Türkiyə Prezidentinin mətbuat katibi İbrahim Kalın müsahibəsində deyib ki, Füzulidəki hava limanında işlər bitmək üzrədir, orada sınaq uçuşları həyata keçirilir və yaxında açılış olacaq. O bildirib ki, Türkiyə Prezidenti Rəcəb Tayyib Ərdoğan yeni hava limanının açılışında iştirak edəcək.
Belə bir ictimai-siyasi vəziyyətdə, İranın təhdid və təhrikləri davam edərkən Türkiyə Prezidentinin Qarabağa gəlməsi çox mühüm əhəmiyyət daşıyan hadisədir. Böyük ehtimalla, Ərdoğanın təyyarəsi birbaşa Füzuli hava limanına enəcək və Türkiyə prezidenti Qarabağa xaricdən ilk uçuşu həyata keçirən şəxs olacaq. Bir sıra ekspertlər qeyd edir ki, Ərdoğanın indiki halda Azərbaycana - Qarabağa gəlməsi bundan 20 il öncə İranın daha bir təhdidi ilə qarşılaşdığımız dövrdə “Türk Şahinləri”nin Bakı səmalarına gəlməsinə bənzəyəcək. 2001-ci ildə İran sərhədlərimizi pozmuş, gənc dövlətimizi təhdid etmiş, xalqımızı qorxutmağa çalışmışdı. Həmin anda Türkiyə yanımızda oldu və Azərbaycan səmalarında “Türk Şahinləri” – Türkiyə Silahlı Qüvvələrinin hərbi təyyarələri nümayiş uçuşu həyata keçirdilər. Milyonlarla azərbaycanlı bu möhtəşəm dəstəyi küçələrə çıxaraq, sevinc göz yaşları ilə izlədi. Təəssüflər olsun ki, İran bu gün də bizimlə təhdid dilində danışır. Bu baxımdan Ərdoğanın məhz İranla sərhəddə olan Füzuliyə təyyarə ilə eniş etməsinin nə kimi simvolik mənası olacaq?
Hərbi-siyasi ekspert Daşdəmir Əliyev “Bakı-Xəbər”ə açıqlamasında bildirdi ki, bunun olduqca böyük strateji əhəmiyyəti var: “44 günlük müharibə bizə çox detalları aydınlaşdırdı. Biz müharibə dönəmi və ondan sonrakı zamanda kimin-kim olduğunu gördük. Daha sadə dillə izah etsək, öz dostumuzu və düşmənimizi yaxından tanıdıq. Təəssüflər olsun ki, istər işğal dönəmində, istər 44 günlük müharibənin gedişində, istərsə də ondan sonrakı zamanlarda biz İrandan heç də xoş olmayan münasibət gördük. İran Ermənistana nəfəslik rolunu oynadıqdan sonra, indi də olub Ermənistanın və Qarabağdakı separatçıların silah və ərzaq təminatçısı. Təəssüflər olsun ki, dəfələrlə bununla bağlı edilən xəbərdarlıqlara məhəl qoymadan öz siyasətini davam etdirir. Prezident çıxışında yaxşı vurğuladı ki, son 30 ildə sərhədimizdə hərbi təlim aparmayan İran birdən-birə bu addımı atır. Təbiidir ki, Azərbaycanın bölgədə yaratdığı yeni reallıqlar onları qane etmir. Onlar bizimlə Türkiyənin birgə hərbi təlimlərini həzm edə bilmirlər. Buna görə də bizə təzyiqi artırırlar. Azərbaycanın müstəqillik tarixində İrandan belə cəhdlər olub. Bəli, yadımdadır ki, 2000-ci illərin əvvəlində Türkiyə Şahinləri gəlib öz mesajlarını verdilər. Ərdoğanın birbaşa Füzuliyə təyyarə ilə eniş etməsi bundan da böyük strateji jestdir. Birincisi, Füzuli Qarabağ sayılır. İkincisi, yenicə işğaldan azad olunub və orada beynəlxalq aeroport fəaliyyətdədir. Üçüncüsü isə, həmin rayon İranla birbaşa sərhəddə yerləşir. Zənn edirəm ki, İran bundan özü üçün müəyyən nəticələr çıxaracaq”.
Ekspertin sözlərinə görə, artıq Azərbaycanı təkləmək mümkün deyil: “Bizim Türkiyə kimi güclü dostumuz var. Bununla yanaşı, Pakistan kimi atom ölkəsi olan dövlət bizimlə hərbi müttəfiq statusundadır. Bu baxımdan, artıq bizi nə iləsə təhdid etmək mümkün deyil. Bununla yanaşı, Azərbaycanın özünün də güclü və döyüşkən ordusu var. Yaxşı olardı ki, qonşu ölkələr bizimlə təhdid yox, dost dilində danışsınlar”.
Məhəmmdəli QƏRİBLİ
