“...Azərbaycanın ərazi bütövlüyünə qarşı hörmətsizlikdir, buna son qoyulmalıdır. Bu söhbət, səhv etmirəmsə, iyul ayında olmuşdur. Ondan sonra təbii ki, biz bunu izləməyə başladıq və hər ayın başında bizdə məlumat yığılır ki, nə qədər tır girdi, neçə tır çıxdı, nə gətirdi, nə apardı. Onların nömrələrinə qədər bizim bütün bilgilərimiz var və onlar mətbuatda dərc olunub. Amma nə etdilər ondan sonra? İran tırlarının üzərinə erməni nömrələrini yapışdırmağa çalışdılar. Belə bir saxtakarlığa yol verdilər və bizi aldatmağa çalışdılar. Olduqca səriştəsiz bir addım atıldı - o tırın üstündə fars dilində yazılan sistern, altda da erməni nömrələri. Onu da sizə bildirməliyəm ki, eyni nömrələri bir neçə avtomobilin üstünə də yapışdırdılar. Yəni o qədər səliqəsiz görülən bu iş nəyi göstərir? Onu göstərir ki, bu işi davam etdirmək, sadəcə olaraq, bunu pərdələmək istədilər...”
Bu fikirləri Prezident İlham Əliyev Türkiyənin Anadolu Agentliyinə verdiyi müsahibədə vurğulayıb. Azərbaycan Prezidenti müsahibəsində İran TIR-larının hansı fırıldaqlarla Xankəndiyə gəldiyini və bu TIR-lara Ermənistan nömrələri vurulmaqla belə təxribatçı addımlar atdıqlarını tam olaraq ifşa edib.
“Bu gizlinləri Azərbaycan Prezidenti açır və bununla da İranın bütün əməllərini ona xatırladır”
“Müasir İnkişaf” Birliyinin rəhbəri Mübariz Göyüşlü bizimlə söhbətində bildirdi ki, Prezidentin bu məsələni xüsusi vurğulaması çox önəmlidir: “Prezidentin bu məsələni xüsusi vurğulamasından və İranın qanunazidd, qonşuluğa zidd davranışlarını bu şəkildə ifşa etməsindən bu ölkə nəticə çıxarmalıdır. Hesab edirəm ki, bu, İrana yönəlmiş bir mesajdır. İkinci Qarabağ müharibəsi başa çatdıqdan sonra Prezident İlham Əliyev işğaldan azad edilən ərazilərə səfər edərkən və Xudafərində olarkən oradan İrana bir mesaj verdi ki, Xudafərin dostluq körpüsüdür. Təəssüf ki, İrandakı bəzi siyasi dairələr bu mesajı anlaya bilmədilər, fərqinə varıb onu düzgün qiymətləndirmədilər. Bilirsiz, Azərbaycanın Ermənistanı çıxmaq şərtilə bütün qonşuları ilə normal qonşuluq əlaqələri var və dövlətimiz qonşularımızla normal münasibət saxlamaqda da maraqlıdır. Nəinki maraqlıdır, həm də buna əməl edir. Əgər hansısa bir qonşu dövlət Azərbaycanın ərazi bütövlüyünə qarşı addım atırsa, onun təhlükəsizliyi ilə bağlı təhdid yaradan hərəkətlərə yol verirsə, bu, həmişə olduğu kimi, Azərbaycan tərəfindən sərt qiymətləndirilir və sərt reaksiyalar verilir. O cümlədən eyni şey İrana da aiddir. Çox təəssüf edirəm ki, İran, daha doğrusu İrandakı bəzi siyasi qüvvələr Azərbaycanın dostluq mesajını anlaya bilmədilər və Azərbaycan üçün çox həssas bir mövzu olan Xankəndiyə Azərbaycanın icazəsi olmadan TIR-larla yardımlar göndərməkdə davam etdilər. İranın Xankəndiyə qanunsuz olaraq göndərdiyi TIR-larla biabırçı vəziyyət yaşandı. İran TIR-ları sərhədi keçmək üçün hətta Ermənistan nömrələrindən də istifadə ediblər, bunlar indi açılır, ifşa olunur. Bu gizlinləri Azərbaycan Prezidenti açır və bununla da İranın bütün əməllərini ona xatırladır. Gorus-Qafan yolunun Azərbaycandan keçən hissəsində bizim sərhədçilər, polislər İran TIR-larını saxladılar. Bundan sonra İran tərəf TIR-lara görə çox ajiotaj yaratmağa çalışdı, amma bunun əbəs olduğunu gördü. Sonra isə səfiri və Xarici işlər nazirinin müavinini göndərməklə dostluq mesajı verməyə çalışdı. Azərbaycan həmişə dostluq münasibətlərinə meyllidir və bu davranışı göstərir. İran da bunu göstərərsə, iki qonşu ölkə arasında neqativ hallar aradan qalxar. Fikrimcə, Azərbaycan, Türkiyə və İran arasında ortaq müzakirələrin keçirilməsi və hər üç ölkələrin rəsmiləri arasında yüksək səviyyədə təmasların olması daha məqsədəuyğun olardı. Yalnız dialoq, qarşılıqlı təmaslar, hörmət sayəsində biz aramızdakı problemi çözə bilərik və çözməliyik də. O mənada, İranın bəzi siyasi qüvvələrinə çağırış edirəm ki, Azərbaycanın ərazi bütövlüyünə hörmətsizliyə son qoysunlar və bizim üçün həssas olan məsələlərə diqqətlə yanaşsınlar. Bu daha yaxşı olardı, nəinki TIR-larını Xankəndiyə keçirmək üçün əl atdıqları və sonra onları pis vəziyyətdə qoyan hərəkətləri”.
İradə SARIYEVA
