Mətbuatda paytaxtda fəaliyyət göstərən Hüseyniyyə məscidinin bağlandığı haqda məlumat yayılıb. Daxili İşlər Nazirliyinin Mətbuat xidmətinin rəhbəri, polis polkovniki Ehsan Zahidov “Trend”ə açıqlamasında bildirib ki, təhlillər nəticəsində müəyyən edilib ki, şəhərin bir neçə yerində son günlər COVID-19 virusuna yoluxanların sayı artıb:
“Həmin yerlərdən də birinin Hüseyniyyə məscidi olduğu məlum olub. Buna görə də həmin yerlər, o cümlədən də məscidin fəaliyyəti dayandırılıb. Hazırda orada epidemioloji xidmət tərəfindən müvafiq tədbirlər görülür”.
Qeyd edək ki, Hüseyniyyə məscidi İran İslam Respublikasının ali dini rəhbəri ayətullah Seyid Əli Xamneyinin Azərbaycandakı nümayəndəsi Ocaq Necatinin ofisi kimi fəaliyyət göstərirdi.
Ekpertlər hesab edir ki, bu şəraitdə Hüseyniyyənin bağlanması tamamilə məqsəduyğun olub.
“Gövhərağa” məscidini ermənilər təhqir edəndə niyə bir dəfə Hüseyniyyə məscidindən Ermənistana qarşı sərt bəyanat səslənmədi, niyə Ocaq Necatinin ofisi onlara etiraz ünvanlamadı?”
“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, bu məscidin bağlanması lazım idi və bu addımın atılmasında heç bir qanunsuzluq yoxdur: “Azərbaycan vətəndaşlarının həyat və sağlamlıqları daha mühüm əhəmiyyət kəsb edir. Doğrudan da indiki şəraitdə Hüseyniyyə məscidinin bağlanması tamamilə məqsədəuyğundur. Çünki dünyanı çənginə alan COVID-19, bu gözəgörünməz düşmən böyük fəlakətlər törədir. Bu məsciddə insanların kütləvi şəkildə namaza durması, sitayişi, səcdəyə qapanması COVİD-19-un əhatə dairəsinin genişlənməsinə münbit şərait yaradıb. Azərbaycan DİN-in sırf Azərbaycan vətəndaşlarının sağlamlığı məqsədilə atdığı addım düzgündür. Bu məscidin bağlanması haqda kim nə düşünürsə düşünsün, qoy İran səfirliyi, diplomatik nümayəndələri bunu başqa yöndə bəzəsin, amma burada sağlamlıq və insanların həyatının qorunması faktoru var ki, bu əsasdır”.
Ş.Əliyev hesab edir ki, İranın Azərbaycana qarşı son zamanlar tutduğu mövqe qəti şəkildə qəbuledilməzdir. Dinimiz, kitabımız, peyğəmbərimiz, imamlarımız eyni olsa da, İran tərəfi bizim məscidləri təhqir edən, donuzxanaya çevirən Ermənistana qarşı sərt mövqe nümayiş etdirmədi, əksinə, onunla daha da yaxınlaşdı. “Qarabağda ermənilər Allahın evinə, məscidlərə həqarət edəndə, məscidlərimizə donuz bağlayanda İranın səsi çıxmırdı. Şuşadakı “Gövhərağa” məscidini ermənilər təhqir edəndə niyə bir dəfə Hüseyniyyə məscidindən Ermənistana qarşı sərt bəyanat səslənməsdi, niyə Ocaq Necatinin ofisi onlara etiraz ünvanlanmadı? Uzun illər Qarabağla yanaşı orada yerləşən Allah evləri, məscidlər də işğal altında oldu, amma İranın səsi çıxmadı. Ermənilər bizim məscidlərimizdə donuz saxladılar, ibadət yerlərimizi murdarladılar, bu, peyğəmbərimizə, imamlarımıza, bütövlükdə bütün islam dünyasına həqarət idi. Ən böyük həqarət, hədsiz hörmətsizlik idi. Ermənistan bizim torpaqları işğalda saxladığı dövrlərdə İran ordan öz şəxsi maraqları üçün istifadə edirdi... Belə faktlar çoxdur. İranın bizə qarşı yürütdüyü xoşagəlməz siyasət bir islam dövlətinə qətiyyən yaraşmır.
İndi virus ocağına çevrilən Hüseyniyyə məscidinin bağlanması doğrudur” - deyə Ş.Əliyev qeyd etdi.
İradə SARIYEVA
