Erməni tarixçilərinin indiyə qədər uydurduqları miflərin nə sayı var, nə də coğrafi miqyası. Dünyanın ən qədim dövlətlərinə, xalqlarına, mədəniyyətlərinə erməniləri yamaq edən tarixçiləri utanmadan, çəkinmədən elə cəfəngiyyatlar söyləyirlər, yazırlar ki, adamın ayağının altından yer qaçır.
Ermənilər son zamanlar yeni mif uydurublar. Guya Ermənistanın, erməni dövlətçiliyinin 3 min il yaşı var. Erməni alimləri iddia edirlər ki, indi Ermənistan adlandırılan ərazidə ermənilərin “qədim dövləti” olub və bu “dövləti” guya müxtəlif dövrlərdə qonşuları və xaricilər “Urartu, Arartu, Armenia, Xayasa, Nairi, Ayais, Şubriya” və sair “adlandırıb”lar. Hətta bunlar parfiyanın da ermənilərlə əlaqəsi olduğunu və dünyada ilk dəfə xristianlığı 300-cü ildə ermənilərin qəbul etdiyini, eyni zamanda dünyaya yaydığını iddia edirlər.
Erməni alimlərinin “Ermənistan dövlətçiliyi”nin 3000 yaşı olduğunu iddia etməsi gülməli deyilmi? Niyə dünya alimləri erməni həyasızlığına göz yumurlar? Dünya bilmir ki, XX əsrin 1918-ci ilinə qədər Qafqazda Ermənistan adlı dövlət olmayıb. Erməni həyaslığını niyə ifşa etmirlər?
Tarix fənni üzrə dərslik müəllifi, tədqiqatçı Hafiz Cabbarov baki-xeber.com-a bildirdi ki, erməni alimlərinin iddiaları boş və mənasızdır. H.Cabbarovun fikrincə, Ermənistan adlı dövlətin 3 min yaşının olması iddiası mifdən başqa bir şey deyil. Erməni alimlərinin irəli sürdüyü dövlət adlarının isə heç birinin haylarla yaxından-uzaqdan əlaqəsi yoxdur. Tədqiqatçının sözlərinə görə, ermənilərin bizim ərazilərə gəlmə olduğunu erməni tarixçiləri özləri də zaman-zaman qeyd ediblər: “Erməni tarixi deyilən anlayışın özü belə miflərdən, başqa xalqların mirasını oğurlamaqdan ibarətdir. Bunu elə erməni tarixçilərinin özləri də etiraf etmişdilər. Məsələn, XIX əsrdə Patkanov da etiraf edirdi ki, Armeniya adı siyasi deyil, coğrafi termindir. Doğrudan da Armeniya sözü Mesopotomiyada yaşayan qədim arami dilində “yüksək yer” deməkdir. Məlum olduğu kimi Mesopotomiya əsasən düzənlik ərazidir. Onun şimalı isə dağlıq olduğu üçün belə adlanırdı. Necə ki, Mesopotomiya sözü etnik adı bildirmir və yunan dilində İki çay arası deməkdir, Armeniya da yüksək yer deməkdir. Armeniya əslində indiki Ermənistan ərazisini, yəni tarixi Qərbi Azərbaycanı deyil, Fərat çayının yuxarı axarını əhatə edirdi. Bu gün erməni adlandırılan haylar isə bu ərazilərə çox sonralar gəlmişlər. O ki, qaldı onların Urartu mirasını oğurlamaq cəhdlərinə bu da ənənəvi erməni (əslində hay) uydurmasından başqa bir şey deyil. Urartu dili və xalqı ilə erməni dili və xalqının heç bir qohumluğu yoxdur. Ermənilər (əslində haylar) Urartuya eramızdan əvvəl VI əsrdə gəlmişlər. Bu zaman isə Urartu artıq süqut etmişdir.
Avropa tarixçilərindən Fransua Lenorman qeyd edir ki, “Ermənilər Frigiyadan gəlmədirlər. Onlar tədricən Frigiyadan şərqdə yerləşən yüksəkliklərə yiyələnərək, oradan qədim urartuluları sıxışdırmış, onların adına, dininə, dilinə və rəvayətlərinə yiyələnib, özlərininki ilə əvəz etmişlər”. ABŞ-ın Kolumbiya universitetinin professoru tanınmış ermənişünas Nino Qarsoyan əsaslandırır ki, Moisey Xorenlinin “Erməni xalqının tarixi” adlı əsəri, onların xristianlığı qəbul etməsi tarixi hamısı uydurmadır. Çünki, V əsrdə hər hansı bir xalqın formalaşması cəgəngiyyatdan ibarətdir. Doğrudan da erkən orta əsrlərin əvvəllərində hər hansı bir xalqın formalaşdığını demək gülüncdür. Əgər erməni sözü etnik mənsubiyyəti bildirirsə, onda haylar kimdir və indiki ermənilər niyə özlərinə hay deyirlər? Niyə beynəlxalq ictimaiyyətə bildirmirlər ki, başqasının mirasını oğurladığımız ölkəmizin adı Hayastandır, Armeniya deyil. Deyə bilməzlər, çünki onda hayların başqa ərazidən bura gəlməsi mənbələrlə sübut edilən gerçəkdir”.
H.Cabbarov qeyd edir ki, ermənilərin əvvəl Kiçik Asiyaya, çox sonralar XIX əsrdə Çar Rusiyasının Cənubi Qafqazı işğalından sonra gəlmə xalq olması mənbələrlə sübut edilir. “Özü də bu mənbələr bizim deyil, erməniləri himayə edən Avropa və Rus alimlərinin əsərləri ilə də təsdiqini tapır. Hətta erməni tarixçiləri - Nalbəndyan, İşxanyan və digərləri də ermənilərin Cənubi Qafqaza gəlmə olduqlarını etiraf edirlər. Odur ki, 3000 illik tarix məsələsi mifdən başqa bir şey deyil” - deyə H.Cabbarlı vurğuladı.
İradə SARIYEVA
