Rusiyanın Azərbaycana silah satışı məsələsi daha çox mənəvi müstəvidədir. Bunu Ermənistanın ikinci prezidenti Robert Köçəryan oktyabrın 4-də keçirdiyi mətbuat konfransında bildirib.
"Silah bazarı elədir ki, pulunuz varsa və onu silah almağa xərcləməyə hazırsınızsa, tapacaqsınız. Bu biznesdir. Rusiya silahı olmasa da başqası olacaq. Müharibə zamanı Azərbaycanın qeyri-rus silahlarından olduqca uğurlu istifadə etdiyini gördünüz. Yüksək dəqiqlikli raketlər Rusiyanın deyildi. Buna görə də bu sual ölümcül deyil. Əksinə, mənəvi müstəvidədir. Rusiyanın Azərbaycana silah satmasının bölgədəki qüvvələr balansını dəyişəcəyini düşünmürəm. Mənəvi müstəvidə, əlbəttə ki, hər şey pis səslənir. Ancaq Rusiyanın vəziyyəti yumşaltmaq üçün bir yol tapacağı təəssüratına sahibəm" deyən Köçəryan, variant kimi, Ermənistanla tarazlığı qorumaq imkanına işarə vurub. Faktiki olaraq, Köçəryan Rusiyanı ifşa edir. Həmin ölkənin silahlarının yararsız olduğunu açıq bəyan edir. Ancaq diqqət çəkən məqamlardan biri də budur ki, Köçəryan Rusiyanın bir nömrəli adamı və Putinin yaxın dostu kimi xarakterizə olunur. O halda eks-prezidentin bu rakursdan çıxışını necə dəyərləndirmək olar?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistanın sabiq prezidenti Robert Köçəryanın mətbuat konfransında verdiyi açıqlamalardakı bu məqam olduqca maraqlıdır: “Xüsusilə də Rusiya silahlarının keyfiyyətinə dair səsləndirdiyi fikirlərdə kobud təzad var. Bunu bir neçə istiqamətdən sezmək olar. Məsələn, Köçəryan Rusiya silahlarının keyfiyyətsiz olduğunu söyləyir. Yəni demək istəyir ki, Rusiya olmasa belə, Ermənistan silahlana bilər. Ancaq maraqlıdır ki, Ermənistanın məhz Rusiyadan silah almasının ən aktiv fazası Robert Köçəryanın prezidentliyi dönəminə təsadüf edib. Bu, təzadın birinci aspekti. Belə çıxır ki, ya Rusiyanın təzyiqi ilə həmin silahları alıblar, ya da külli miqdarda dövlət büdcəsini talamaq məqsədilə buna gediblər. Hazırda rus silahının kefiyyətsilziyini söyləməsi və misal kimi Azərbaycanı göstərməsi bir qədər də öz günahlarını yumağa hesablanıb. Yəni məğlubiyyətdən tam pay götürmək istəməmək baxımından bu addımı atır. Köçəryan yenə də aktiv siyasətdədir. Ölkə başçısı olmağa can atır. Güman ki, bu üsullarla Rusiyadan daha güclü dəstək almaq istəyir. Köçəryan silahla ünsiyyəti olan adam olub. Birinci Qarabağ müharibəsində iştirak edib. Silahları yaxından tanıyan adamdır. Bu baxımdan, bir müharibə görən adam kimi bəzi həqiqətləri etiraf etməyə məcburdur. Tam səmimiyyətlə deməliyik ki, Rusiyanın istehsal etdiyi silahlar müasir dünyanın tələbləri ilə ayaqlaşmır. Ən azı, Rusiyanın xaricə satdığı silahlar daha aşağı keyfiyyətli olur. Ermənistana isə, ümumiyyətlə, tam yararsızlarını göndərirlər. Bununla Köçəryan həm də Rusiyanı onlara daha müasir silahları verməyə təhrik edir. Yəni demək istəyir ki, Azərbaycanın pulu var, bizim yoxdur. Ona görə də biz müasir silahlanmada onlara uduzuruq. İstənilən halda, Ermənistanın bizim silah arsenalımızla rəqabət apara bilməsi qeyri-mümkündür”.
Məhəmmədəli QƏRİBLİ
