İranın Ermənistanla can bir qəlbdə olması əksər müsəlman dövlətlərinin təəccübünə və təəssüfünə səbəb olur. Molla rejiminin din bir qardaşı Azərbaycana qarşı tutduğu yanlış mövqe bir çox islam ölkələrində hiddətlə qarşılanır. Xüsusilə “Hizbullah”ın qurucusu Şeyx Sübhinin təxminən bir il əvvəl İkinci Qarabağ müharibəsinin gedişi dövründə yayılmış videosu bu gün də aktuallığını qoruyur. Onun İranın hansı səbəbdən Ermənistanı dəstəklədiyinin, Azərbaycanı isə dəstəkləmədiyinin səbəbini şərh etməsini əks etdirən video bu gün də sosial şəbəkələrdə geniş müzakirə edilir.
Qeyd edək ki, Şeyx Sübhi videodakı çıxışında rəsmi Tehranın yanlış siyasətindən heyrətləndiyini, buna təəccüb etdiyini və bundan hiddətləndiyi bildirirdi.
O, xatirələrindən danışıb, İranı Birinci Qarabağ müharibəsi zamanı Ermənistana yardımına görə tənqid edib: “O vaxtlar mən Tehrandaydım. İran mediasını izləyirdim və insanların erməniləri dəstəklədiyini görürdüm. Dövlətin və medianın ermənilərin yanında olmasına çox təəccüblənirdim. Ermənilər işğalçıdır və siz özünüzə islam dövləti deyirsiniz, zülmə və təcavüzə qarşı olduğunuzu söyləyirsiniz. Bəs onda niyə zalımın yanındasınız?… O zaman təbii olaraq hər şeydən öncə siz məzlumun yanında olmalı idiniz. Bunlar da müsəlman, məzlum, üstəlik də şiədirlər. Həqiqətən çox təəccüblənmişdim. Hansı əsasa görə bunu edirsiniz? Qurana görəmi? “Yaxşılıq və təqva məsələsində bir-birinizə kömək edin” ayəsinə görəmi? Yaxşılıq və təqva belə idimi? Heyrət içində idim və bunun səbəbi mənim üçün çox maraqlı idi”.
Şeyx Sübhi çıxışının ikinci hissəsində İranın xarici işlər naziri ilə arasında baş verən söhbətdən, verilən cavabdan danışır və Ermənistana köməyin məqsədini açıqlayır: “Bir gün İranın xarici işlər nazirini saxladım və ondan bunun səbəbini soruşdum. Nazir bir cümlə ilə məsələni mənə belə izah etdi: “Ermənistan Türkiyənin sərhədindədir və biz Türkiyənin Türkmənistan, Özbəkistan, Azərbaycan və digər dövlətlərlə əlaqə qurmasını əngəlləməliyik. Biz Türkiyəyə qarşı Ermənistanı dəstəkləyirik”. İçimdən öz-özümə “Kaş sənə bu sualı verməyəydim” dedim”.
Ekspertlərin fikrincə, artıq İranın Azərbaycana qarşı mövqeyi islam aləminin özündə də etirazla qarşılanır, “Hizbullah”ın qurucusu aydin şəkildə buna etiraz edib, rəsmi Tehranın Ermənistanla "qardaşlaşmasını” anlamadığını qeyd edib.
“Bəs hansı İslam ümməti, hansı İranın cümə xütbələrində danışarkən...
