Ermənistan hökuməti Qarabağa 28 milyon dollar (13,4 milyard dram) yardım ayırıb. Ermənistan KİV-nin verdiyi məlumata görə, vəsait kommunal xidmətlərin ödənilməsinə, evlərin bərpasına, pensiya, əmək haqları və s. ödənişlərə sərf olunacaq.
Qeyd edək ki, ötən ilin noyabrından Ermənistan Qarabağın sülhməramlı qüvvələrin müvəqqəti nəzarəti altında olan hissəsinə 207 milyon dollar vəsait ayırıb. Bu halın özü bir daha Ermənistanın Azərbaycanın daxili işlərinə qarışdığını və separatçı meylləri dəstəklədiyini sübut edir. Hər halda, Azərbaycanın öz erməni əsilli əhalisinə bu müavinətləri ödəmək üçün vəsaiti yetərincədir. Ancaq bununa Ermənistan imkan vermir. Var gücü ilə separatçı meyllərə dəstək verir ki, Qarabağdakı yerli əhali öz qanuni dövlətləri olan Azərbaycana müraciət etməsinlər. Bu cür maliyyə cinayətlərinin qarşısını almaq üçün hansı addımlar atıla bilər?
Beynəlxalq idarəetmə üzrə ekspert, iqtisadçı Asif İbrahimov “Bakı-Xəbər”ə açıqlamasında bildirdi ki, ermənilərin separatçı meylləri ötən əsrdən başlayıb: “Onlar həmin zamandan gizli yolla vəsait toplayırdılar. Sonra bu hallar silahlanmaya, daha sonra isə müharibəyə səbəb oldu. Həmin vaxt da Qarabağdakı separatçılar Ermənistandakı gizli maliyyə qaynaqları tərəfindən maliyyələşirdilər. Sonra işğal dönəmi başladı. Qarabağdakı bir ovuc erməni yenə də Ermənistandan asılı vəziyyətdə qaldı. İkinci Qarabağ müharibəsindən sonra isə onlar daha da rəzil vəziyyətə düşüblər. Ermənistan göstərməyə çalışır ki, Qarabağdakı ermənilərin bütün problemlərini həll etməyə qadirdir. Qarabağda aldadılmış bir əhali var. Həmin ermənilər indi başa düşür ki, atdıqları addım səhv olub. Qəbul edirik ki, orada yaşayan əhalinin zəruri ehtiyacları var. Ancaq bunlar Ermənistan tərəfdən ödənilməməlidir. Sadəcə, Ermənistan fakt qarşısında qaldığı üçün bunu etməyə məcburdu. Diqqət yetirdinizsə, həmin vəsait məhz sosial təminatlar üçün ayrılıb. Nəyin bahasına olursa-olsun, ermənilərin Qarabağda qalışını təmin etmək istəyirlər. Bunu da Azərbaycan dövlətini yerli əhalidən təcrid etmək yolu ilə həyata keçirirlər. Vətən müharibəsindən əvvəl 17 min kvadrat kilometr ərazi ermənilərin əlinə keçmişdi. Biz həmin ərazilərin böyük hissəsini azad etdik. Hazırda sülhməramlıların nəzarətində az bir ərazi qalıb. Həmin ərazidə iki iqtisadi rayon mövcud olub - Yuxarı Qarabağ və Kəlbəcər-Laçın iqtisadi rayonu. Ermənilər həmin ərazilərdə olan bütün təbii ehtiyatlardan yararlanırdılar. İndi bu da əllərindən çıxıb. Əhalinin kütləvi işsizliyi də bu səbəbdən yaranıb. Ermənistanda taxıl tələbətı 200 min tondu. Onun 150 min tonu işğalda olan ərazidən yığılırdı. Yerdə qalan 50 min tonu özlərində yetişdirirdilər və Rusiyadan idxal edirdilər. Azərbaycan bu acınacaqlı vəziyyəti görür. Prezident öz çıxışında dedi ki, biz Qarabağdakı 25 min ermənini iş və digər zəruri təminatlarla əhatə etməyə hazırıq. Bundan nəticə çıxarmalıdırlar. Ermənistanın Qarabağa pul ayırması beynəlxalq səviyyədə maliyyə cinayəti sayılır. Bununla da bağlı dünyanın maliyyə qurumlarına müraciət etməliyik ki, həmin dövlət qurumlarının hesablarına həbs qoyulsun. Çünki bu birbaşa terrorizmə verilən maliyyə dəstəyi anlamına gəlir”.
Məhəmmədəli QƏRİBLİ
