Sosial şəbəkələrdə Rusiyanın sülhməramlı adlanan hərbçilərinin Laçın dəhlizindən ermənilərin avtomobillərinə necə baxış keçirdiyinə dair video paylaşılıb. Həmin videodan görünür ki, Ermənistandan avtomobillə Azərbaycan Respublikasının Qarabağ ərazisinə gələn 5 nəfər ermənini yalnız sürücünün sənədinə ötəri baxmaqla buraxırlar.
Sözügedən avtomobildəki 5 nəfərdən biri olan əməkdaş Gorus-Laçın-Şuşa-Xankəndi yolu ilə sərbəst səfərlərindən bəhs edir. Xocavənddəki Amaras məbədini də ziyarət edən erməniləri yol boyu - düz Kəlbəcər rayonunun Çərəktar kəndindəki posta qədər yalnız iki yerdə yoxlayırlar: Ermənistanın Tex kəndi yaxınlığındakı Ermənistan-Azərbaycan sərhədindəki erməni sərhədçilər və Zabux kəndindəki 1 nömrəli postdakı Rusiya hərbçiləri.
Hərbçilərdən biri yalnız “Biz 5 nəfərik, Stepanakertə - evimizə gedirik” deyən sürücünün sənədinə ötəri, gözucu baxmaqla “sağ olun” deyib avtomobili irəli –Azərbaycan torpaqlarına buraxır. Halbuki, bir neçə gün öncə də Rusiya MN-in rəsmi saytındakı məlumatda Rusiya "sülhməramlı"larının komandanlığı "Laçın dəhlizindən Qarabağa gedən hər bir maşını diqqətlə yoxladıqlarını, şübhə yarandıqda təkrar yoxlanışdan keçirdikləri"ni bildirib.
Bu cür laqeyd davranış Rusiya sülhməramlılarının nəzərdə tutulan fəaliyyətinə uyğundurmu?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, bu cür hallar bir daha sülhməramlıların öz işlərinin öhdəsindən gəlmədiyini sübut edir: “Görünən budur ki, onlar maksimum dərəcədə çalışırlar Qarabağdakı ermənilərin sayını artırsınlar. Hətta onlar öz səlahiyyətlərinə aid olmayan qurumlar da yaradıblar. Miqrasiya, təhsil, fövqəladə halların sülhməramlılara nə aidiyyəti var? Bunu anlaya bilmirəm. Dolayısı ilə orada dövlət qurumu təsis edirlər. Hətta saylarını da artırırlar. Hesab edirəm ki, buna son qoymağın vaxtı çatıb. Azərbaycan Gorus-Qafan yolunda qoyduğu postdan birini də Laçın dəhlizində qurmalıdır. Hər bir ölkənin suveren hüququdur ki, öz sərhədlərinə nəzarət etsin. Biz görürük ki, Rusiya sülhməramlıları bu işin öhdəsindən gələ bilmir. Bölgədə maraqlı proseslər yaşanır. Türkiyə və Rusiya prezidentlərinin görüşündən də gördük ki, Moskva qardaş ölkənin buradakı mövcudluğunu qəbul etməyə başlayıb. Biz 25 min erməni əsilli vətəndaşlarımızla birgə yaşayışı təmin edə bilərik. Yetər ki, oradakı silahlılar uzaqlaşsınlar. Hiss olunur ki, sülhməramlılar buna imkan vermək istəmir. Görürük ki, Ermənistan açılacaq Zəngəzur dəhlizi ilə bağlı şərt qoyur ki, orada rus hərbçiləri ilə yanaşı onların da nəzarəti olsun. Belədirsə, biz niyə Laçın dəhlizinə nəzarət etməməliyik? Bölgəni sülhə hazırlamaq istəyirlərsə, ilk növbədə sərhədlərin dəqiqləşməsi həyata keçməlidir. Bunun üçün də Laçın dəhlizi nəzarətə götürülməlidir. Biz oradan humanitar məqəsdlər üçün istifadəyə icazə verdik. Amma görürük ki, həmin yolla Ermənistandan ürəkləri istəyəni keçirirlər. Hətta bizim icazəmiz olmadan xarici vətəndaşlar belə Ermənistan vasitəsilə Qarabağa səfərlər edir. Biz görürük ki, regionda gərginliyin artmasında maraqlı olan qüvvələr var. Onların neytrallaşması üçün Rusiya da obyektiv mövqe ortaya qoymalıdır. Sülhməramlı missiyanı üzərinə götürən ölkə onun normal fəaliyyətini də tənzimləməlidir. Əks təqdirdə Azərbaycanın özü müəyyən addımlar atmağa məcbur qalacaq”.
Məhəmmədəli QƏRİBLİ
