Azərbaycanla İran arasında yaranan mübahisəli məsələlər xarici qüvvələrin müdaxiləsi olmadan həll edilməlidir. İranın informasiya agentliyi xəbər verir ki, bunu İslam Respublikasının ali dini lideri Əli Xamneyi bildirib.
"Ölkənin şimal-qərbindəki son vəziyyət bölgədəki xarici qüvvələrin müdaxiləsi və hərbi iştirakı olmadan həll edilməlidir. Region xalqlarının orduları vəziyyəti özləri idarə edə bilərlər və biz başqa qüvvələrin müdaxilə etməsinə icazə verməyəcəyik"- o deyib.
Xamneyinin bəyanatı Azərbaycanla İran arasında siyasi gərginliyin, eləcə də İran ordusunun Azərbaycan sərhədi yaxınlığında hərbi təlimlərə başlamasının fonunda səslənib. Maraqlıdır ki, indiyə qədər iki ölkənin ali rəhbərliyi səviyyəsində ölkələrimiz arasındakı münasibətlərdən narahatlıq belə açıq formada ifadə olunmamışdı. Bir müddət əvvəl Prezident İlham Əliyev də İranın son addımlarından narahatlığını ifadə etmişdi. İndi isə İranın ali dini lideri bizimlə münasibətlərin xarici qüvvələrin iştirakı olmadan həll edilməli olduğunu deyir. Bu kontekstdə hansı xarici qüvvələr nəzərdə tutulur?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, İranın ali dini lideri Xamneyi Azərbaycanla İran arasındakı mübahisəli məsələlər xarici qüvvələrin müdaxiləsi olmadan həll edilməlidir deməklə bir sıra ölkələri nəzərdə tutur: “Bu, ilk növbədə qardaş Türkiyədir. Türkiyə-Azərbaycan müttəfiqliyi, Türkiyənin bölgədə yerləşməsi, şərt diqtə etməsi İranı möhkəm qıcıqlandırır. Xamneyi, eləcə də Pakistanı, İsraili, ABŞ-ı və Rusiyanı nəzərdə tutur. Türkiyə-Azərbaycan-Pakistan üçlüyünün hərbi təlimləri də İranı narahat etdi və hadisələr hərbi müstəviyə keçərsə, Pakistanın da Azərbaycanın yanında yer alacağından ehtiyatlanır. Xamneyi də daxil olmaqla, İran rəhbərliyi İsrailin adını daha çox çəkir və kütləni də daha çox bu bəhanə ilə istiqamətləndirməyə çalışır. İsrailin PUA-larından və digər yüksək texnoloji silahlar vasitəsilə Azərbaycana dəstək verəcəyindən çəkinir. ABŞ-la İranın münasibətləri aydındır. ABŞ İranın bizim bölgədə at oynatmasını istəmir, hər cür sanksiyalarla təzyiq altında saxlayır. “Əsrin müqaviləsi” imzalanandan sonra Xəzərdə İran hərbi gəmiləri bizim qazıntı və sair işlər görən gəmilərimizə ultimatum verəndə ABŞ İranı yerində oturtdu. Rusiya da İranın Xəzərdə, Azərbaycaycanda at oynatmasında maraqlı deyil. Zaman-zaman Xəzərdə bu özünü göstərib, hətta Rusiya hərbi gəmiləri İran gəmilərini geri çəkilməyə məcbur edib. Bütün bunlar İranı narahat etdiyi üçün onlar məsələni dini müstəviyə fokuslayırlar ki, Azərbaycanın daxilindəki tərəfdarlarından da dəstək alsınlar. Ancaq bu cür təhdidlərlə bizi kimsə yolumuzdan döndərə bilməz. Azərbaycan bir müstəqil ölkə kimi özü yaxşı bilir kiminlə dostluq edir. Bunun üçün bizim İrandan hər hansı bir icazəni almağımıza zərurət qalmır. İranın bizə yönəlik addımları göz qabağındadır. Bu hansı müsəlman təəssübkeşliyinə sığır? Görün vəziyyət nə yerə çatıb ki, Paşinyan buna görə İrana xüsusi minnətdarlıq edib”.
Məhəmmədəli QƏRİBLİ
