Ermənistanın ikinci prezidenti, hərbi cinayətkar Robert Köçəryan keçirdiyi mətbuat konfransında, həmişə olduğu kimi, yenə də baş nazir Nikol Paşinyanı ittiham edib. O qeyd edib ki, Paşinyan müharibənin başlaması üçün hərtərəfli zəmin yaradıb.
Köçəryan ölkəsinin artıq danışıqların subyekti olmamasından gileylənib. Bununla belə, Köçəryan etiraf edib ki, heç bir dövlət müharibəni başladığı üçün Azərbaycanı ittiham etmədi: “Bu bir faktdır. Erməni tərəfi ziddiyyətli bəyanatları ilə danışıqları dayandırdı - biz üç il ərzində üç fərqli bəyanata riayət edərək ATƏT-in Minsk Qrupunun Ermənistana etimadsızlığına səbəb olduq. Çevik olmaqla, əsaslı danışıqlar prosesindən yayınmağa çalışdığımız barədə fikir formalaşdı. Ordunu müxtəlif cinayət işləri ilə gözdən saldılar, cəmiyyəti qaranlığa və işığa böldülər. Rusiya və KTMT ilə münasibətləri korladıq. Birlik olaraq bütün bunlara qatılmayacağı aydın idi. Azərbaycan bütün bunları çox yaxından izləyirdi. Bilirdilər ki, bundan daha əlverişli şərtlər olmayacaq. Müharibənin nəticələri ilə bağlı risqlərin onlar üçün minimal olduğunu düşündülər. Məhz bu səhvlər üzündən özümüzü təcrid vəziyyətində gördük. Heç bir ölkə Azərbaycanı müharibəyə başladığına görə qınamayıb. Müdafiə nazirinin səsləndirdiyi tezis - “yeni müharibə - yeni ərazilər” Azərbaycana alternativ qoymadı”.
Yeri gəlmişkən onu da qeyd edək ki, Köçəryandan əvvəl Prezident İlham Əliyev müsahibələrində müharibəyə görə heç bir dövlətin Azərbaycanı qınamadığını qeyd edib. Ona görə ki, biz öz torpağımızda vuruşurduq, beynəlxalq hüquq bizim tərəfimizdə idi.
“Xüsusən Türkiyə ilə olan strateji müttəfiqlik münasibətlərimiz bizi xarici təzyiqlgrdən qorudu”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Azərbaycana müharibə dövründə təzyiqin olmaması təsadüfi deyildi: “Məsələ ondadır ki, Azərbaycanın son 15 il ərzində apardığı uğurlu xarici siyasət sayəsində bu cür uğurlu zəmin formalaşdı. Azərbaycanla münasibətlərin yaxınlığını nəzərə alan bir sıra dövlətlər müharibə zamanı neytral qaldılar. Xüsusən də Türkiyə ilə olan strateji müttəfiqlik münasibətlərimiz bizi xarici təzyiqlərdən qorudu. Eyni zamanda, bu amil bəzi dövlətlərin təzyiq cəhdlərini neytrallaşdırdı. Həmçinin, Azərbaycan BMT Təhlükəsizlik Şurasının və digər qurumların qətnamənələrindən çıxış edərək öz ərazi bütövlüyünü təmin edirdi. Beynəlxalq hüquq bizim tərəfimizdə idi. Ərazi bütövlüyümüz bütün ölkələr tərəfindən dəstəklənirdi. Başqa bir tərəfdən, Ermənistanın strateji müttəfiqi Rusiya neytral qaldı. Çünki geostrateji çağırışlar fonunda Rusiya buna məcbur qaldı. Türkiyə artıq regional güc müstəvisindən beynəlxalq proseslərə yön verəcək ölkə statusu alıb. Rusiya Türkiyənin Cənubi Qafqazda rolunu nəzərə alır. Üstəlik, Azərbaycanı Pakistan, İsrail kimi ölkələr dəstəkləyir. Eyni zamanda ABŞ-da seçki prosesi gedirdi. Həmin vaxt ABŞ-da Respublikaçılar Partiyasının hakimiyyətdə olması bizim xeyrimizə oldu. Nəzərə almaq lazımdır ki, Demokratlar Partiyası ilə müqayisədə Respublikaçılar erməni lobbisinin təsiri altında deyil”.
Politoloq onu da qeyd etdi ki, bütün bunlar nəticə etibari ilə Azərbaycanın xeyrinə işlədi.
Vidadi ORDAHALLI
