“Hazırda biz Avropa İttifaqı ilə təmaslarımızı davam etdiririk və onlardan bizə iqtisadi dəstəklə əlaqədar təklif gözləyirik”. Bunu Prezident İlham Əliyev İspaniyanın EFE informasiya agentliyinə müsahibəsi zamanı deyib.
Dövlət başçısı bildirib: “Biz, həmçinin, Avropa İttifaqı ilə iqtisadi yardım məsələsi ətrafında müzakirələr aparırıq. Bizə məlumdur ki, Avropa İttifaqı Ermənistan üçün 2.6 milyard avro həcmində iqtisadi yardım paketinin hazırlanması prosesindədir. Bu proses artıq başa çatmış da ola bilər. Əlbəttə, bizim gözləntimiz ondan ibarətdir ki, həmin həcmdə məbləğ eyni şərtlərlə Azərbaycana da təklif edilsin. İstər qrant, istərsə də kredit – burada bərabərlik olmalıdır. Çünki işğaldan əziyyət çəkmiş olan ölkə bizik. Bizim 10 min kvadratkilometr sahəyə malik olan, tamamilə dağıdılmış ərazimiz, yüzlərlə şəhər və kəndimiz var. Bu səbəbdən biz, əlbəttə ki, həmin iqtisadi yardım paketinin qeyri-balanslı olmasına dair öz narahatlığımızı ifadə etdik. Hazırda biz Avropa İttifaqı ilə təmaslarımızı davam etdiririk və onlardan bizə iqtisadi dəstəklə əlaqədar təklif gözləyirik. Avropa İttifaqı çox iş görə bilər. Biz bu imkanlardan istifadə etməyə hazırıq və Avropa İttifaqına dürüst vasitəçi kimi etibar edirik”.
Avropa İttifaqı niyə də bizə 2.6 milyard yardım etməsin ki?
“...Azərbaycana daha artığını ayırmalıdır”
Siyasi ekspert Rövşən Rəsulov “Bakı-Xəbər”ə şərhində bildirdi ki, Avropa İttifaqı təcavüzkara yox, təcavüzə məruz qalan ölkəyə hərtərəfli dəstək göstərməlidir. “Təəssüf ki, biz zaman-zaman beynəlxalq təşkilatlar tərəfindən ölkəmizə qarşı qeyri-bərabər münasibətləri müşahidə etmişik. Daha izahlı şəkildə desək, sosial-iqtisadi, yaxud qrant yardımları məsələsində Azərbaycana ayrılan vəsaitlər Ermənistanla müqayisədə daha az olub. İstər ABŞ-ın müvafiq qurum və təşkilatları olsun, istərsə də Avropa təsisatları - onlar hər dəfə yardım məsələlərində nəinki Ermənistana, eləcə də separatçı “DQR” rejiminə İrəvan üzərindən maliyyə vəsaitləri ötürərüblər. Təkcə bu faktın özü qəbul olunmuş beynəlxalq hüquq və prinsiplərin pozulması anlamını daşımaqdadır. Nədənsə, Azərbaycan hakimiyyəti bu qanunsuzluqlarla bağlı səsini qaldırarkən bəlli dairələr sadəcə onu susqunluqla qarşılayıb, uzağı isə maliyyə vəsaitlərinin “humanitar məqsədli” olduğunu bəyan ediblər”. R.Rəsulovun sözlərinə görə, təbii ki, həmin vaxtda tərəflərin səmimiyyətinə inanmaq sadəlövhlük olardı. “Lap açığını desək, ortada müsəlman Azərbaycana qarşı “xristian klubu” maraqlarının mövcud olması faktı heç də gizlin görünmürdü. Təsəvvürünüzə gətirin, işğala məruz qalan Azərbaycana ödənilən vəsaitlər işğalçı Ermənistana ödənilən vəsaitlərdən kifayət qədər azlıq təşkil edirdi, üstəlik, separatçı rejimə də qrant layihələrindən udulan pullar ayrılırdı. Təbii ki, bu kimi hallar ədalətsizlik kimi qiymətləndirilməliydi.
Bəli, bu gün Azərbaycan öz torpaqlarını işğaldan azad edib və əslinə qalanda, Avropa təsisatlarından olan təmsilçilər 30 il boyunca çapılıb-talanmış, dağıdılaraq məhv edilmiş torpaqlarımıza səfər etdikləri vaxt bu gerçəklikləri öz gözləri ilə görürlər. Ona görə Avropa İttifaqı işğalçılıq siyasəti yürütmüş Ermənistana 2,6 milyard vəsait ayıracaqsa, düşünürəm ki, Azərbaycana daha artığını ayırmalıdır – torpaqların dirçəldilməsi, inşası, qaçqın və məcburi köçkünlərimizin sosial vəziyyətlərinin yaxşılaşdırılması, eləcə də öz yurd-yuvalarına geri qaytarılması üçün. Ən azından isə, bu rəqəm paralellik, eynilik təşkil etməlidir. Bu da olmazsa, onda Azərbaycanın həmin təşkilata qarşı irad və tənqidlər səsləndirməsi ən optimal seçim kimi qiymətləndirilə bilər.
Bu gün Azərbaycan azad edilmiş torpaqlarımızda inşaat və bərpa işlərinin böyük həcmini özü həyata keçirir. Təbii ki, bu məsələdə bizə dost olan ölkələr də iştirak edir, amma hər necə olursa-olsun, bu bizim problemimizdir və bu problemi bizə yaradanlar da var. Qarşıdakı illərdə ölkəmizə işğal müddətində dəymiş ziyanların ödənilməsi faktorunu da unutmamalıyıq və Ermənistan öz əməllərinə görə hüquqi cavab da verməlidir.
Lakin bütün bunlara qədər bilməliyik ki, vaxt dayanmır və sürətlə ötür, bu vaxtdan səmərəli qaydada istifadə etmək, sürətli prosesləri daha da sürətləndirmək vacibdir. Ümid edək ki, Avropa İttifaqı bu dəfə ikili standartlar siyasətini bir kənara qoyub, reallıqda ölçülərini götürəcək və maliyyə yardımı məsələsində əvvəlki yanlış qərarlarını verməyəcək. Əks halda, belə də davam edərsə, Azərbaycan öz iqtisadi potensialına və xüsusilə dost, qardaş ölkələrin dəstəyinə güvənərək haqsız bölgülərə qarşı etirazını bildirə, vəsaitlərdən də imtina edə bilər”.
Siyasi ekspert sonda bildirdi ki, ancaq gəlin indidən pessimist düşüncələrə qapılmayaq və hadisələrin axarını, nəticəsini gözləyək.
İradə SARIYEVA
