“Mən deyəndə ki, Serjik hərbi cinayətkardır, bunu təkcə mən demirəm, bunu bölgə ilə tanış olan bütün qərəzsiz və müstəqil politoloqlar, jurnalistlər deyir”. Bunu Prezident İlham Əliyev Tərtər rayonunun Suqovuşan qəsəbəsində Azərbaycan bayrağını ucaldarkən çıxışında deyib.
Dövlət başçısı S.Sarkisyanın britaniyalı jurnalistə verdiyi müsahibədə Xocalı soyqırımını şəxsən özü törətdiyini dediyini bildirib: “Bunun da izahatını vermişdi ki, azərbaycanlılar bilməlidirlər, Ermənistan ordusu dinc əhaliyə qarşı silah qaldıra bilər. Bu qanlı cinayətkar Serjik Sarkisyandır. Xain deyirəm, bu, təhqir deyil. O, hər addımbaşı xəyanət edib. Birincisi, çörəyini yediyi Azərbaycan xalqına. İkincisi, onun rəhbəri olan keçmiş Dağlıq Qarabağ Muxtar Vilayətinin birinci katibi Gevorkova ki, onun yavəri olub, onun qovluq daşıyanı olub. Bu onun tərcümeyi-halında da var, bəlkə də onu sildirib, amma bizim arxivlərdə var. Çünki onun vəzifələrə təyin olunması Bakıdan keçirdi. Bizim arxivlərdə hər şey var. Serjik Sarkisyan Boris Gevorkovun rəsmən köməkçisi vəzifəsini daşıyırdı, amma faktiki olaraq nökəri, kabab bişirəni və istirahət məclislərinin təşkilatçısı funksiyasını yerinə yetirirdi. Sonra nə oldu? Sonra separatist hərəkat başlayan kimi Serjik Gevorkovu satdı, xəyanət etdi. Bu, ikinci xəyanət. Üçüncü xəyanət onun rəhbəri olan Köçəryana qarşı idi. İndi Ermənistanda bunu bilməyən yoxdur. Serjiki qulağından tutub vəzifələrə gətirən Köçəryan olmuşdur. Bütün vəzifələrə onu o təyin edib. Prezident vəzifəsinə də zorla o təyin etdirib. Halbuki, erməni xalqı Serjikə nifrət edirdi. Ondan sonra nə oldu? Heç bir il keçmədi Köçəryanı artıq kənara qoydu, heç telefonlarına da cavab vermirdi. Görün, bu nə qədər alçaq xislətli bir ünsürdür”.
Prezidentin sözlərinə görə, müharibə ilə bağlı təhlillər onu bir daha göstərir ki, bu müharibənin uduzan tərəfi məhz Serjik Sarkisyan və onun kimilərdir: “İndi o, məğlubiyyəti Paşinyanın üstünə atmaq istəyir. Guya Paşinyan günahkardır. Paşinyan 2018-ci ildə hakimiyyətə gəlib. O cəmi iki il ərzində ordu yarada bilərdi? Yaxud da ki, “möhkəm”, “güclü ordu”nu dağıda bilərdi? Bu ordunu yaradan Serjikdir. Serjik Ermənistanda müdafiə naziri olub. Serjik Ermənistanda baş nazir olub. Prezident Administrasiyasının rəhbəri olub, Təhlükəsizlik Nazirliyinin rəhbəri olub. Prezident olub 10 il ərzində. Bu ordunu yaradan Serjik deyil, kimdir? Biz o ordunu məhv etməklə Serjiki və onun kimi ünsürləri məhv etdik. Qoy o, bu məğlubiyyəti Paşinyanın üstünə atmasın. Paşinyan nə edib, o başqa məsələdir. Ancaq biz Serjiki məğlub etmişik, onu diz çökdürmüşük, onun belini qırmışıq. O, bizim qabağımızda, onun qurduğu ordu bizim qabağımızda diz çöküb. Bu gün mən buradayam, Ali Baş Komandan kimi keçmiş Dağlıq Qarabağ Muxtar Vilayətinin ərazisindəyəm. Serjikin kişiliyi çatırsa, gəlsin bura. O, kişilikdən danışır. Qafqazda kişilikdən danışır. Birincisi, Qafqaza bunun millətinin heç bir aidiyyəti yoxdur. Onlar gəlmədirlər, haradan gəliblər, hamı yaxşı bilir. İkincisi, kişilikdən danışırsansa, gəl kişi kimi buraya. Bax, mən burada dayanmışam. Sənin “Madagiz” adlandırdığın Suqovuşanda dayanmışam. Kişiliyin varsa, gəl buraya. Yoxsa orada - İrəvanda oturub banlamaqla özündən qəhrəman düzəldə bilməzsən. Demişəm bir dəfə, hələ sinəsində gəzdirdiyi o dəmir-dümürləri zibil yeşiyinə atsın. Onların heç bir qəpik də qiyməti yoxdur. Ona ən yaxşı cəzanı da erməni xalqı verib, 2018-ci ildə bir təpiklə onu vəzifədən qovub. 