Məlum olduğu kimi, 27 sentyabr 2021-ci il tarixdə Vətən müharibəsi zamanı həlak olmuş vətəndaşlarımızın ruhuna ehtiram əlaməti olaraq respublikamızın şəhər və rayonlarında anım tədbirləri keçirilib. Tədbirlərdə xalqımızın haqq savaşında canından keçmiş Vətən övladlarının əziz xatirəsi yad olunub, məzarları ziyarət edilib.
Dövlət Təhlükəsizliyi Xidmətinin İctimai əlaqələr şöbəsinin məlumatına görə, bir sıra hallarda bəzi şəxslərin Vətən müharibəsi şəhidlərinin anım mərasimlərindən məqsədyönlü şəkildə, radikal dini-ideoloji ayrıseçkilik təbliğatı niyyəti ilə istifadə etməklə müxtəlif dövlətlərə qarşı dini, irqi zəmində düşmənçilik çağırışları edib tədbirlərin keçirildiyi yerlərdən videoçəkilişlər apararaq yaymaları, cəmiyyətin və dövlətin mənafelərinə ziyan vuran hərəkətlərə yol vermələri təsbit olunub.
Qeyd olunan şəxslər Dövlət Təhlükəsizliyi Xidmətinə dəvət olunaraq qanunazidd davranışlarının qarşısı alınıb, dini, irqi və ya digər mənsubiyyətindən asılı olaraq nifrət və düşmənçiliyin salınmasına yönələn çağırışlarının Azərbaycan qanunları ilə müəyyən edilən qaydada məsuliyyətə səbəb olduğu barədə xəbərdar ediliblər: "Bildiririk ki, Azərbaycan Respublikasının Konstitusiyasına, cəmiyyətin və dövlətin qanunla qorunan mənafelərinə və təhlükəsizlik maraqlarına zidd davranışların qarşısı bundan sonra da qətiyyətlə alınacaq".
Bu cür hadisələrin İrana qarşı Azərbaycandan həm rəsmi, həm də ictimaiyyət səviyyəsində etirazların bildirildildiyi dönəmə təsadüf etməsi maraqlı görünür. Çünki adətən bu tip şüarlar İranmeyilli dindarların dilindən eşidilir. Belə hadisələrdə İranın təsirinin olması nə dərəcədə əsaslı görünə bilər?
İlahiyyatçı Tural İrfan “Bakı-Xəbər”ə açıqlamasında bildirdi ki, son dövrlər İranla bağlı yaranmış narazılıqlar, anlaşılmazlıqlar fonunda İran ölkəmiz daxilindəki siyasi rıçaqlarını, dayaqlarını işə salmağa cəhd edir: “Onlardan biri Nardaran məsələsində həbs olunub. Təəssüf ki, rəhbərləri həbs olunsa da, davamçıları fəal şəkildə fəaliyyət göstərir. Yəqin ki, dövlət orqanlarının məlumatı olar bunların böyük qadın şəbəkəsi yaradıb məclislər təşkil etməsindən. Yas məclislərindən, əsasən son vaxtlar çox istifadə edirlər. Şəhid ailələrinin, güya ki, ziyarətlərinə gedirlər və orada da şəhid analarını öz tərəflərinə çəkirlər, belə deyək, inandırırlar. Bunun da altında İran siyasəti gedir, burda din yoxdur. Çox təəssüf ki, Azərbaycanda bu yarandı. Biz illərlə deyirik, danışırıq, tənqid edirik, amma çox təəssüflər olsun ki, buna göz yumuldu. Məsələn, Şahin Həsənli var, bu adam Azərbaycanda İranın iki nömrəli adamıdır. Bir nömrəli nümayəndəsi isə Ocaq Necatdır.
O qadınlar da məhz “Məşədi Dadaş” məscidi deyilən yerdən təlimat alırlar. Hacı Şahinin “YouTube”-da 3 çıxışına baxmaq kifayətdir ki, onun kim olduğuna daha da əmin olaq. Danışdığı dini rəvayətlərində belə İrandan bəhs edir. Zəncandan və Şirazdan daha sıx-sıx danışır. İsraillə Azərbaycanın tarixə söykənən böyük dostluq əlaqələri var. İsrailin Azərbaycanla tarixi yəhudilərin Xəzər xaqanlığına gedib çıxır. İran özünə süni dostlar və düşmənlər seçib. İran qeyri-səmimi bir dövlətdir, onun nə dostu, nə düşməni var. İran əslində nə Amerika, nə də İsraillə düşməndir. Özünüz də araşdıra bilərsiniz ki, 8 illik İraq-İran müharibəsində İranın ən çox silah aldığı ölkə İsrail dövləti idi. Günümüzdə Fələstin məsələlərində İsrail İrana bir daş belə atmayıb. Bu çəkişmə fonunda zahiri cəhətdən İran özünü gücləndirir, daxildəki dini birliyin pozulmasına imkan vermir.
Onların Azərbaycanda "İmdad" komitəsinin olması da bu səbəbdəndir. Güya burda fəaliyyət göstəriblər, kimlərəsə ehsan paylayıblar. Həmin qadınların yasda təbliğ etdikləri də bu idi. Həmin komitənin Azərbaycanda fəaliyyəti çox böyükdür, hətta onlar insanları ölümlə hədələyirlər. Şəxsən mənim özümə də təhdid ismarıcları gəlib ki, bu söhbətləri yığışdır. Mən təəccüb edirəm ki, ölkəmizdə bu vaxta qədər onların qarşısı alınmayıb. O qadınlar hələ bu qurumun görünən tərəfidi, sadəcə qığılcım yaratmaq üçün istifadə olunurlar. Mən təsəvvür edə bilmirəm onlar hədəflərinə yaxınlaşsalar nələr baş verə bilər.
Nardaran hadisələrində həbs edilən Hacı Talehin qaynanası, həyat yoldaşı və ətrafında olan digərləri o qadınlara başçılıq edirlər. Hətta onlar qapı-qapı düşərək İsrail və dövlət əleyhinə bu cür şəbəkələr yaradır. Xüsusən şəhid analarını hədəf seçərək, yas bəhanəsi ilə öz dini məclislərini təşkil edirlər.
Mən açıq deyəcəm ki, dövlət adamları bu barədə o qədər də dərindən məlumatlı deyil.
Dinin çox dərin və problemli məsələləri var. Bu məsələ ondan ibarətdir ki, deyilən sistem Azərbaycanda qurulub və kök atıb. Bununla ciddi mübarizə aparılmalıdır”.
Məhəmmədəli QƏRİBLİ
