Məlum olduğu kimi, İranda Azərbaycana yönəlik əsassız qaralama kampaniyası davam edir. Bir müddət əvvəl İrandan Qarabağa qanunsuz yükdaşımaları inkar edən İran rəsmiləri, artıq bunu etiraf etməyə başlayıblar.
İranın xarici işlər naziri Hüseyn Əmir Abdollahiyanın yerli televiziyaya verdiyi müsahibədə bununla bağlı səsləndirdiyi fikirlər rəsmi etirafdır: “İranın Ermənistana və Dağlıq Qarabağa yanacaq tədarükünun Azərbaycan tərəfdən blokadası yolverilməzdi. Biz Azərbaycan Respublikasındakı vəziyyəti anlayırıq və xarici müdaxilələrdən, o cümlədən ölkədə sionistlərin və terrorçuların olmasından xəbərdarıq. Gələcəkdə bunun Bakı üçün problemə çevriləcəyindən narahatıq”.
Bu, İran rəsmilərinin dilindən səslənən ilk etirafdır. Çünki əvvəl deyirdilər ki, Qarabağa gedən TIR-lardan xəbərimiz yoxdur, bu, özəl şirkətlərin işidir. Beləliklə, İranın xarici işlər naziri Tehranın Qarabağa yanacaq tədarük etdiyini rəsmən təsdiqlədi. Bununla İran açıq şəkildə göstərdi ki, Azərbaycanın ərazi bütövlüyü və suverenliyinin tanınması ilə bağlı bəyanatlar tam riyakarlıqdır.
Məsələyə münasibət bildirən Yeni Yol Partiyasının sədri Ramil Hüseynovun fikrincə, bütün bunlar bir növ rəsmi formada İranın əsl simasını ortaya qoydu: “Zatən bizim üçün burada təəccüblü bir şey yoxdur. Çünki İran onsuz da, nəinki Ermənistanla, Qarabağdakı separatçı rejimlə sıx təmasda idi. Müharibəyə qədər separatçılar vasitəsilə narkoticarət qurmuşdular. Çirkli pulların yuyulmasından tutmuş bütün qanunsuz işlərin içində idilər. Bunu işğal edilmiş ərazilər üzərindən həyata keçirmək İrana daha rahat idi. Niyə? Ona görə ki, nəzarətsiz ərazi idi. O zaman dəfələrlə Azərbaycan Qarabağ üzərindən narkoticarətin həyata keçirildiyini bəyan etdi. Təəssüflər olsun ki, beynəlxalq qurumlar bütün bunları görməzdən gəldi. İndi bir daha bəlli olur ki, İran separatçılarla uzun illər qurduğu işbirliyinə sadiqdir. Çünki biləvasitə İranın rəsmi siyasi iradəsinə uyğun olaraq Qarabağa TIR-lar vasitəsilə qanunsuz yüklər daşınırdı. İlk vaxtlar bunu nə qədər gizlətməyə çalışsalar da, mümkün olmadı. İranın xarici işlər nazirinin açıqlaması göstərdi ki, bu addımı atmaqla bilərəkdən Azərbaycanın suverenliyini pozublar. Yoxsa bunun başqa izahı yoxdur”.
Partiya sədri onu da qeyd etdi ki, İran Azərbaycanla bağlı öz mənfur niyyətlərinə çata bilməyəcək.
Vidadi ORDAHALLI