2018-ci ildə seçkilərdə növbəti saxtakarlıq törədərək özünə 50 faizdən çox səs yazdırıb. Bu cinayətin şəriki ATƏT-in Demokratik Təsisatlar və İnsan Haqları Bürosudur. Çünki onlar Serjiklə əlbir olaraq, - bilmirəm, sövdələşmə nəyin əsasında olub, amma təxmin edə bilərəm, - onun qələbəsini tanıyıblar. Bu adamı Ermənistanda kütləvi surətdə lağa qoyurlar, ələ salırlar, ona nifrət edirlər. O, seçkilərdə özünə 50 faizdən çox səs yazdırır, özünü baş nazir təyin etdirir və ATƏT də buna göz yumur, buna razılıq verir. Bax, iki saxtakar - biri ATƏT-in Demokratik Təsisatlar və İnsan Haqları Bürosu, hansı ki, Azərbaycana hər zaman xor baxır, biri də Serjik. Nə oldu, sonra erməni xalqı qalxdı. Erməni xalqı qalxıb bir təpiklə onu vurub atdı çölə. Ondan sonra nə etdi? Ondan sonra məzlumcasına gəlib dedi ki, mən haqlı deyildim, Nikol haqlı idi. Özünə kişi deyən adam belə söz deyər?! Özünə kişi deyən adam bu qədər özünü alçaldar?! Bax, bunu belə heç ediblər. Ondan sonra iki il ərzində ağzına su alıb susmuşdu. Nə qədər onu təhqir etdilər. Nə qədər onun cinayətkar qohumlarını həbs etdilər. Xaricdə gizlənmiş və Kolumbiyanın, ya da Qvatemalanın pasportunu almış bir yaxın qohumu var, adını da dəyişdirmişdi. Necə ki, vaxtilə Serjik özünü “Serj” edib. Qohumu da özünə bir ad verib – “Qonzales”. Qulağından tutub gətiriblər və həbs ediblər. Qorxusundan susub, nə desin? Müharibədən sonra yenə baş qaldırır. Müharibə olmasaydı, bu acı məğlubiyyət olmasaydı, Serjik də indi həbsxanada idi. Onun kimi oğru bizim
bölgədə bəlkə də hələ doğulmayıb”.
Prezident bildirib ki, görün, erməni xalqı bu məxluqa nə qədər nifrət edir ki, hətta müharibədə günahkar sayılan iqtidara daha çox səs verdi, nəinki ona: “ Odur ki, bir də deyirəm, bax, mən buradayam, Suqovuşandayam, mən Şuşadayam, mən Hadrutdayam, mən Xocavənddəyəm, hər yerdəyəm. Siz haradasınız?! Cəhənnəmdə, gorbagor statusla bir yerdə. Vəssalam, qurtardı, bitdi”.
Göründüyü kimi, Prezidentimiz Ermənistanın eks-prezidenti Serj Sarkisyana layiqli cavab verməklə yanaşı, həm də Ermənistanın daxilindəki siyasi vəziyyəti çılpaqlığı ilə təqdim edib. Bildirib ki, erməni xalqı bu müharibəni uduzanı yox, onu alovlandıranları qəbul etmir. Bir sözlə, revanşizmə “yox” deyir.
Politoloq Əhəd Məmmədli “Bakı-Xəbər”ə açıqlamasında bildirdi ki, Ermənistandakı vəziyyətin təhlili bunu deməyə əsas verir ki, həmin ölkənin vətəndaşları doğrudan da müharibə istəmir: “Onları son 30 il ərzində əldə olunan “uğurları” ilə aldatdılar. Bir erməni məğlubedilməzliyi mifi yaratmışdılar. Əldə etdikləri müvəqqəti qələbəni öz adlarına yazmaq istəyirdilər. Halbuki, həmin qələbənin əldə olunmasında onların rolu çox az oldu. Təbii şərait və Rusiyanın dəstəyi ilə torpaqlarımızı işğal etdilər. Bu müharibə isə göstərdi ki, vəziyyət heç də onların düşündüyü səviyyədə deyil. Müharibəni biabırçı şəkildə uduzdular. Hətta fərarilik etdiklərini belə rəsmən boyunlarına aldılar. Məğlubiyyətdən sonra adətən həmin hakimiyyəti xalq devirməliydi. Çünki kütləvi şəkildə insan ölümü vardı. Ancaq nəyin şahidi olduq? Xalq yenə məğlub iqtidara səs verdi. Çünki müharibə dalğasında hakimiyyətə gələn “Qarabağ klanı” Ermənistanı rəzil günə qoyub. Bunu anlayırlar. Erməni xalqı seçimi belə etdi ki, hətta ən pis iqtidara belə səs verərik, təki revanşistlər olmasın. Çünki müharibə onlar üçün həm hakimiyyətə gəlmə, həm pul qazanmaq, həm də hakimiyyətdə qalmaq vasitəsidir. Bunu sadə ermənilər anlayır. Onlar barış və sülh istəyirlər. Serj Sarkisyan kimilərə artıq cəmiyyətdə yer yoxdur. Hər hansı vasitələrlə vətəndaşları təəccübləndirə bilmirlər. Köhnə nağıllara artıq inanan yoxdur. İlham Əliyev Ermənistanın daxilindəki siyasi vəziyyəti dəqiq təsbit edib. Yaxşı olardı ki, istifadə müddətləri başa çatan Serj Sarkisyan, Robert Köçəryan birdəfəlik siyasi arenanı tərk etsinlər. Onlar yenidən müharibə təbliğatı ilə hakimiyyətə qayıtmaq istəyirlər, ancaq vəziyyətin başqa cür olduğunu görürlər. Bu səbəbdən də, siyasi demoqoqiyaya üstünlük verirlər”.
Məhəmmədəli QƏRİBLİ
