“Bu cinayətin şəriki ATƏT-in Demokratik Təsisatlar və İnsan Haqları Bürosudur”. Bu barədə Prezident İlham Əliyev Suqovuşan qəsəbəsində çıxış edərkən bildirib.
Ölkə başçısının sözlərinə görə, 2018-ci ildə Serj Sarkisyan seçkilərdə saxtakarlıq edəndə ATƏT buna göz yumdu: “Ona ən yaxşı cəzanı da erməni xalqı verib, 2018-ci ildə bir təpiklə onu vəzifədən qovub. 2018-ci ildə seçkilərdə növbəti saxtakarlıq törədərək özünə 50 faizdən çox səs yazdırıb. Bu cinayətin şəriki ATƏT-in Demokratik Təsisatlar və İnsan Haqları Bürosudur. Çünki onlar Serjiklə əlbir olaraq, - bilmirəm, sövdələşmə nəyin əsasında olub, amma təxmin edə bilərəm, - onun qələbəsini tanıyıblar. Bu adamı Ermənistanda kütləvi surətdə lağa qoyurlar, ələ salırlar, ona nifrət edirlər. O, seçkilərdə özünə 50 faizdən çox səs yazdırır, özünü baş nazir təyin etdirir və ATƏT də buna göz yumur, buna razılıq verir. Bax, iki saxtakar - biri ATƏT-in Demokratik Təsisatlar və İnsan Haqları Bürosu, hansı ki, Azərbaycana hər zaman xor baxır, biri də Serjik. Nə oldu, sonra erməni xalqı qalxdı. Erməni xalqı qalxıb bir təpiklə onu vurub atdı çölə”.
Məlum olur ki, demokratiyadan danışan ATƏT-in Demokratik Təsisatlar və İnsan Haqları Bürosu Ermənistanda həyata keçirilən seçki saxtakarlığına şərik olub. Bütün bunlar bir daha həmin qurumun iç üzünü ortaya qoyur.
“Bütün bunların fərqində olan DTİHB düşünülmüş şəkildə saxtakarllığa...”
Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin fikrincə, bütün bunlar ATƏT DTİHB-nin ikili standartlardan çıxış etməsinə əyani sübutdur: “Məsələ ondadır ki, Serj Sarkisyan 10 illik prezidentliyi dövründə Ermənistanda nüfuzunu tamamilə itirmişdi. Ümumilikdə, Ermənistanda 20 il hakimiyyətdə olan “Qarabağ klanı”na güclü nifrət var idi. Belə olan halda Sarkisyanın referendumdan sonra ədalətli seçki ilə baş nazir olması mümkün deyildi. Bunu yalnız səsvermənin nəticələrini total şəkildə saxtalaşdırmaqla edə bilərdi. O da bu saxtakarlığa gedərək, nəticələrin 50 faizini öz adına yazdırdı. Ancaq bu, erməni cəmiyyətində ona olan nifrəti son həddə çatdırdı. Xalq ayağa qalxaraq onu devirdi. Burada diqqəti çəkən məqam odur ki, Sarkisyanın nüfuzunun olmadığını bilə-bilə ATƏT-in Demokratik Təsisatlar və İnsan Haqları Bürosu saxtakarlıqlara ortaq olur. Halbuki, hər şey ortada idi. Biz bütün bunları nədən bilirik? O zaman mətbuatda Ermənistanda Sarkisyanın heç bir nüfuzunun qalmadığı açıq şəkildə yazılırdı. 2018-ci ildə ona qarşı çox böyük antipatiya var idi. Ona görə də onun ciddi sayda səs toplaması mümkün deyildi. Bütün bunların fərqində olan DTİHB düşünülmüş şəkildə saxtakarllığa göz yumdu. Bəlli oldu ki, qurumun demokratik seçki barədə dedikləri sadəcə nağıl imiş. Bu qurum bəlli mərkəzlərin siyasi sifarişlərini yerinə yetirir. Çünki sözügedən təşkilat Azərbaycanda keçirilən bütün seçkilərə istisnasız olaraq mənfi rəy verib. Ancaq hər zaman Ermənistandakı seçkilərə bu və ya digər formada demokratik don geyindirirdi. Bütün bunlar bir daha ATƏT DTİHB-nin iç üzünü ortaya qoyur”.
Ekspert onu da qeyd etdi ki, sadalanan saxtakarlıqlarla əlaqədar olaraq ATƏT DTİHB beynəlxalq arenada tamamilə nüfuzunu itirib.
Vidadi ORDAHALLI
