“Ermənistanın raket zərbələri nəticəsində Gəncədə, Bərdədə və digər şəhər və kəndlərimizdə törətdiyi terror aktlarına, faciəyə hələ də hüquqi qiymət verilməyib”. Bunu jurnalistlərə açıqlamasında Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sədr müavini, Prezident Administrasiyasının məsul əməkdaşı Vüsal Quliyev bildirib.
V.Quliyev deyib ki, vətəndaş cəmiyyəti institutları bu istiqamətdə fəal olmalıdır: “Bu gün QHT nümayəndələrinin Gəncəyə səfərində də məqsəd budur ki, bu terror aktını, faciəni bir daha gözləri ilə görməklə əlaqədə olduqları xarici QHT-lərə, beynəlxalq təşkilatlara müraciət etsinlər. Bu səfərdə 100-ə yaxın QHT nümayəndəsi iştirak edir. Onların əksəriyyəti insan hüquqları, qadın və uşaq hüquqları sahəsində fəaliyyət göstərən QHT-lərdir. Bu QHT-lər adından müraciət də qəbul olunacaq. Müraciətdə Azərbaycan QHT-ləri beynəlxalq ictimaiyyətin diqqətini Ermənistanın siyasi və hərbi rəhbərliyinin 1 il öncə insanlıq əleyhinə törətdiyi cinayətlərə cəlb edəcək və beynəlxalq humanitar hüququn, xüsusilə 1949-cu ildə qəbul edilmiş Cenevrə Konvensiyasının Ermənistan tərəfindən kobud şəkildə pozulduğunu bildirəcək. Azərbaycanda fəaliyyət göstərən QHT-lər adından dünyada fəaliyyət göstərən hüquq müdafiə təşkilatlarına, QHT-lərə, media təmsilçilərinə, parlament üzvlərinə və hökumətlərə müraciət ediləcək, onlar Ermənistanın Azərbaycanın mülki əhalisinə qarşı törədiyi hərbi cinayətlərə etiraz etməyə və bu cinayət əməllərini qəti şəkildə pisləməyə çağırılacaq”.
Ermənilərin dinc əhaliyə qarşı hücumu ilə bağlı beynəlxalq təşkilatlara müraciət edilməsi və həmin qurumların da məlum məsələyə düzgün qərar verməsi gözlənilir.
“Ermənistanın raket zərbələri nəticəsində törətdiyi terror aktlarına, faciəyə hüquqi qiymət verilməsi ilə bağlı beynəlxalq təşkilatkara göndəriləcək müraciət xarici dillərdə də olacaq”
Siyasi şərhçi Azər Həsrət bildirdi ki, o da QHT-lərin məlum təşəbbüsündə iştirak edir: “Oktyabrın 3-də Qeyri-Hökumət Təşkilatlarına Dövlət Dəstəyi Agentliyinin təşəbbüsü ilə bir qrup QHT təmsilçisi Gəncəyə getdi və orada bombalanmış əraziyə baxış keçirildi. Məlum hadisə ilə bağlı geniş müzakirələr və çıxışlar edildi. QHT-lər belə bir qərara gəldi ki, beynəlxalq qurumlara baş verənlərlə bağlı müraciət edilsin. Azərbaycanın istəyi erməni terroru ilə bağlı obyektiv qiymətin verilməsidir. Biz bu məsələdə dinc insanların yaşadığı şəhərlərin bombalanmasına hüquqi qiymət verilməsini istəyirik. Artıq bu müraciət qəbul edilib. Ermənistanın raket zərbələri nəticəsində Gəncədə, Bərdədə və digər şəhər və kəndlərimizdə törətdiyi terror aktlarına, faciəyə hüquqi qiymət verilməsi ilə bağlı beynəlxalq təşkilatlara göndəriləcək müraciət xarici dillərdə də olacaq”.
Həmsöhbətimiz onu da əlavə etdi ki, məlum məsələ ilə bağlı dövlət tərəfindən lazımi işlər görülməkdə davam edir: “Qeyri Hökumət Təşkilatları da bu sahədə özünə layiq olan yeri tutmaqla işə əlavə töhvə vermiş olacaq”.
Günel CƏLİLOVA
