Azərbaycan Prezidenti İlham Əliyev 44 günlük Qarabağ müharibəsinin başlamasının ildönümü ilə bağlı Fransanın “France 24” telekanalına müsahibəsində Ermənistanın baş naziri Nikol Paşinyanla görüşməyə hazır olduğunu bildirib. Prezident Azərbaycanın Ermənistanla gələcək sülh razılaşması üzərində işləməyə hazır olduğunu deyib.
Lakin xəbərdarlıq edib ki, İrəvanın “ötənilki müharibədə itirilmiş əraziləri geri qaytarmağa yönəlmiş istənilən cəhdi” onun ölkəsi tərəfindən sərt reaksiya ilə qarşılanacaq. İlham Əliyev deyib ki, xarici işlər nazirlərinin ötən həftə Nyu-Yorkda baş tutmuş ilk görüşü “dialoqun bərpa edilməsi və dinc həllin axtarışı baxımından yaxşı göstəricidir”. Əliyev əlavə edib ki, Minsk Qrupunun həmsədrləri onun Nikol Paşinyanla görüşünü təşkil etsələr, buna etiraz etməyəcək.
Ilham Əliyev həmçinin əlavə edib ki, Dağlıq Qarabağa muxtar statusun verilməsi məsələsi artıq danışıqlar mövzusu deyil. O, Ermənistanı və Minsk Qrupunu bu yeni reallığı qəbul etməyə çağırıb.
Göründüyü kimi, ölkə başçısı çox mühüm məqama toxunub. Bildirib ki, Minsk Qrupu Paşinyanla görüş təşkil etsə, buna etiraz etməz. Maraqlıdır ki, Minsk Qrupu müharibənin başa çatmasından ötən son bir il ərzində bir dəfə də olsun iki ölkə başçısının görüşməsi təşəbbüsü ilə çıxış etməyib. Bunun səbəbi nə ilə bağlıdır?
Politoloq Əhəd Məmmədli “Bakı-Xəbər”ə açıqlamasında bildirdi ki, Minsk Qrupu adlı təsisat hazırda ölüm-dirim savaşı aparır: “Rusiya, Fransa və ABŞ maraqlıdır həmin qurumu yenidən dirçəltsin ki, ermənilərə statusun verilməsilə bağlı məsələni yenidən masaya yatırsınlar. Azərbaycanın isə bu məsələ ilə bağlı mövqeyi bəllidir. Prezident İlham Əliyev dəfələrlə bu barədə mövqeyini ifadə edib. Biz Minsk Qrupundan post-müharibə dönəmi üçün müyyən addımları gözləyirik. Xüsusilə də humanitar sahədə. Məsələn,yaxşı olardı ki, onlar minalanmış sahələrin xəritələrinin verilməsi ilə bağlı Ermənistana çağırış etsinlər. Məcburi köçkünlərin dinc şəkildə öz ata-baba yurdlarına qayıdışına səy göstərsinlər. Təəssüf ki, biz onların tələbləri sırasında bunları görmürük. Yalnız bizim maraqlarımıza cavab verməyən detallardan danışırlar. Ən əsası da, bir ovuc erməniyə status verməyə can atırlar. Bu cür fəaliyyət bizim marağımıza uyğun deyil. Münaqişə dönəmində onların işləri-gücləri gedib Qarabağda çaxır içib, kabab yeməkdən ibarət olub. Rusiyanın özü də maraqlıdır ki, ABŞ və Fransa prosesə qayıtsın. Qarabağ yeganə məsələdir ki, Rusiya orada ABŞ və Fransanın olmasında maraqlıdır. Nədənsə, bu məsələdə hər üç ölkə Ermənistanın yanındadır. Azərbayan isə çalışır ki, bizim şərtlərimiz daxilində Ermənistanla sülh müqaviləsi imzalansın. Əks təqdirdə, onlar yenidən həmsədrləri dövriyyəyə buraxıb, status məsələsini gündəmə gətirəcəklər ki, münaqişə yenidən qızışsın. Prezident Əliyevin bu açıqlamasında incə məqam var. Deyir ki, həməsdrlər bizi çağırsınlar görüşək. Deməli, Minsk Qrupu sülhə yardım edəcək bu cür addımların atılmasında qətiyyən maraqlı deyil. Çünki tərəflər birbaşa təmasa girəndə onlara ehtiyac qalmır. Buna görə də görüş təşəbbüsünü ortaya atmırlar. İstənilən halda, Azərbaycan öz prinsipial mövqeyindən bir addım da olsun geri çəkilməməlidir”.
Məhəmmədəli QƏRİBLİ
