44 günlük müharibə nəticəsində Ermənistan iqtisadiyyatı və sosial həyatında yaranan faciəli vəziyyət hələ aradan qalxmayıb.
Erməni mediasının yaydığı məlumata görə, bunu Ermənistanın baş naziri Nikol Paşinyan sentyabrın 30-da dövlət büdcəsinin müzakirəsi zamanı bildirib.
O, 2021-ci il iyunun 20-də keçirilən növbədənkənar parlament seçkiləri ilə daxili siyasi böhranın aradan qalxdığını deyib: “Təhlükəsizliyə böyük diqqət yetirəcəyik. Çünki onsuz uzunmüddətli inkişaf məqsədlərinə çatmaq mümkün deyil. Bu mənada, təkcə ordunun, müdafiə qabiliyyətinin modernləşdirilməsi deyil, həm də Ermənistan ətrafında əlverişli xarici mühitin yaradılması, Ermənistan, Qarabağ və region üçün dinc inkişaf dövrünün açılması gündəminin ardıcıl şəkildə həyata keçirilməsi lazımdır”.
Regional sabitlikdən danışarkən, baş nazir kommunikasiyaların açılması və inkişaf etdirilməsi məsələsinin vacibliyini qeyd edib. Paşinyan vurğulayıb ki, bu məsələnin həlli Ermənistan iqtisadiyyatının inkişafı üçün əlavə stimul yaradacaq, iqtisadi artımı təmin edəcək və ölkənin xarici investisiyalar üçün cəlbediciliyini artıracaq.
O da məlumdur ki, bu, Paşinyanın yuxarıda sadalanan məsələlərlə bağlı ilk açıqlaması deyil. Bundan əvvəl də o bənzər fikirlər səsləndirib, amma bütün bunların reallaşması istiqamətində əməli addımlar atmayıb. O baxımdan maraqlıdır, Paşinyanın bu fikirləri növbəti aldadıcı siyasi manevrdir, yoxsa yaxın günlərdə hansısa kompromis addımlar atacaq?
“Revanşist müxalifətin təzyiqlərini neytrallaşdırmaqdan ötrü mərhələli şəkildə bu istıqamətdə bəzi addımlar atmaq istəyir”
Məsələyə münasibət bildirən sabiq diplomat, politoloq Fikrət Sadıqovun fikrincə, Paşinyan bu cür açıqlamalarla çıxış etməklə ictimai rəyi müəyyən addımların atılmasına hazırlayır: “Düzdür, Paşinyan uzun müddətdir qalmaqallı açıqlamalarla çıxış edir. Bu minvalla bir müddət cəmiyyəti sakitləşdirməyə çalışdı. Ancaq sözügedən metod artıq onu xilas edə bilmir. Reallıq ondan ibarətdir ki, ölkədə sosial-iqtisadi vəziyyət çox mürəkkəbdir. Son zamanlar Türkiyə və Azərbaycanın Ermənistana təzyiqi o dərəcədə güclənib ki, artıq aldadıcı manevrlər nəyəsə yaramır. Paşinyan anlayır ki, nəqliyyat dəhlizləri gec-tez açılmalıdır. Görünən odur ki, Paşinyan bu yöndə açıqlamalar verməklə erməni cəmiyyətini kommunikasiya xətlərinin açılmasına hazırlayır. Çünki o fərqindədir ki, Ermənistan iqtisadiyyatı çöküb. Kommunikasiyalar bağlı qalanda isə vəziyyət daha da pisləşəcək. Nəticədə Ermənistan sadəcə olaraq bu problemləri həll edə bilməyəcək. Böhran ölkədə faciəli nəticələrə yol açacaq. O üzdən belə mesajlar verir ki, müəyyən dairələr bununla razılaşsın. Xüsusən də revanşist müxalifətin təzyiqlərini neytrallaşdırmaqdan ötrü mərhələli şəkildə bu istıqamətdə bəzi addımlar atmaq istəyir. Bir məqamı da nəzərə almaq lazımdır ki, kommunikasiya xətlərinin açılması ilə əlaqədar Rusiya və Qərbdən də Ermənistana müəyyən təzyiqlər var. Elə Ərdoğan-Putin görüşündə də bu məsələnin müzakirə olunduğu güman edilir. Görünür, bununla bağlı müəyyən razılıq əldə edilib. Çünki Ərdoğan mətbuat konfransında dəhlizlə bağlı konkret ifadələr səsləndirdi. Bundan belə nəticə çıxarmaq lazımdır ki, dəhlizlərin açılması qaçılmazdır”.
Politoloq hesab edir ki, proseslər buna doğru gedir.
Vidadi ORDAHALLI