Siyasi ekspert Rövşən Rəsulov “Bakı-Xəbər”ə şərhində bildirdi ki, İranın tutduğu yanlış mövqe bu ölkəni tamamilə ifşa edir. “İranın “islam” pərdəsi altında, əslində isə aşkar şəkildə şovinizm, eyni zamanda panfarsizm məqsədlərini reallaşdırması cəhdləri uzun illərdən bəridir ki, davam edir. Biz illərdir Tehran rejiminin Cənubi Azərbaycan bölgələrində soydaşlarımıza qarşı yürütdüyü antitürk xarakterli siyasəti barədə danışır, ümumiyyətlə, İran hakimiyyətinin azərbaycanlı, yaxud bütöv Azərbaycan ideologiyasının reallaşmasından nə qədər xoflandığını bildiririk. Bilirsiniz, xəritələr dəyişdirilə bilər, amma tarixi dəyişdirmək əsla mümkün deyil. Təbii ki, bunu Tehranın fars mollakratiya rejimi də çox gözəl bilir. Ona görə də, hər zaman və harada türkçülik, azərbaycançılıq ideologiyası mövcud olursa, dərhal bu ideologiyanı əlində olan bütün imkanları ilə boğmağa çalışır. İslam isə onlar üçün sadəcə bir pərdədir”.
R.Rəsulovun sözlərinə görə, bu gün İran yalnız İslam pərdəsi altında deyil, həm də şiəlik məzhəbi vasitəsilə də öz kirli niyyətlərini icra etməyə cəhdlər göstərir: “Lakin gəlin, ortadakı təzadlara nəzər salaq: bu gün orada yaşayan azərbaycanlılar da müsəlman və şiədirlər, fars idarəçiliyi də özünü nəinki şiə, həm də şiəlik məzhəbinin lokomotivi rolunda təqdim edir. Onda problem nədədir? Əlbəttə ki, millətdə, daha dəqiq desək, tükçülükdə, azərbaycançılıqda. Halbuki, İslam dini millətçiliyi inkar edir və belədirsə, Tehran rejimi izah etsin görək, Qurandakı ayələrə niyə əməl etmir? Niyə müsəlman və şiə azərbaycanlıları davamlı olaraq təzyiqlər altında saxlayır, repressiyalar həyata keçirir?
Hələ bu da azmış kimi, Tehranın sözdə müsəlman rəhbərliyi illərdir ki, Ermənistanla can deyib, can eşidir. Həmin Ermənistanla ki, müsəlman azərbaycanlıların torpaqlarını işğal etdi, minlərlə insanı qətlə yetirdi, soyqırımları törətdi. Niyə həmin vaxtlar İran hakimiyyəti Ermənistana ən azından barmaq silkələmədi? İndi regiondakı reallıqlar öz yerini tapanda, torpaqlarımız işğaldan azad ediləndə Azərbaycana qarşı dil uzadır? İzah etsinlər ki, ermənilərə olan sevgiləri haradan qaynaqlanır. Bir xatırlatma etmək istərdim. İranın keçmiş prezidenti Əhmədinejad Ermənistanın sabiq dövlət başçısı Serj Sarqisyanla Tehranda keçirdiyi görüşü zamanı fars-erməni qardaşlığından ağızdolusu danışaraq hər iki millətin genoloji qohum olduqlarını da dilə gətirmişdi. Bu bir etiraf idi, həqiqət idi. Həmin həqiqət ki, fars şovinizmi türkçülük ideologiyasını özünə düşmən hesab edir. Bu gün İranda qondarma erməni soyqırımının xatirəsinə ucaldılmış abidə var, Tehranda “Ararat” adında böyük “erməni evi” fəaliyyət göstərir, ermənilərin ölkə həyatındakı yerləri müsəlman azərbaycanlılardan qat-qat üstünlük təşkil edir. Amma bu yaxınlarda Tehran rejimi kürd millətçiləri ilə anlaşaraq Zəncanda azərbaycanlılara qarşı amansız vəhşiliyi törətdi, analarımız, bacılarımız, körpələrimiz döyülüb-söyüldülər, qardaşlarımız əl-qolları bağlanaraq maşınlara mindirilib aparıldı, işgəncələrə məruz qoyuldular. Bəs hanı İslam ümməti, hanı İranın cümə xütbələrində danışarkən ağızlarına yerləşməyən çullu dovşanlar? Göründüyü kimi, onlar susurlar, amma söhbət tarixi reallıqlara gələndə dərhal əbalarını başlarına çəkib, əmmamələrini göyə qaldırırlar ki, bəs Azərbaycan sən demə “sionistləri” sərhədə yığır və bu da İran üçün təhdiddir.
