Maykl Rubin adlı ABŞ-dan olan analitik “National İnterest” adlı dərgidə “Dağlıq Qarabağ: ABŞ-ın Cənubi Qafqazdakı iflas ili” adlı “analitik” məqalə ilə çıxış edib. Həmin məqalə ilə tanış olandan sonra adamı heyrət bürüyür.
Yazının müəllifinin hansısa ABŞ vətəndaşı olduğuna qətiyyən inam qalmır. Dəqiq təəssürat yaranır ki, ya həmin məqalə ermənilər tərəfinfən hazırlanıb, yalnız imza yerinə Rubinin adı yazılıb, ya da analitik həmin sifarişli yazıya görə pul alıb. Çünki bu qədər ağ yalanı yalnız qərəzli olan və ya vicdan hissini itirmiş adam qələmə ala bilər.Yazıda qeyd olunur ki, ötən il Azərbaycan Türkiyənin və Suriyadan gətirilmiş muzdluların birbaşa dəstəyi ilə Qarabağa hücum etdi. Ən maraqlısı budur ki, müəllif Qarabağı Azərbaycanın ərazisi kimi deyil, mübahisəli yer kimi qələmə verir. Sonra bildirir ki, güya ABŞ hələ Ermənistanı işğal olunmuş ərazi kimi tanıyır. Bunu da SSRİ zamanı Ermənistanın zorla ilhaq edildiyi ilə isbatlamağa çalışır. Müəllif ABŞ hakimiyyətini Ermənistana lazımi dəstək verməməkdə günahlandırır və bildirir ki, Vaşinqton 907-ci Düzəlişin icrasını dayandırandan cəmi altı ay sonra Azərbaycan müharibəyə başladı. Müəllif müharibənin başladığı zamanı da təsadüfi saymır. İzah etməyə çalışır ki, həmin təqvim Türkiyənin ermənilərə qarşı “törətdiyi” saxta “soyqırımın” 100 illiyinə təsadüf edib. Ancaq vacib məqamı unudur ki, müharibəni biz deyil, Ermənistan başlayıb, biz yalnız əks-hücum əməliyyatları ilə cavab vermişik. Bunun ardınca müəllif qeyd edir ki, müharibə dayanan müddətdən indiyə kimi Azərbaycan bir neçə dəfə Ermənistanın sərhədinə girib. Ancaq demir ki, Ermənistan sərhəddəki demarkasiya və delimitasiyaya mane olur, təxribat törədir. Azərbaycan isə öz dövlət sərhədini işğaldan əvvəlki xəritələr üzərindən dəqiqləşdirir. Müəllif aqressiv formada Bayden və Blikendən tələb edir ki, ABŞ-ın Cənubi Qafqazdakı maraqlarını təmin etmək üçün fəallığı artırıb, bunun fonunda Azərbaycana qarşı ciddi sanksiyalar tətbiq etsinlər.Azərbaycanın Rusiya və İranla əlaqələrinin yaxınlığını əsas gətirərək, əməkdaşlığın Ermənistanla daha yaxından edilməsini məqbul sayır.
Maraqlıdır, bu qədər iftira və böhtanın olduğu bir yazını neytral müəllif yaza bilərmi, yoxsa bu məsələdən açıq-aydın erməni maliyyəsinin iyi gəlir?
Təhlükəsizlik məsələri üzrə ekspert Elşən Həsənov “Bakı-Xəbər”ə bildirdi ki, bu həddindən artıq qərəzli və böhtanlarla zəngin bir cızmaqaradır: “ABŞ erməni diasporunun ən kompakt və təsir imkanlarının yaxşı olduğu ölkə kimi tanınır. Orada adları başqa olsa da, mahiyyət etibarı ilə ermənidən daha çox erməni olan: senatorlar, konqresmenlər, analitik və jurnalistlər kifayət qədərdi. Onlardan biri də yazının müəllifi Rubindir. Bu adam özünü ABŞ-lı kimi təqdim edir, həmin ölkənin mediasında yazı yazır, ancaq üslubuna diqqət etmir. Ermənilərin mövqeyini erməni saytlarında dərc edilən yazılardan daha çox müdafiə edir. Ermənistan hakimiyyət qurumlarının rəsmi bülletenlərindən heç nəyi ilə fərqlınməyən bu cür yazıları ciddiyə almaq lazım deyil. Çünki biz mütəmadi şəkildə belə dezinformasiyalarla rastlaşırıq və onların da cavabını veririk. Ermənilər güya bununla ictimai rəyi öz xeyirlərinə dəyişmək istəyirlər. Hansısa başqa millətin nümayəndəsi olan muzdlunu tutub, öz məlumatlarını onun imzası ilə tirajlayırlar ki, prosesə beynəlxalq rəy versinlər. Kimin yazdığından daha çox, nəyin yazıldığı önəmlidir. Burada yazılanlardan isə erməni pulunun üfunətindən başqa nəsə gözə dəymir. Belə dərgilərdəki sifarişli yazılarla ABŞ hakimiyyətinin bizə olan münasibətini dəyişmək mümkün deyil. Çünki iki ölkə arasındakı münasibətlər dərin təməllər üzərində qurulub. Azərbaycan və Türkiyə ABŞ üçün geniş önəmə malikdir. Bu baxımdan da, hansısa sifarişli bir yazıya görə bu münasibətlərə xələl gətirmək qeyri-mümkündür”.
Məhəmmədəli QƏRİBLİ
