Son günlərdə diqqət çəkən məsələlərdən biri də Ermənistan ordusunda yüksək vəzifəli şəxslərin həbsidir. Hazırda bu proses davam edir. Elə bu fonda Müdafiə Nazirliyi Baş Qərargah rəisinin müavini Stepan Qalstyan həbs edilib.
Qeyd edək ki, Qalstyan barəsində iki ay müddətinə həbs qətimkan tədbiri seçilib. Onun həbsi Silahlı Qüvvələrdə vəzifə tutan şəxslər arasında ciddi narahatlıq yaradıb. Artıq yüksək vəzifəli və rütbəli zabitlər səksəkəli həyat yaşayır. Onların bəziləri də yaxın günlərdə ya həbs ediləcəyini, ya da vəzifədən alınacağını gözləyir. Ermənistan Milli Təhlükəsizlik Xidməti isə Qalstyanın geniş miqyasda sui-istifadə və mənimsəmə iddiası ilə tutulduğunu bildirir. Həbsindən əvvəl Qalstyan keyfiyyətsiz döyüş sursatlarının silahlanmaya qəbul edilməsi, nəticədə dövlətə külli miqdarda, təqribən 4,5 milyon dollarlıq ziyan dəyməsi ilə bağlı başlanmış cinayət işi üzrə dindirilib. Bundan öncə isə Ermənistan Milli Təhlükəsizlik Xidməti sentyabrın 30-da həmin iş üzrə keçmiş müdafiə naziri David Tonoyanın və “Patron Davo” ləqəbi ilə tanınan silah taciri David Qalstyanın həbs olunması barədə məlumat yayıb. Baş verənlər, qeyd edildiyi kimi, erməni ordusunda yüksək rütbəli hərbçilər arasında ciddi təşvişə yol açıb. Ermənistan Müdafiə Nazirliyinin generallarından və yüksək dərəcəli rəsmilərindən hələlik Movses Akobyan baş verənlərin orduya ciddi zərbə olacağını qeyd edir. Belə hesab edilir ki, ordudan əsasən Rusiyaya, eləcə də “Qarabağ klanı”na bağlı zabitlər sıxışdırılıb çıxarılır. Indiki erməni generaliteti hesab edir ki, bu proseslərdə Ermənistan ordusu itirəcək. İddia olunur ki, uzun illər böyük təcrübəyə malik hərbçilər artıq həmin postları tutmayacaq, əvəzinə mövcud siyasi hakimiyyətə bağlı olan şəxslər hərbi qurumlarda yüksək vəzifəyə gətiriləcək ki, nəticədə ordu daha da zəifləyəcək. Hesab edilir ki, Ermənistanın siyasi hakimiyyəti özünü ayaqda tutmaq üçün davamlı olaraq generallardan “günah keçisi” kimi istifadə edir. Amma kiçik Ermənistanın ordusunun general yetişdirmək imkanları sonsuz deyil. Bəzən eyni şəxs bir neçə dəfə vəzifədən atılıb, sonra isə kadr çatışmazlığı səbəbindən yenidən vəzifəyə təyin edilib. Bunlardan biri də Ermənistanın müdafiə naziri Arşak Karapetyandır. Ermənistanın sabiq prezidenti Serj Sarkisyan hələ 2016-cı ilin aprelindən sonra müdafiə nazirinin müavinləri ilə bərabər bir neçə idarə rəisini, o cümlədən, Ermənistan Silahlı Qüvvələri Baş Qərargahının kəşfiyyat idarəsinin rəisi Arşak Karapetyanı da vəzifədən azad etmişdi. 2016-cı il mayın sonunda Arşakla yaxın münasibətlərdə olan general Mels Çilingəryan, polkovnik Mqer Papyan və Armen Marqaryan həbs edildi. Karapetyanın da açılan iki müxtəlif cinayət işindən biri üzrə saxlanması nəzərdə tutulurdu. Söhbətin alınan texniki kəşfiyyat vasitələrinin, aşağı keyfiyyətə malik olmasına baxmayaraq, baha qiymətə rəsmiləşdirilməsindən getdiyi ehtimal olunurdu. Lakin hansısa qüvvə o zaman Arşak Karapetyanı cinayət məsuliyyətindən azad edə bildi. 