“Bizim icazəmiz olmadan o bölgələrə heç bir xarici vətəndaş, yaxud da ki, avtomobil daxil ola bilməz”. Bunu Prezident İlham Əliyev “Anadolu” Agentliyinə müsahibəsində deyib.
Ölkə başçısının sözlərinə görə, biz bütün bu hallarla bağlı Rusiyaya öz haqlı iradlarımızı bildiririk: “Ümumilikdə, Rusiya sülhməramlı qüvvələrinin fəaliyyəti müsbət qiymətləndirilə bilər. Əlbəttə ki, bizim narazılığımız da var, iradlarımız da var - ilk növbədə, xarici vətəndaşların ərazimizə qanunsuz olaraq gəlməsi ilə bağlı. Biz dəfələrlə bu məsələni qaldırmışıq. Çünki Qarabağ bizim ərazimizdir və bizim icazəmiz olmadan o bölgələrə heç bir xarici vətəndaş, yaxud da ki, avtomobil daxil ola bilməz, bizdən icazə alınmalıdır. Ancaq deyə bilərəm ki, bu hələ tam yüz faiz həll olunmayıb. Halbuki onu da deməliyəm ki, xarici vətəndaşların Qarabağa qanunsuz gəlməsi halları çox az saydadır. Onu da bildirməliyəm ki, bizim siyasətimiz və təkidimiz nəticəsində artıq bu prosesə də son qoyulur. Ancaq biz, əlbəttə, istərdik ki, suverenliyimizə, ərazi bütövlüyümüzə tam miqyasda, tam həcmdə sayğı göstərilsin. Zatən, Rusiyanın rəsmi nümayəndələri, yüksəkvəzifəli nümayəndələr deyirlər ki, Qarabağ Azərbaycan torpağıdır və belə olan halda, yerlərdə, orada xidmət göstərən hərbçilər də bu bəyanatlara uyğun şəkildə öz fəaliyyətini aparmalıdır”.
Görünən odur ki, Azərbaycan sözügedən məsələdə daha qətiyyətli mövqe sərgiləyir. Bu kimi hallara birdəfəlik son qoyulmasında qərarlıdır. O baxımdan ölkə başçısının bu iradı sülhməramlılara ciddi siqnal olmalıdır.
“Bununla bağlı Azərbaycanın daha qətiyyətli mövqedən çıxış etməsi tamamilə düzgün yanaşmadır”
Məsələyə münasibət bildirən İrəvan Azadlıq Təşkilatının sədri Təbriz Musayevin fikrincə, Azərbaycan hər keçən gün öz mövqelərini möhkəmləndirdikcə, sözügedən məsələ ilə bağlı daha qətiyyətli mövqedən çıxış edir: “Hesab edirəm ki, bu tamamilə düzgün yanaşmadır. Rusiya sülhməramlılarının fəaliyyətə başladıqları ilk dövrlərdə xarici ölkə vətəndaşlarının Qarabağa qanunsuz səfərləri daha çox müşahidə edilirdi. Xüsusən də əcnəbi media qurumları belə vəziyyətdən bacardıqları qədər sui-istifadə edirdilər. Rusiya sülhməramlıları əksər hallarda buna göz yumurdular. Ancaq Azərbaycan tərəfi iradlarını bildirdikdən sonra belə halların sayı əhəmiyyətli dərəcədə azaldı. Lakin ara-sıra belə hallar baş verir. Bir müddət əvvəl Fransa Milli Assambleyyasının üzvləri qanunsuz olaraq Qarabağa səfər etdilər. İrandan Qarabağa qanunsuz olaraq gedən TIR-lara qarşı Azərbaycanın gördüyü sərt tədbirlər göstərdi ki, rəsmi Bakı bu kimi qanunsuz hallara sona qədər dözməyəcək. İran rəsmiləri utanmadan bunu özəl şirkətlərin üstünə atdılar. Guya ki, onların bundan xəbəri yoxdur. Əslində hamı yaxşı bilirdi ki, bu sadəcə ağ yalandır. İstənilən halda, Qarabağa qanunsuz səfərlərin önlənməsi Rusiya sülhməramlılarından çox asılıdır. Ona görə ki, Laçın dəhlizi onların məsuliyyət zonasına daxildir. Bu dəhliz də Qarabağı Ermənistanla əlaqələndirən yeganə yoldur. Düzdür, Ağdərə-Basarkeçər yolu da var, amma həmin yol Kəlbəcər bizim nəzarətimizə keçəndən sonra bağlıdır. O baxımdan Rusiya sülhməramlıları borcludular ki, 10 noyabr razılaşmasından irəli gələn məsələləri təmin etsinlər. Heç bir xarici vətəndaşı Azərbaycanın icazəsi olmadan Qarabağa buraxmasınlar”.
İAT sədri onu da qeyd etdi ki, Azərbaycan daim bu məsələləri bütün səviyyələrdə diqqət mərkəzində saxlamalıdır.
Vidadi ORDAHALLI
