“Bu da qədim alban kilsəsidir. Görün, ermənilər bu kilsəni nə günə salıblar. Sonra da deyəcəklər ki, guya bu, erməni kilsəsidir. Erməni kilsəsi olsaydı, bu günə salardılar?! Tarixi abidə kimi qorunacaq. Azərbaycanda bütün dini abidələr dövlət tərəfindən qorunur. Bütün dini konfessiyaların abidələri bundan sonra da qorunacaqdır. Biz bu qədim alban kilsəsini də bərpa edəcəyik. Ermənilər 30 il ərzində bu bölgəni ancaq dağıdıblar...” Bunu Prezident İlham Əliyev Talış kəndində ermənilər tərəfindən dağıdılmış alban-udi kilsəsində olarkən bildirib.
Prezident deyib: “...Ancaq saxtakarlıq. Bütün dünya da görsün ki, ermənilər alban kilsəsini nə günə qoyublar...”
Daha sonra kənddəki rus-pravoslav kilsəsində olan Prezident İlham Əliyev deyib: “Bu da Talış kəndində yerləşən rus-pravoslav kilsəsidir. Bunu da ermənilər dağıdıblar. Görün nə gündədir, daşları da söküblər, divarları da söküblər. İndiki vəziyyəti bax, budur. Biz bu kilsəni də bərpa edəcəyik, təmir edəcəyik. Ermənilərdən fərqli olaraq, biz bütün dini abidələrə hörmətlə yanaşırıq...”
“Ermənilər “biz xristianıq” deyirlər, amma həm alban məbədini, həm də rus-pravoslav kilsəsini dağıdıblar, bu cinayətə, vəhşiliyə gərək xristian dünyası laqeyd yanaşmasın”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin kiçik elmi işçisi, ermənişünas Aynur Əzimzadə bizimlə söhbətində bildirdi ki, ermənilər Qarabağdakı alban irsinə sözün həqiqi mənasında divan tutublar. A.Əzimzadənin sözlərinə görə, Azərbaycan Prezidentinin Talış kəndindəki alban-udi və rus-pravoslav kilsələrində olması, ermənilərin törətdiyi vəhşilikləri bu kilsələrdən bütün dünyaya bəyan etməsi Ermənistanın ifşa edilməsində mühüm rol oynayacaq: “Cənab Prezident haqlı olaraq dünyaya bəyan etdi ki, bu kilsə erməni kilsəsi olsaydı ermənilər buranı dağıtmazdı. Ermənilər saxtalaşdıra bilmədiklərini dağıdıblar. Talış kəndindəki alban-udi kiləsəsini də saxtalaşdıra, erməniləşdirə bilmədikləri üçün acınacaqlı vəziyyətə salıblar, viran qoyublar. Ermənilərin alban-udi kilsəsinə qarşı törətdiyi vəhşiliklər bir daha təsdiqləyir ki, onlar nəinki müsəlman dini abidələrinə, eləcə də xristian dini abidələrinə qarşı düşməncəsinə münasibət bəsləyirlər. İki əsrə yaxındır alban irsini mənimsəyən ermənilər hələ də alban kilsələrini tam olaraq erməniləşdirməyə nail ola bilməyiblər, ona görə də bu kilsələri dağıdıblar, viran qoyublar. Ermənilərin alban-udi kilsələrinə qansız münasibətini dünya görüb qiymət verməlidir. Xristian dünyası ermənilərin alban kilsəsinə qarşı törətdiyi vəhşiliklərə susmamalıdır. Təsəvvür edin ki, ermənilər “biz xristianıq” deyirlər, amma həm alban məbədini, həm də rus-pravoslav kilsəsini dağıdıblar, bu cinayətə, vəhşiliyə gərək xristian dünyası laqeyd yanaşmasın. Bilirsiz ki, Ermənistanda bütün alban məbədləri dağıdılıb, rus pravoslav kilsəsi də viran qoyulub, məhv edilib. Bu da dünyanın gözü qarşısında baş verib”.
Beynəlxalq missiyanın gəlib ermənilərin bu cinayətlərini araşdırmalı olduğunu deyən A.Əzimzadənin sözlərinə görə, gec-tez Ermənistan bu cinayətin cəzasını çəkəcək. Azərbaycan dövləti tərəfindən hər iki xristian məbədinin əsaslı şəkildə bərpa ediləcəyini deyən ekspert bildirdi ki, bizim ölkəmizdə bütün dinlərə nümunəvi hörmət var.
İradə SARIYEVA
