Prezident İlham Əliyev sentyabrın 28-də Fransanın “France-24” televiziya kanalına müsahibəsində deyib ki, “Sərhədsiz reportyorlar” təşkilatının hesabatı onun və Azərbaycan xalqı üçün heç bir əhəmiyyət daşımır:
"Əvvəlcə deyim ki, biz “Sərhədsiz reportyorlar” kimi QHT təşkilatı ilə uzun illər əvvəl hər hansı ünsiyyəti dayandırmışıq. Bu, bəlkə də 15 il əvvəl baş verib və bu, onların Azərbaycanla bağlı çox qərəzli və ədalətsiz mövqeyi ilə əlaqədardır. Bu səbəbdən onların hesabatı mənim üçün və Azərbaycan xalqı üçün heç bir əhəmiyyət daşımır. Avropada, o cümlədən Fransada yüzlərlə insan yaşayır və Azərbaycanda gördüyümüz işlər onların xoşlarına gəlmir. Onlar Fransada, başqa ölkələrdə yaşayırlar və heç kəs onlara toxunmur. Əgər sizin ölkədə yaşayan insanla bağlı hadisə baş verirsə, bunun araşdırılması məhz sizin ölkənizin hüquq-mühafizə orqanlarının işidir. Azərbaycanı bu məsələdə günahlandırmaq QHT-nin işi deyil. Sizin istintaqçıların bıçaqla xəsarət yetirmə halı ilə bağlı kifayət qədər sübutları varmi?"
Bununla Prezident dünya auditoriyasına özünü obyektiv jurnalist təsisatı kimi tanıdan təşkilat barədə həqiqətləri söylədi. “Sərhədsiz reportyorlar”ın özünü Azərbaycanda bu şəkildə nüfuzdan salmasının daha hansı səbəbləri var?
Media eksperti Müşfiq Ələsgərli “Bakı-Xəbər”ə bildirdi ki, “Sərhədsiz Reportyorlar” siyasi konyunkturaya uyğun hərəkət edir: “Azərbaycan müstəqillik qazandıqdan, demokratik inkişaf yoluna qədəm qoyduqdan sonra dünyanın bütün məşhur beynəlxalq təşkilatları - kimlər ki, özlərini demokratiya, insan haqları, söz və ifadə azadlığı uğrunda çalışan kimi elan edib - hamısı ölkəmizə gəliblər, burada fəaliyyət qurublar. Azərbaycan Avropadan gələn hər kəsə səmimi şəkildə qucaq açıb, onları elan etdikləri missiyanın icraçısı kimi qəbul edib. Amma təəssüf ki, zaman keçdikcə bu təşkilatlardan bir qisminin yalanları üzə çıxıb, demokratiya, insan haqları, söz, ifadə azadlığının bir bəhanə olduğu görünüb. Bu təşkilatlar manipulyativ məqsədlərlə yaranıblar, böyük güclərin maraqlarına uyğun fəaliyyət göstərirlər.Azərbaycan da məcbur qalıb onlarla məsafəli davrandı, əməkdaşlıqdan yayındı. Həmin təşkilatların sıralarında “Sərhədsiz Reportyorlar” da var. Təkcə “Sərhədsiz Reportyorlar” deyil, "Freedom House", "Human Rights Watch", "Amnesty International" və digərləri də orada yer tutub. Onlar lazımi məqamlarda bir mərkəzdən koordinasiya edilə bilirlər, marağına xidmət etdikləri ölkələrin siyasətinə uyğun olaraq, hansısa dövlətləri hədəf seçirlər, ittiham edib gözdən salırlar. Onlar tendensiyalı, siyasi konyunkturaya uyğun davranırlar. Fransa, ABŞ, Ermənistan və maraqlarında olan digər ölkələrdə qeyri-demokratik proseslərə göz yumurlar, başqa ölkələrdə isə insidentləri zərrəbinlə axtarırlar, olmayan faktları da uydurub siyahıya salırlar. Təcrübə göstərir ki, onların davası