Nikol Paşinyan Litvanın erməni icması ilə görüşündə deyib ki, Ermənistan heç vaxt İrana qarşı sui-qəsddə iştirak etməyib və heç vaxt iştirak etməyəcək. Üstəlik, Tehranla münasibətlər İrəvan üçün son dərəcə vacibdi.
Paşinyan İranın maraqlarının Ermənistan üçün "çox əziz olduğunu" və rəsmi İrəvanın İranın maraqlarına heç vaxt xəyanət etməyəcəyi fikrini ifadə edib. O, rəsmi Tehranın bunu yaxşı bildiyinə əminliyini deyib: "Əminəm ki, şranlı həmkarlarımız bunu bilir - Ermənistan heç vaxt İrana qarşı sui-qəsddə iştirak etməyib və etməyəcək, çünki bu münasibətlər bizim üçün son dərəcə vacibdir. 90-cı illərin əvvəllərində İranın bizim üçün "həyat yolu" olduğunu heç vaxt unutmayacağıq”.
O qeyd edib ki, ikitərəfli münasibətlərin əsasını, digər məsələlərlə yanaşı, məhz bu amil təşkil edir. Paşinyan İranın yeni prezidenti Rəisi ilə iki görüş keçirdiyini vurğulayıb. Ermənistan hökumətinin başçısı hesab edir ki, bu fakt Tehranla münasibətlərin İrəvan üçün nə qədər önəmli olduğunu göstərir.
Paşinyan onu da vurğulayıb ki, hazırda Ermənistan-İran iqtisadi əlaqələri sanksiyalara görə tam həcmdə inkişaf edə bilmir: "Lakin Ermənistanın İranla böyük layihələri var. İran prezidenti ilə görüşdə bu layihələrin həyata keçirilməsini sürətləndirməyi təklif etmişəm".
Söhbət İran şirkəti ilə birlikdə İslam Respublikasına üçüncü elektrik ötürmə xəttinin inşasının sürətləndirilməsindən, həmçinin "elektrik enerjisi qarşılığında qaz" iqtisadi formulasının tətbiqindən gedir.
Paşinyan qeyd edib ki, İranın ali rəhbərliyi ilə görüşlərdə Mehri su anbarı və hidroelektrik stansiyanın tikilməsi layihəsinə qayıtmağı təklif edirdi. O qeyd edib ki, layihənin həyata keçirilməsi təkcə birgə enerji idarəçiliyi baxımından deyil, həm də su qaynaqları baxımından son dərəcə əhəmiyyətlidir.
Göründüyü kimi, Paşinyan İranın ölkəsi üçün olan müstəsna əhəmiyyətindən danışıb. Bu səmimi etirafdan hansı nəticəni çıxarmaq olar?
Politoloq Qabil Hüseynli “Bakı-Xəbər”ə açıqlamasında bildirdi ki, bu, Paşinyan tərəfindən edilən çox səmimi etirafdır: "30 illik işğal dövründə İran Ermənistan üçün bir nəfəslik rolunu oynadı. İran onlara lazım olan ərzaq və hərbi təyinatlı yükləri göndərdi. Ermənistanın Azərbaycan torpaqlarını işğal etməsi, 1 milyondan artıq insanın qaçqın düşməsində İran da yaxından rol oynadı. Bizim bəlalarımızın bir çoxu həm də İranla bağlıdır. 44 günlük müharibədən sonra Azərbaycanın müharibədəki qələbəsini həzm edə bilməyən mollalar Azərbaycana qarşı kin və nifrət qusmağa başladılar. İş o yerə çatdı ki, milliyyəti azərbaycanlı olan dini lider Xamneyi Azərbaycana qarşı böhtan və hədələr səsləndirdi. Adama deyərlər, niyə özünüzdən çıxırsınız? Əsası olmayan arqumentlər gətirirlər. Güya biz "sionist" rejimini onların burnunun ucuna gətirmişik. Bizimlə dost olan İsraili nəzərdə tuturlar. Bu ölkə 44 günlük müharibədə bizə kömək edəndə, İran da ermənilərə yardım edirdi. İsraillə bizim bütün sahələr üzrə normal münasibətlərimiz var. Onların bizə heç bir ziyanı yoxdur. Onların həzm edə bilmədiyi əsas məsələ Türkiyənin bölgədə söz sahibinə çevrilməsidir. Onlar Türkiyənin Azərbaycanda hərbi haza yarada biləcəyini ehtimal etdikləri üçün bizi indidən şantaj edirlər. İran başa düşmür ki, onun əhalisinin 60%-i azərbaycanlıdır. Onlar şimaldaki qardaşlarına heç vaxt güllə atmaz. Belə bir gərginləşmə olsa İrandakı azərbaycanlılar oranı darmadağın edəcək. Üstəlik də dünya sahibsiz deyil ki, sən istədiyini edəsən. Onlar deyirlər ki, bir gündə Azərbaycanın üzərinə yüzlərlə raket buraxa bilərik. İsrailə də belə hədələr gəlirlər. Bunun sonu necə olar? O mollaları başlarına taxdıqları əmmamələrilə boğarlar. Hazırda həmin ölkəyə qarşı ciddi sanksiyalar var. Onu terroru dəstəkləyən bir ölkə kimi tanıyırlar. Heç olmasa bundan nəticə çıxarsın. Belə bir imicə malik olan ölkə indi bizə məsləhət vermək istəyir. Təbidir ki, bu vəziyyət Paşinyanı və bütün dünya ermənilərini qane edəcək. Başqa vaxt müsəlman təəssübkeşi kimi danışan bu ölkə indi məscidlərə donuz bağlayan erməniləri müdafiə edir. İran bu cür davranışı ilə çox ciddi yanlışlıqlara yol verir. Biz bunu heç vaxt unutmayacağıq”.
Məhəmmədəli QƏRİBLİ
