Azərbaycanın 44 günlük müharibədə qazandığı zəfər, belə çıxır ki, Ermənistandan çox İranı narahat edir. Müharibə dövründə bizə qarşı təxribatları azmış kimi, postmüharibə dövründə də bu əməllərini ən müxtəlif formada davam etdirir. Azərbaycanda qarışıqlıq yaratmaq üçün hər cür vasitəyə əl atan cənub qonşumuz son günlər qara piar kampaniyasının “barıtını” daha çox qoymağa başlayıb. Öz çirkin niyyətlərinə, təxribatlarına bəzi Azərbaycan vətəndaşlarını da alət etməyə cəhd edir.
Məlum olduğu kimi, İran ölkəmizə qarşı həyata keçirdiyi çirkin əməllərində Azərbaycan vətəndaşlarından istifadə etməyə başlayıb, “qadın möminlər"i qarayaxma kampaniyasına qoşur. Qadınlardan istifadə etməklə hədyanlar yağdırır. “Zeynəbçilər meydanda” adi altında bəzi qadınlar Azərbatcana qarşı təxribatçı çıxışlar edir, videolar çəkib paylaşır. Teleqram və başqa sosial şəbəkələrdə də belə videolar yayırlar. Son günlər “İranın ağzı ilə danışan” bir qadının videosu peyda olub və bu qadın videoda Azərbaycanı hədəfə alaraq, dolayısı ilə, ad çəkmədən ölkə rəhbərliyini Müaviyə və Fironla müqayisə edir. Bu isə, əlbəttə, böyük təxribatdır və bu işlə hüquq-mühafizə orqanlarının məşğul olacağı şübhəsizdir. Öz dövlətinin maraqlarını İrana satanlara isə vətəndaş deməyə adamın dili gəlmir.
“Bu cür cahil adamların arxasında duran, onları əlində alət edən İran...”
Siyasi şərhçi Azər Həsrət “Bakı-Xəbər”ə bildirdi ki, İranın bu kimi təxribatlara əl atması, qadınlardan istifadə etməsi, möminlərin inancından sui-istifadə etməsi və onları öz çirkin əməllərinə şərik etməsi yeni bir hal deyil, biz dəfələrlə bunun şahidi olmuşuq: “Bu kimi halların baş verməsi gözlənilməz deyildi, bunları təsadüfi saymayaq. İran kimi ölkələr ortalığı bu kimi qıcıqlandırıcı çıxışlarla, paylaşımlarla, videolarla qarşıdırmaq istəyirlər. Azərbaycan və İran dövlətləri arasındakı münasibətlər, təbii ki, bu cür adamlardan asılı deyil. İkinci bir tərəfdən də, sir-sifətlərindən cəhalət yağan bu tip adamlar nə Azərbaycan dövətinə, nə onun rəhbərinə, nə də xalqımıza hansısa mənfi təsir edəcək gücdədir. Yayılan videolara da baxıram, adamların üzündən cəhalət yağır. Sanki 1500 il bundan əvvəlki bir mağara adamına bənzəyir. Yəni belə adamlar Azərbaycan ictimaiyyətini yerindən oynada bilərmi? Təbii ki, oynada bilməz. Çünki Azərbaycan özünün intellektinə görə seçilən ölkədir, Azərbaycan xalqı dünyadakı azsaylı xalqlardandır ki, yüz faiz savadlılığı var. Azərbaycan toplumunu İranın hansısa cahil uzantıları nə aşağılaya, nə də yerindən oynada bilər”.
İranın cahilləri öz çirkin məqsədlərinə alət etdiyini qeyd edən A.Həsrət hesab edir ki, ölkəmizdə, az sayda da olsa, ola bilsin bu cahillərin səsinə səs verən olsun, amma onların səsi də heç nəyi həll etməz, biz bundan narahat deyilik: “Azərbaycan əhalisinin mütləq əksəriyyəti ağlıkəsən və intellektli insanlardır. Bu cür cahil adamların arxasında duran, onları əlində alət edən İran, yaxud hansısa dairələr öz cəhalət hikkələrində boğulacaqlar, onlar uzağa gedə bilməyəcəklər”.
A.Həsrət hesab edir ki, İrandakı bəzi dailərin cəhdlərinə baxmayaraq, İran və Azərbaycan dövlətlərinin münasibətləri normal şəkildə davam edəcək, biz dinc qonşuluq şəraitində yaşamışıq, bundan sonra da yaşayacağıq. “İndi ağlı kəsmədən bu cür gedişlərlə bizə guya nəyisə sübut etmək istəyənlər də öz daxili tələbatlarını ödəməklə məşğuldurlar, başqa bir şey deyil. Bu cür üzündən cəhalət yağan adamlarla üstümüzə gələnlər özləri cahillərin ən böyüyüdür. Çünki Azərbaycan cəmiyyəti belə sifətdə, belə görkəmdə adamlara aldanacaq cəmiyyət deyil”-deyə A.Həsrət vurğuladı.
İradə SARIYEVA
