Ermənistanın sabiq prezidenti Robert Köçəryan oktyabrın 4 -də keçirdiyi mətbuat konfransında ölkəsində həbs olunan generallar və müharibə haqqında danışarkən maraqlı etiraflar edib: “Generallar danışmağa, həqiqəti söyləməyə başlamalıdır, əks halda bütün günah onların boynuna qalacaq”.
O bildirib ki, bu il ərzində müharibəyə görə müxtəlif günahkarlıq və məsuliyyət işarələri var idi: “Günahı orduya, generallara yükləməyə çalışacaqlar.
Müharibə ölkə tərəfindən aparılır. Ordu bu müharibədə tək qaldı. Bu kökündən səhv qərarları kimin verdiyini anlamalısınız. Təşəbbüskar ordu, Baş Qərargah, generallar idisə, səhv qərarlar da baş nazir tərəfindən verilirdi. İndi məğlubiyyətin korrupsioner generalların fəaliyyətinin nəticəsi olduğu kimi bir fon yaratmaq üçün cəhdlər edilir”.
Köçəryan, həmçinin, ölkəsinin müharibəyə ciddi hazırlaşmadığını da qeyd edib. Diplomatiya sahəsində buraxılan nöqsanlardan da danışıb. Etiraf edib ki, müharibənin ilk 2-3 günündə artilleriya və hava hücumundan müdafiə sistemləri tamamilə sıradan çıxarıldı. Bununla Ermənistan ordusundakı nöqsanları və onların acızliklərini tam etiraf etmiş oldu. Köçəryanın bu etirafları nəyə hesablana bilər?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Köçəryanın bu etirafları reallığı əks etdirir: “Amma səmimi deyil. Çünki bu məğlubiyyətin hamısını Paşinyanın ayağına yazmaq istəyir. Yəni ordu mövzusundan siyasi mıqsədləri üçün istifadə edir. Prezident İlham Əliyev çox doğru buyurdu ki, biz tək Paşinyanı deyil, ən əsası ondan əvvəlki prezidentlərin qurduqları orduları məhv etmişik, onlara qalib gəlmişik. Ermənistanın hava hücumundan müdafiə sistemlərində heç də hamısı köhnə silahlar olmayıb. Köçəryan bütün məsuliyyəti köhnə silahların üstünə atmaqla, həm də xalqını məsuliyyətdən yayındırmaq istəyir. Eyni zamanda bizim döyüş əzmimizi kiçiltməyə çalışır. Bəli, Azərbaycan Ordusu bu müharibədə misli görünməmiş rəşadətə imza atdı. 44 günlük müharibədə biz bir addım da olsun geri getmədik. Yalnız irəli getdik. Bəli, biz eyni zamanda yeni nəsil silahlarla müharibə apardıq. Təsadüfi deyil ki, bizim hərbi təcrübəmiz hazırda dünyanın bütün hərbi təlim ocaqları tərəfindən öyrənilir. Biz yalnız Ermənistanın hərbi hava qüvvələrini deyil, eyni zamanda onların canlı qüvvəsini məhv etmişik. Ən elitar qoşunlarını meydandan qaçmağa məcbur etmişik. Yalın əllə Şuşanı azad etmişik. Köçəryan siyasi məqsədlə bu açıqlamanı versə də, həqiqətin bir hissəsini etiraf edir. Biz bütövlükdə Ermənistan ordusunun belini sındırmışıq. Onlar heç 50 ildən sonra da özlərinə gəlib, bizimlə müharibə etmək qüdrətinə sahib ola bilməzlər. Bundan Köçəryan bir siyasi təzyiq aləti olaraq istifadə etməsin. Yaxşı olar ki, tərbiyəvi əhəmiyyətini əxz edib, özünə lazımi nəticə çıxarsın. Revanşizmdən əl çəksin. Xalqını müharibəyə yox, sülhə hazırlasın. Əks təqdirdə daha rəzil günə düşəcəklər. Yaxşı olar ki, Prezidentimizin son çıxışlarını diqqətlə izləyib, oradan əməli nəticə çıxarsınlar. Həmin çıxışda onlara yaxşı yol göstərilib”.
Məhəmmədəli QƏRİBLİ
