Son günlərə qədər İranın Azərbaycana qarşı xoşagəlməz, mənfi davranışları əsassız ərazi iddialarına, cəmiyyətimizi qarışdırmağa yönəlirdisə, daha çox bu səpkidə olurdusa, indi “qardaş ölkə” daha iyrənc bir yol tutub. Azərbaycana qarşı həyata keçirdikləri digər təxribatlar, qarışdırıcı hərəkətlər effekt vermədikdə, Azərbaycan cəmiyyətində heç bir xaos yaratmadıqda fars-molla rejimi hiylə niqabını üzündən götürüb əsl simasını ortaya qoydu.
İran marazmın son həddini sərgilədi. Belə ki, “Teleqram” seqmentində İran XİN-in rəsmi Instagram səhifəsində paylaşdığı bir fotoşop təqdim edilib. Bu fotoşop bu ölkənin, onun dini liderinin mahiyyətini tam olaraq ortaya qoyub. İran XİN-in paylaşdığı postda Xamneyi Azərbaycan və Türkiyə liderlərindən “yuxarıda” göstərilir və eynəyini qaldıraraq “aşağı” baxır, guya İran bununla öz baş mollasının iki əzəmətli türk liderindən “üstün” olduğunu iddia edir. Azərbaycan Prezidenti İlham Əliyevin və Türkiyə Prezinti Rəcəb Tayyib Ərdoğanın nəinki regionda, eləcə də bütün dünyada sayılıb-seçilən, hesablaşılan dövlət başçıları olması İranın qarnına qara sancı doldurub. İran XİN-in instaqram səhifəsində yayılan üzdəniraq post azmış kimi, İranın rəsmi mediası da Azərbaycan Prezidentinə qarşı qarayaxma kampaniyası aparır. Bütün etik əndazələri, əxlaqi-mənəvi sərhədləri aşan İran mətbuatı hətta İlham Əliyevin karikatirasını da dərc edib. Fars-molla rejiminin göstərişi ilə rəsmi mətbuatının yol verdiyi bu tərbiyəsizliyə görə İran tərəfi Azərbaycan Prezidentindən və Azərbaycan xalqından rəsmən üzr istəməlidir.
Bu karikaturalar da “Teleqram”da yayılıb.
Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, Azərbaycanın və Türkiyənin bölgədə, eləcə də dünyada mövqeyinin güclənməsi İranın yuxusunu ərşə çəkib, bu üzdən də Azərbaycan və Türkiyə prezidentlərinə qarşı bu cür hədyanlar yağdırır, qeyri-etik davranış sərgiləyirlər. “Şübhəsiz ki, İran islam rejiminin artıq bu cür çirkinliklərə əl atması qəbuledilməzdir. Bütün bunlar İran İslam rejiminin sözün həqiqi mənasında öz mahiyyətini göstərdiyindən, ortaya qoyduğundan xəbər verir. Azərbaycan rəsmi olaraq, dünən olduğu kimi bu gün də, bütövlükdə, həmişə rəsmi Tehrana münasibətdə təmkinlə, səbrlə davranıb. Bir çox hallarda rəsmi Bakı rəsmi Tehranın Azərbaycana qarşı törətdiyi təxribatlara dözümlü yanaşıb. Amma ötən il qələbə ilə başa çatan 44 günlük müharibədən, Qarabağ zəfərindən sonra İranın iç üzü tamamilə üzə çıxdı, ifşa olundu. Rəsmi Tehran, Birinci Qarabağ savaşında olduğu kimi, İkinci Qarabağ savaşında da açıq-açığına Ermənistana və indi məhv olan qondarma “DQR”in tör-töküntülərinə bu və digər mənada yardımlar etdi. Bu artıq bir reallıqdır. Hətta Qarabağ zəfərindən sonra İranın Xankəndiyə göndərdiyi TIR-lar Azərbaycanın səbrini daşırdı. Guya İranın da bu TIR-lardan xəbəri yox imiş. Ona görə də Azərbaycanın işğaldan azad etdiyi 130 kilometr sərhəd boyu ərazidə bir çox işlər görməsi, iqtisadi zona yaratması, hərbi təlimlər keçirməsi suveren və beynəlxalq hüququdur. Amma rəsmi Tehran bunu başqa yerlərə yozmağa çalışır, guya Azərbaycanın hansısa dövlətin “oyuncağı olması” iddiasını irəli sürür. Azərbaycan Prezidenti İlham Əliyevin də qeyd etdiyi kimi, bu cür açıqlamalar əslində rəsmi Tehranın iç üzünü bir daha göstərdi, şübhəsiz ki, bu, Azərbaycanın suverenliyinə təhddiddir. Bundan əlavə, İranın rəsmi mətbuatının, bütövlükdə bu ölkənin mediasının bütün əxlaq sınırlarını aşması və Azərbaycan Prezidenti Əliyevi və Türkiyə Prezidenti Ərdoğanı hədəfə alması, karikaturalar dərc etməsi, hədyanlarını davam etdirməsi, əlbəttə, qəbuledilməzdir. İran XİN-in rəsmi instaqram səhifəsiundə yayılan çirkin post da bu ölkənin çirkin niyyətlərini ortaya qoyur. Biz bütün ümumilli məsələlərdə prinsipial olmalıyıq. Bildiyiniz kimi, mən də Bütöv Azərbaycan Ocaqlarının Türk dünyası ilə əlaqələr üzrə başqan müaviniyəm. Biz Bütöv Azərbaycan Ocaqları olaraq, ümummilli məsələlərdə həmişə dövlətimizin yanında olmuşuq. Azərbaycan Respublikasının başında dayanan şəxsə atılan iftira qəbuledilməzdir. Hər bir Azərbaycan vətəndaşı kimi bizlər də bunu qəbuledilməz hesab edirik. Bu anlamda da İran rejiminin Xarici İşlər Nazirliyi və media vasitəsilə atdığı son çirkin addımlar birmənalı şəkildə qəbuledilməzdir. Molla rejiminin bu hədyanlarına, həddini aşan davranışlarına qarşı Azərbaycanın güneyində artıq hərəkətlər başlayıb, bu rejimə sərt cavablar verilib, bundan sonra da veriləcək”.
İranın keçirdiyi hərbi təlimlərin uğursuz nəticələndiyini deyən F.Ələkbərli hesab edir ki, molla rejimi bu uğursuzluqdan da qəzəblidir. Onun sözlərinə görə, eyni zamanda Azərbaycan, Türkiyə və Pakistanın keçirdiyi birgə hərbi təlimlər, o cümlədən Azərbaycan-İsrail münasibətlərinin çox yüksək səviyyədə olması molla rejimini çox ciddi şəkildə narahat edir. “İran təcrid olunmuş formadadır, bütün bunların da günahkarı özüdür. Dünənə qədər İranı müdafiə edən, yaxud bu kimi məsələlərdə neytral mövqe tutan Azərbaycan və Türkiyə kimi dövlətlər rəsmi Tehranı artıq müdafiə etməyəcək. Bu onlar üçün artıq çox ciddi məsələdir. Eyni zamanda, Azərbaycanın güneyindəki milli hərəkat da rejimi cavabsız qoymayacaq. Azərbaycanın dəmir yumruğu Ermənistanın və qondarma rejimin başını əzdiyi kimi, Təbrizin dəmir yumruğu da molla rejiminin başının üzərində dayanacaq. Molla rejimi Təbrizin yumruğunu bir daha hiss etmək ərəfəsindədir...”-deyə F.Ələkbərli qeyd etdi.
İradə SARIYEVA
