İran Ermənistanın Zəngəzur bölgəsindən (Sünik) Gorus-Qafan yoluna alternativ yolun çəkilişində iştirak edəcək. Bu barədə erməni mediası məlumat yayıb.
Qeyd olunub ki, İranın yollar və şəhərsalma nazirinin müavini və Nəqliyyat İnfrastrukturunun Tikintisi və İnkişafı Təşkilatının baş direktoru Xeyrullah Hatəminin başçılıq etdiyi nümayəndə heyəti Tehranın Ermənistanda (Tatev yolu ilə) tranzit yolunun tikintisində iştirakını müzakirə etmək üçün artıq İrəvandadır.
Ermənistan-İran Əməkdaşlıq İnkişaf Fondunun təsisçisi Puia Hüseyni utanmadan deyib ki, guya Bakının İranı Şimal-Cənub tranzit layihəsindən təcrid etmək üçün xəyalları var: “İranın Avropa və Rusiyaya gedən tranzit yolunu, İranın iqtisadi əlaqələrini bağlaya və xarici ticarətə mane ola biləcəyini düşünür. Tatev yolunun sonuna 15 km qalır. Bu o deməkdir ki, İran Azərbaycandan yan keçərək Ermənistan vasitəsilə Rusiya və Avropa ilə əlaqə saxlaya biləcək”.
Maraqlıdır, İran rəsmiləri Gorus-Qafan yoluna alternativ olan Tatev yolunun çəkilməsi ilə bağlı niyə belə dəridən-qabıqdan çıxırlar?
“Fars rejimi Azərbaycana hər zaman düşmən kimi baxıb”
Məsələyə münasibət bildirən AMİP sədri Arzuxan Əlizadənin fikrincə, bütün bunlar rəsmi Tehranın aşırı Ermənistan sevgisindən irəli gəlir: “Prinsipcə, təəccüblü deyil. Ona görə ki, 30 ildir İran Ermənistanı müxtəlif formada himayə edir. Çünki fars rejimi Azərbaycana hər zaman düşmən kimi baxıb. Ermənistanın birinci prezidenti Levon Ter-Petrosyan dəfələrlə müsahibələrində qeyd edib ki, 90-cı illərdə İran Ermənistan üçün nəfəslik rolunu oynayıb. Məhz bunun nəticəsi idi ki, Ermənistan Azərbaycan ərazilərini işğal etdi və bu, 30 il davam etdi. O zaman İran Ermənistanı himayə etməsəydi, bütün bunlar baş verməzdi. Ona görə də İranın yollar və şəhərsalma nazirinin müavini və Nəqliyyat İnfrastrukturunun Tikintisi və İnkişafı Təşkilatının baş direktoru Xeyrullah Hatəminin başçılıq etdiyi nümayəndə heyəti Tatev yolundan ötrü İrəvana gedib. Deməyim odur ki, bütün bunlar İranın Ermənistanı himayə etməsinin məntiqi davamıdır. Məqsəd odur ki, istədikləri yükü İrandan Ermənistana daşısınlar. Çünki Gorus-Qafan yolunun 21 kilometrinin bizim nəzarətimizdə olması İrana bu fürsəti vermir. Görünür, İran Ermənistana silah daşımaq üçün belə tələsir. Yəni onlardan nə desən gözləmək olar”.
Partiya sədri hesab edir ki, İran məqsədyönlü şəkildə bütün bunları edir.