2018-ci ildə hakimiyyətə gələn Nikol Paşinyan həmin ilin dekabrında Arşak Karapetyanın 1 mart 2008-ci il hadisələrilə bağlı ifadə verməyə razılaşdığını nəzərə alaraq, onu özünə müşavir təyin etdi. Ardınca isə Paşinyan Karapetyanı Ermənistan Silahlı Qüvvələrinin Baş Qərargah rəisinin birinci müavini təyin etməklə, ordu karyerasına yenidən təkan verdi. Bu ilin iyulunda baş nazir vəzifəsini icra edən Nikol Paşinyan müdafiə nazirinin müavini Suren Saakyanı vəzifəsindən azad edərək, Arşak Karapetyanı birinci müavin təyin etdi. Paşinyan baş nazir olduqdan sonra Karapetyanı müdafiə naziri vəzifəsinə gətirdi. İndi Paşinyan Karapetyanın ona tam itaət etməsini istəyir. Əks halda o da həbsə atılacaq. Bunun üçün köhnə cinayət işləri var və Karapetyan artıq bundan əvvəl keyfiyyətsiz silahların alınmasında ittiham edilib. Bu halda erməni ordusunda ciddi general qıtlığının yaranması da qaçılmazdır. Qeyd edək ki, Ermənistanın güc strukturlarında müharibədən sonrakı dövrdə 16-dan çox general artıq vəzifədən azad edilib.
Belə vəziyyətdə Ermənistan ordusunda törədilən cinayətlərin sayı kəskin artıb. Ekspertlər hesab edir ki, Ermənistan ordusunda baş verən cinayətlər və qanlı insidentlər orada hökm sürən özbaşınalıq və nizamnamədənkənar münasibətlərlə yanaşı, həm də ali zabit heyətinin kəskin çatışmazlığının nəticəsidir. Bu fonda aşağı heyətdə də maraqlı proseslər qeydə alınır. Elə bu günlərdə Ermənistanın fərqli hərbi hissələrindən olan çağırışçılar məzuniyyət müddəti bitdikdən sonra xidməti yerlərinə qayıtmaq istəmədiklərini, müəyyən hərbi xidmət vəzifələrini yerinə yetirməkdən imtina etdiklərini bildiriblər. Bundan başqa, Ermənistanın Qarabağda qanunsuz xidmət edən əsgərləri isə sülhməramlılar tərəfindən əraziyə buraxılmayıb. Elə erməni əsgərlər özləri də Qarabağa getmək istəmir. Qeyd edək ki, erməni mətbuatı əsgərlərin xidməti yerlərinə qayıtmaq istəməməsini müharibədən sonrakı vəziyyətlə əlaqələndirib. Maraqlı məqam burada həm də odur ki, Qarabağda qanunsuz xidmət edən erməni əsgərləri məzuniyyət vaxtı Ermənistan ərazilərinə gedib. Məzuniyyət müddəti bitdikdən sonra isə onlar Qarabağa yenidən qayıtmaq istəyəndə əraziyə buraxılmayıb. Erməni hərbçilərindən birinin atası deyib ki, oğlu məzuniyyətdən qayıdanda Qarabağa buraxılmadığı üçün qanunsuz məskunlaşdıqları hərbi hissəyə qayıda bilməyib. Buna görə də o, xidmətdən yayınmaq iddiası ilə həbs edilib. Bildirilib ki, əsgərlər hərbi biletini rus sülhməramlılarına göstərdikdən sonra onların mülki yox, əsgər olduğu aydın olub. Buna görə də hərbçilər Qarabağa girə bilməyib. Erməni mediası bu xüsusda yazır: "Bu vəziyyətdə tezliklə Qarabağda bir nəfər də olsun erməni əsgəri qalmayacaq, Azərbaycanın tələbi ilə erməni qoşunları yavaş-yavaş Qarabağdan geri çəkilir".
Samirə SƏFƏROVA
