Ermənistanın keçmiş prezidenti, hərbi cinayətkar Serj Sarkisyan özünə xas tərbiyəsiz formada Azərbaycan Prezidentinin ünvanına həqiqətə uyğun olmayan fikirlər səsləndirib. İddia edib ki, guya Azərbaycan rəhbərliyi hərbi və diplomatik müstəvidə Ermənistanın əvvəlki üç prezidentinə uduzub, guya 44 günlük müharibədə qələbəmizi xarici qüvvələr bizə “hədiyyə” edib.
Həmçinin, S.Sarkisyan 2018-ci ildə Ermənistanda baş verən “məxməri inqilab”a görə gileylənib. Qeyd edib ki, 2018-ci ildə hakimiyyət dəyişikliyi olmasaydı, Şuşa və Hadrut əldən çıxmazdı: “2018-ci ildə Ermənistanda xarici qüvvələrin ciddi dəstəyi ilə hakimiyyət dəyişikliyi olmasaydı, Şuşa və Hadrutdan çox boynunuzun ardını görərdiniz”.
Görünən odur ki, müharibədən bir il keçəndən sonra Sarkisyanın dili açılıb. Müharibə vaxtı Xankəndidə sona qədər qalmağa cəsarəti çatmadı. Müharibənin ilk günlərində qorxudan tez aradan çıxdı. Məğlubiyyəti 2018-ci ildə “məxməri inqilab”ın üstünə atan Sarkisyan, nədənsə, Aprel döyüşlərində uğradıqları fiaskodan danışmayıb. Yaxşı, bəs 2016-cı ildə niyə məğlub oldunuz? Onda ki ölkənin prezidenti məhz S.Sarkisyan idi?!
Bir sözlə, Sarkisyan niyə belə başından böyük danışır?
“Sarkisyan kişi olsaydı, Xocalıda və Qarabağın digər yaşayış məntəqələrində dinc insanlara misli görünməmiş divan tutmazdı”
Məsələyə münasibət bildirən hərbi ekspert Ramil Məmmədlinin sözlərinə görə, S.Sarkisyan sadəcə sərsəmləyir: “Əvvəla, S.Sarkisyan indi belə yekə-yekə danışmaqla Ermənistanda özünə siyasi xal toplamaq istəyir. Ancaq bu bədbəxt anlamır ki, çoxdan tarixin arxivinə gedib. Digər tərəfdən, Sarkisyan kişi olsaydı Xocalıda və Qarabağın digər yaşayış məntəqələrində dinc insanlara misli görünməmiş divan tutmazdı. Qocalar, qadınlar, uşaqlar girov götürülərək işgəncə ilə öldürüldülər. Bütün bunlara bilavasitə rəhbərlik edən şəxslərdən biri S.Sarkisyan olub. Birinci Qarabağ müharibəsində 4 min nəfərə yaxın itkin düşən azərbaycanlı barədə Ermənistan heç bir məlumat vermir. Halbuki, S.Sarkisyan onlar barədə müfəssəl məlumata malikdir. Qafqaz kimi bir regionda özünə kişi deyən şəxs heç vaxt bu cür şərəfsizlikləri etməzdi. Ancaq S.Sarkisyan kimi qatil bunu etdi. Ona görə də S.Sarkisyanın kişilikdən danışmağa haqqı yoxdur. Hər kəsə, o cümlədən Sarkisyana yaxşı məlumdur ki, hansı dövlətin, hansı dairələrin himayəsi hesabına 90-cı illərdə Azərbaycan əraziləri işğal olundu. Yaxşı, 44 günlük müharibədə Ermənistan məğlub olanda ölkəyə Paşinyan rəhbərlik edirdi., bəs 2016-cı ilin Aprel döyüşlərində niyə məğlub oldular? Hansı ki, olduqca məhdud miqyasda döyüşlər oldu və cəbhə xətti 2 istiqamətdə yarıldı. Nəticədə əlverişli strateji əhəmiyyətli yüksəkliklər və 2000 hektardan artıq ərazi azad edildi. Onda Ermənistana S.Sarkisyan rəhbərlik edirdi. Bəs niyə onda bununun qarşısını ala bilmədi? O üzdən, onun dedikləri ucuz populizmdir”.
Hərbi ekspert onu da qeyd etdi ki, bir gün Sarkisyan da Manvel Qriqoryan kimi gəbərəcək, tarixdə isə heç də yaxşı adla qalmayacaq.
Vidadi ORDAHALLI