Cənab Prezident, Ali Baş Komandanımız İlham Əliyev Cəbrayılda səfərdə olarkən onların cavablarını verdi və müvafiq bəyanatını da səsləndirdi. Lakin gördüyümüz kimi, Tehran rejimi öz həyasızlıqlarını davam etdirir və elə sanır ki, Azərbaycan təkdir. Xeyr, Azərbaycan tək deyil, onun yanında Türkiyə, Pakistan və s. kimi qardaşları var və bu qardaşlıq heç də dini, məzhəbi köklərə dayanmır, bu qardaşlıq təmizliyə, əsl qardaş sarsılmazlığı prinsiplərinə, el dili ilə desək, kişiliyə söykənir!
Təbii ki, İran hakimiyyətinin qorxduğu yeganə həqiqət sərhədlərdəki reallıqların dəyişdirilməsi, uzun illərdən bəri formalaşmış stereotiplərin laxlaması, məhvə doğru sürüklənməsidir.
Çox gözəl xatırlatdınız ki, “Hizbullahın” qurucusu Şeyx Sübhi öz çıxışı zamanı İranın hansı səbəbdən Ermənistanı dəstəklədiyini, Azərbaycanı isə dəstəkləmədiyini şərh edərkən Tehranın yanlış siyasətindən heyrətləndiyini, təəccüb etdiyini və bundan hiddətləndiyini nümayiş etdirib. Mən də həmin videonu izləmişəm və əslində onun çıxışı belə əsasa söykənir ki, İran Birinci Qarabağ müharibəsində də, İkinci Qarabağ müharibəsində də müsəlman Azərbaycana deyil, radikal xrsitian qoluna söykənən Ermənistana dəstək göstərib və bu dəstəyi İranın özündə də müşahidə edib. Səbəb isə yenə də müsəlman Türkiyədir.Yəni Türkiyənin sərhədlərdə güclənməsi, hərbi, iqtisadi potensialının artmasıdır. Şeyx Sübhi də ona təəccüb edir və hiddətlənir ki, İran nəyə görə müsəlman ölkələrdən, İslam ümmətindən xoflanır.
Halbuki, İran istəsəydi, Ermənistanla deyil, qonşuları olan Türkiyə və Azərbaycanla iqtisadi əlaqələrini genişləndirə, daha güclü müsəlman birliyi yarada bilərdi. Amma bunu etmədi, əksinə, boğulan, məhv olan Ermənistanın ətəyindən yapışdı. Bu gün də həmin vəziyyət davam edir və təkcə Şimal-Cənub layihəsində Azərbaycanın iştirak etməyəcəyini sevinclə bəyan edərkən, Zəngəzur dəhlizinin açılmasına imkan verməyəcəyini iddia edərkən özünü daha çıxılmaz vəziyyətə sürükləmiş olur. Baxın, artıq Gürcüstan da İran furalarının sərhəddən keçməsinin qarşısını alır. Azərbaycan Türkiyə və Gürcüstanla hərbi təlimlərini keçirəcək, Naxçıvanda hərbi təlimlərimiz davam edir və bütün bunlar son deyil. Son onda olacaq ki, Tehran rejimi son anda diz çökərək, əsrlərdir buraxdığı səhvlərini etiraf edib üzr istəyəcək. Onda isə, düşünürəm ki, çox gec olacaq”.
R.Rəsulovun sözlərinə görə, bu gün Azərbaycanın, Türkiyənin dəhliz maraqları həm də Rusiya ilə üst-üstə düşür və İran hesab edirsə ki, Ermənistanın şərqinə ordu yeridəcək və s. bütün bunlar sadəcə və sadəcə fars şovinistlərinin, radikal dinçilərinin, müsəlmançılıqdan uzaq olan mollakratlarının nağıl aləmidir, hallüsinasiyalarıdır.
İradə SARIYEVA
