Gürcüstanın keçmiş prezidenti Mixail Saakaşvili Gürcüstan hüquq-mühafizə orqanları tərəfindən saxlanılıb. Bu barədə baş nazir İrakli Qaribaşvili keçirdiyi xüsusi brifinqdə bildirib: "Məlumat vermək istəyirəm ki, Gürcüstanın üçüncü prezidenti, axtarışda olan Mixail Saakaşvili saxlanılıb və cəzaçəkmə müəssisəsinə köçürülüb", - deyə baş nazir qeyd edib.
Saakaşvilinin bilə-bilə könüllü olaraq Gürcüstana gəlib və həbsə girməsi Qərbin və ya ABŞ-ın bölgə ilə bağlı hansısa planlarından xəbər verə bilərmi?
Politoloq Elşən Mustafayaev “Bakı-Xəbər”ə bildirdi ki, bununla Saakaşvili və onun arxasında duran güclər ciddi siyasi gediş ediblər: “Saakaşvili həbsdən qorxan deyildisə, niyə bir neçə il əvvəl Gürcüstana gəlmirdi? Deməli, kortəbii addım atılmayıb. Gəlin hadisənin baş verdiyi zamana nəzər salaq. Hadisə Gürcüstan hakimiyyəti bələdiyyə seçkisinə hazırlaşdığı zamanda baş verib. Seçkiyə cəmi bir gün qalmış Saakaşvili peyda olur və həbs edilir. Gürcüstan hakimiyyəti çıxılmaz vəziyyətdə qalıb. Onu həbs etməsəydilər hüququn aliliyi şübhə altına düşürdü. Həbs edilməsi isə ölkəyə beynəlxalq təzyiqləri artıracaq və Saakaşvilinin daxildəki tərəfdarlarına mübarizə üçün yeni stimul verəcək. Ukrayna vətəndaşlığı olan Saakaşvilinin həbsi onun reytinqini daha da artıracaq. Başqa siyasətçi olsaydı, Avropadakı rahat həyatı, yaxşı maaşı qoyub, yenidən risqə getməzdi. Saakaşvili isə bu yolu tutmadı, onun üçün vətənində yeni mübarizə dövrü başlayır. Mixail Saakaşvilini dəstəkləyən müəyyən dairələr ilk olaraq onu Gürcüstana, daha sonra hakimiyyətə qayıtmasında maraqlıdırlar. Saakaşvili yaxşı başa düşür ki, indiki hakimiyyət onu uzun müddət həbsdə saxlaya bilməz. Ona görə də əminliklə bu addımı atır. Hətta Gürcüstanda ara qarışa bilər. İğtişaşların baş verməsi də mümkündür. Bununla Qərb və ABŞ Cənubi Qafqazda Rusiyanın rolunu zəiflətmək, özlərinin isə itirilmiş mövqelərini bərpa etmək istəyirlər”.
Məhəmmədəli QƏRİBLİ