demokratiya, söz-ifadə azadlığı, insan haqları deyil, fərqli maraqları, fərqli prinsipləri var. Min kilometrlərlə uzaqda yerləşən Azərbaycanda ən xırda detalı belə araşdırırlar, faktları yanlış şərh edirlər, kontekstdən çıxarırlar, hətta zərurət duyanda, uydurma “faktlar” quraşdırırlar, amma öz ofislərindən yüz metr aralıda baş verən insidentlərə baxmırlar. Onların Parisdə, Vaşinqtonda araşdırmalı olduqları, amma göz yumduqları çoxsaylı problemlər var. Məsələn, iki gün öncə məlumat yayıldı ki, Fransa prezidenti Emmanuel Makron onun şəkillərini çəkib nümayiş etdirdiyi üçün Paris qalereyasının sahibini və şəkli çəkən jurnalisti məhkəməyə verib. Bu, Makronun media təmsilçilərinə qarşı qaldırdığı ilk iddia deyil, 3 il öncə də bənzər şikayətlə məhkəməyə üz tutmuşdu. Baxın “Sərhədsiz Reportyorlar”ın, "Freedom House", "Human Rights Watch", "Amnesty International"ın saytlarına, görün bu xəbəri tirajlayıblarmı, pisləyiblərmi? Xeyr, heç bir münasibətləri yoxdur”.
Ekspertin sözlərinə görə, mövzu Fransa, ABŞ, Ermənistan olunca susurlar, Azərbaycan, Türkiyə və hədəfdə olan digər dövlətləri isə top atəşinə tuturlar:”Onların hədəfində konkret ölkələr var, yalnız hədəfdə olan ölkələri izləyir, ən kiçik insident üzərində kampaniya keçirirlər. Məqsəd qeydə alınmış insidentin nəticələrini aradan qaldırmaq, hüququ pozulanın haqqını bərpa etmək də deyil. Niyyət hədəfdə olan dövləti gözdən salmaq, öz tələblərini qəbul etdirməkdir. “Sərhədsiz Reportyorlar” da bugünlərdə aktivdir, Azərbaycanda blogerlərin, sosial şəbəkə istifadəçilərinin basqıya məruz qalması barədə qondarma xəbərlər yayır, bəyanatlar verir. Bütün bunlar təsadüfi deyil.“Sərhədsiz Reportyorlar” öz saytında rəsmi dəstəkçiləri barədə məlumat verib. Bu sırada Fransanın xarici işlər, daxili işlər və müdafiə nazirliklərinin adlarını qeyd edib. Təəssüf ki, belə “dəstək” onun fəaliyyətində özünü büruzə verir, onu siyasi konyunkturaya uyğun davranışa vadar edir. II Qarabağ savaşı zamanı Fransa Azərbaycana qarşı hansı mövqeyi sərgiləyibsə, “Sərhədsiz Reportyorlar” da eynisini təkrarlayıb. Məsələn, "Sərhədsiz Reportyorlar" II Qarabağ savaşı zamanı Azərbaycanla bağlı yanlış rəy formalaşdırmağa çalışdı. Azərbaycanı, guya “80 nəfər jurnalisti mühasirədə saxlamaqda, Xankəndidən təhlükəsiz çıxışına imkan verməməkdə” qınadı. Yalançı, ajiotaj yaradan informasiyalar yaydı. RSF həmin dövrdə Ermənistandan və xaricdən gələn jurnalistlərin döyüş bölgəsində Azərbaycan silahlı qüvvələri tərəfindən bilərəkdən atəşə tutulması barədə bir neçə dəfə açıqlama yaydı. Halbuki, həmin dövrdə Azərbaycan jurnalistləri Ermənistan silahlı qüvvələrinin hücumuna məruz qalırdılar. RSF bu barədə heç bir məlumat yaymadı.
Bu gün də bu təşkilatlar Azərbaycana qarşı aktiv əks-təbliğat aparırlar. ABŞ, Fransa rəhbərliyi ilə sinxron hərəkətlər edirlər”.
Məhəmmədəli QƏRİBLİ
