeyindən əl çəkib qonşu ölkələrlə münasibətləri qaydasına salmaq barədə addımlar atmalıdır, nəinki sərhəddi bağlamaq kimi davranışlar nümayiş etdirməlidir. “Sərhədd bağlamaq, hərbi təlim keçirmək, hərb yolu ilə “əzələ” nümayiş etdirməyə cəhd etmək, hansısa əyalət mollalarının dili ilə Azərbaycana qarşı təhdidlər sərgiləmək kimi hallar çıxış yolu deyil. Çıxış yolu Türkiyə, Azərbaycan və İran rəsmilərin bir masa ətrafına əyləşib çıxış yolu əldə etməyə nail olmaqdır. Əks halda proseslərin gedişi İranın özünün əleyhinə çevriləcək”-deyə M.Göyüşlü vurğuladı.
İradə SARIYEVA
