Ermənistanın Baş naziri Nikol Paşinyan Azərbaycan Prezidenti İlham Əliyevlə görüşə hazır olduğunu bildirib.
O bunu Vilnüsdə erməni icmasının nümayəndələri ilə görüşdə deyib.
Paşinyan görüşdə mina xəritələri barədə də danışıb. O bildirib ki, Qarabağı işğalda saxladıqları müddətdə basdırdıqları minaların xəritələrini də Azərbaycan Prezidenti ilə görüşə aparmağa hazırdır.
Erməni Baş nazir bunun qarşılığında Azərbaycanda olan erməni əsirlərin geri qaytarılmasını istəyib.
Qeyd edək ki, Azərbaycan Prezidenti İlham Əliyev son müsahibəsində bütün erməni əsirlərin təhvil verildiyini bildirib. Bundan başqa, İlham Əliyev “France 24”ə müsahibəsində bildirib ki, Nikol Paşinyanla görüşməyin əleyhinə deyil.
Dövlət başçısı qeyd edib ki, ATƏT-in Minsk Qrupu tərəfindən təşkil olunarsa, Nikol Paşinyanla görüşə etiraz etmir. Ən maraqlısı budur ki, Paşinyan minalanmış ərazilərin xıritələrinin verilməsi mövzusunda yenə də açıq alver etməkdən çəkinmir və bunu publik olaraq bəyan edir.
Onun bu təşəbbüsünə və təklifinə hansı adı vermək olar?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Paşinyanın bu təklifi erməni mahiyyətini bir daha ortaya qoymuş olur: "Minalanmış ərazilərin xəritələrinin Azərbaycana təqdim olunmasını Ermənistan bir öhdəlik olaraq öz üzərinə götürüb. İmzalanmış üçtərəfli bəyənatda bu barədə müddəa var. Lakin Ermənistan digər öhdəliklər kimi bunu da yerinə yetirməkdən yayınır. Atəşkəs əldə olunduqdan sonra Ermənistan müəyyən ölkələrin vasitəçiliyi ilə mina xəritələrini Azərbaycanda saxlanılan diversantların müqabilində bizə təqdim etdi. Burada incə bir detala nəzər yetirmək lazımdır. Paşinyan və erməni tərəfi daima bu təkliflərlə çıxış edəndə hərbi əsirlər terminindən istifadə edir. İş burasındadır ki, müharibə bitəndən sonra tərəflər arasında bütün hərbi əsirlərin mübadiləsi həyata keçirilib. Hazırda Azərbaycanda Ermənistanın heç bir hərbi əsiri yoxdur. Bizdə olanlar müharibədən sonra ərazilərimizdə terror və diversiya törətmək məqsədini güdənlərdi. Onlar silahlı qüvvələrimiz tərəfindən saxlanılıb və barələrində Azərbaycan qanunlarına uyğun olaraq məhkəmə hökmləri çıxarılıb. Bunları heç bir vəchlə hərbi əsir adlandırmaq olmaz. Ancaq biz görürük ki, Paşinyan utanmadan bu amillə də manipulyasiya və alver edir. Əslində onun bu cür təkliflərinə dünya birliyi etiraz etməlidir. Çünki söhbət işğaldan azad olunmuş ərazilərdəki minalardan gedir. Biz görürük ki, atəşkəsdən sonra da həmin ərazilərdə mülki insan məhz minalara düşərək həlak olub. Yaxın zamanlarda o ərazilərə dinc əhalinin köçürülməsi planlaşdırılır. Belə vəziyyətdə onların yerləşdirilməsi risqdir. Yenə də mülki insan tələfatları ola bilər. Bunun həlli yolu Ermənistanın xəritələri təqdim etməsindən keçir. Ən maraqlısı budur ki, Ermənistanın təqdim etdiyi xəritələr belə aldadıcıdır. Hətta Azərbaycan rəsmi səviyyədə bəyan edib ki, həmin xəritələrin böyük əksəriyyəti yayındırıcıdır. Bu bütün dünyanı narahat edən humanitar bir məsələdir. Ölkə başçılarının görüşündən əvvəl bununla bağlı ilkin şərtin irəli sürülməsi Paşinyanın siyasi diletantlığından xəbər verir. Görüş təşəbbüsü bizdən gəlib, Ermənistan ona cavab veribsə, müzakirə olunmalı çoxlu məsələlər var. Ən başlıcası isə, Ermənistan sülh sazişinə hazır olduğunu bəyan etməlidir. Azərbaycan istehkamçıları həmin əraziləri minalardan təmizləyir. Hətta xəritələr təqdim edilməsə belə, biz buna nail olacağıq. Ancaq bu çox vaxt aparan prosesdir. Əgər dünya ölkələri bölgədə sülhün və təhlükəsizliyin təmin olunmasını istəyirlərsə, mütləq mənada Ermənistanı buna məcbur etməlidirlər”.
Məhəmmədəli QƏRİBLİ
