Postmüharibə dövründə yaranan reallıqlar bölgədə dayanıqlı sülhə xidmət edir. Sadəcə, bu istiqamətdə əməli fəaliyyətə başlamaq lazımdır və bu prosesdə məsuliyyət yalnız Azərbaycanın üzərinə düşmür. Azərbaycan 10 noyabr razılaşmasından irəli gələn sazişə istinad edərək konstruktiv təkliflərini irəli sürüb.
Baki-xeber.com xəbər verir ki, bunu Milli Məclisin deputatı Könül Nurullayeva deyib.
K.Nurullayeva bildirib ki, Ermənistanın bu istiqamətdə konkret addımlar atmasına ehtiyac var. Amma görünən budur ki, Ermənistan hələlik mövcud reallığı düzgün təhlil edə bilmir. Prezident İlham Əliyev bir neçə gün əvvəl "France 24" kanalına müsahibəsində də bu məsələyə diqqət çəkməklə həm də sülhyaratma prosesinə mane olmağa çalışan bəzi güclərə ismarıc vermiş oldu. Əsas tezis ondan ibarətdir ki, yeni mərhələdə söhbət təkcə dialoqun başlanılmasından getmir, eyni zamanda, Azərbaycan və Ermənistan arasında gələcək sülh razılaşmasının üzərində aparılacaq işdən də gedir. Yəni, rəsmi Bakının bütün səyləri regionu daha da proqnozlaşdırıla bilən, sabit və təhlükəsiz regiona çevirməyə yönəlib. Çünki 30 ilə yaxın davam edən işğal da göstərdi ki, Cənubi Qafqaz regionunun əməkdaşlığa, sülhə ehtiyacı var.
Dövlət başçısının da söylədiyi kimi, bizim mövqeyimiz çox aydındır. Biz münaqişənin həll olunduğunu hesab edirik, keçmişə qayıdış olmamalıdır, Ermənistanda revanşizm əlamətləri olmamalıdır. Biz gələcək haqqında, sülh haqqında və regionu necə daha da sabit və təhlükəsiz etmək imkanları haqqında danışmalıyıq. Amma "France 24"ün əməkdaşının iddia etdiyi kimi, bunun üçün Ermənistan baş nazirinə zəng etməyə ehtiyac yoxdur. ATƏT-in Minsk Qrupunun həmsədrləri sülh prosesini sürətləndirən dialoq yaratmağa çalışmalıdır. Eyni zamanda Ermənistana revanşizm səylərindən vaz keçmək və gələcəyə doğru baxmaq üçün onlara xəbərdarlıq etmək vaxtıdır. Dövlət başçısının da söylədiyi kimi, Ermənistan, ilk növbədə, Azərbaycana qarşı istənilən ərazi iddiasını geri götürməli və özünü yaxşı aparmalıdır. Biz isə adekvat münasibət göstərəcəyik.
Qarabağa muxtariyyət verilməsilə bağlı iddialara da Azərbaycanın cavabı kifayət qədər də aydındır. Rəsmi Bakə hər zaman Azərbaycanda yaşayan ermənilərə müəyyən səviyyədə özünüidarəetmə təqdim etməyə hazır olub, ermənilər isə hər zaman bunu rədd edərək, müstəqillik xülyası ilə yaşayıblar. Amma bu gün münaqişə başa çatdığından onlar muxtariyyət haqqında danışırlar. Bu isə təbii ki, Azərbaycanın gündəliyinə daxil deyil. Amma reallıq bundan ibarətdir ki, Qarabağda Rusiya sülhməramlılarının məsuliyyət zonasında yaşayan ermənilər ölkəmizdə yaşayan digər etnik qrupların nümayəndələri kimi Azərbaycan vətəndaşlarıdır. Bir sözlə, Azərbaycanın bütün tribunalardan verdiyi mesaj ondan ibarətdir ki, Azərbaycan Cənubi Qafqaz regionunda yeni reallıqlar yaradıb və hər kəs bunu nəzərə almalıdır. “Ermənistan regional əməkdaşlıq və qonşularına qarşı qanunsuz və əsassız ərazi iddiaları arasında seçim etməlidir. Beynəlxalq ictimaiyyət bu mənada müsbət rol oynamalı və sülhün alternativinin olmamasını dərk etmək üçün Ermənistana çağırış etməlidir. Ermənistanda revanşizmin və onun silahlandırılmasının birbaşa və ya dolayı şəkildə dəstəklənməsi cəhdlərinə son qoyulmalıdır”.
