“Türkiyə-Rusiya əməkdaşlığı regionumuzun sabitliyinin təminatçısıdır”. Bunu Prezident İlham Əliyev Cəbrayılda rayon ictimaiyyətinin nümayəndələri ilə görüşündə deyib.
Ölkə başçısının sözlərinə görə, hazırda regionda real praktiki əməkdaşlıq çərçivələri müəyyən olunur: “Bu yaxınlarda Türkiyə və Rusiya prezidentlərinin görüşü zamanı Ermənistan-Azərbaycan münasibətləri müzakirə olundu və həm Türkiyə, həm Rusiya ilə biz daim təmasdayıq. Mən Prezident olaraq daim təmasdayam. Bölgədə bu gün sabitliyin bərqərar olmasında Türkiyə və Rusiyanın rolu çox böyükdür. Yəni bizə bu format kifayətdir. Ermənistan da bu formata qoşulacaq. Çünki başqa yolu yoxdur. İndi reallıq bundan ibarətdir. Son vaxtlar Türkiyə-Ermənistan əlaqələrinin normallaşdırılması ilə bağlı verilən ifadələri də biz dəstəkləyirik. Biz açıq demişik ki, biz bunu dəstəkləyirik. Hesab edirik ki, bu, region üçün lazımdır. Yəni artıq bu, müharibənin hər hansı bir risqini aradan götürmək üçün lazımdır. Yəni bizim üçün bu format kifayətdir - Türkiyə-Rusiya-Azərbaycan-Ermənistan. Kim istəyir qoşulsun, kim istəmir özü bilər. Hər halda, bu gün Azərbaycanın razılığı olmadan bu bölgədə hər hansı bir təşəbbüs gerçəkləşə bilməz. Bunu hər kəs bilməlidir”.
Görünən odur ki, Ermənistanın başqa şansı yoxdur və mövcud reallıqlarla barışmalıdır. Ona verilən bu şansı düzgün dəyərləndirməlidir.
“Bölgədə sabitliyin təminatçısı olaraq Türkiyə-Rusiya tandemi qurulubsa, o zaman Ermənistan bu formata qoşulmağa məhkumdur”
Məsələyə münasibət bildirən “Səs” Media Qrupunun rəhbəri, politoloq Bəhruz Quliyevin fikrincə, bütövlükdə bölgədə sabitlik olarsa, bu ümumilikdə regionun davamlı inkişafına xidmət edəcək: “Bütün bunlar təkcə region üçün əhəmiyyətli məsələ deyil. Eyni zamanda, Avropa üçün vacib əhəmiyyət kəsb edən layihələrin həyata keçirilməsi deməkdir. Məsələ ondadır ki, enerji və nəqliyyat xəttlərinin şaxələndirilməsi, Orta Asiyanın enerji resurslarının Cənubi Qafqaz üzərindən Avropa bazarına çıxarılması gündəmdədir. O üzdən hesab edirəm ki, bütün bunlara qlobal miqyasda yanaşmaq lazımdır. Ona görə də bu kimi layihələrin həyata keçirilməsi ilə əlaqədar regionda sabitliyin təmin edilməsi mütləqdir. Türkiyə-Rusiya əməkdaşlığının qurulması bir növ bunun qarantıdır. Cənab Prezident dəfələrlə çıxışlarında qeyd edib ki, artıq regionda reallıqlar dəyişib. Bu gün Türkiyə faktoru nəzərə alınmalıdır. Bölgədə sabitliyin təminatçısı olaraq Türkiyə-Rusiya tandemi qurulubsa, o zaman Ermənistan bu formata qoşulmağa məhkumdur. Başqa alternativ bu ölkə üçün mümkünsüzdür. Nəzərə almaq lazımdır ki, Türkiyə-Rusiya prezidentlərinin son görüşündə bölgədəki təhlükəsizlik müzakirə olunub. Məlum olduğu kimi, Azərbaycan sözügedən formatı dəstəkləyir və ona qoşulub. Ona görə ki, Azərbaycan sülh və inkişaf istəyir. O üzdən, Ermənistan düşdüyü ağır vəziyyətdən çıxmaq istəyirsə, bu formatı qəbul etməlidir. Bütün bunlar o deməkdir ki, biz sülhə, regional inkişafa, sərhədlərin delimitasiyasına hazırıq. Əsas odur ki, Azərbaycan ərazilərin işğal altından azad olunmasına nail olub. Regionda stabillik yaranarsa, o zaman böyük layihələrə start veriləcək və bütün tərəflər bundan yararlanacaq. Prezdent bununla bir növ Ermənistan hakimiyyətinə mesaj verdi ki, bu formatı qəbul etməlisiniz. Başqa variantınız yoxdur”.
Politoloq yekun olaraq onu da qeyd etdi ki, müharibədən sonra bölgədə yaranan reallıqları dəyişmək mümkün deyil.
Vidadi ORDAHALLI
