Vətən müharibəsi zamanı Azərbaycanın ərazi bütövlüyü uğrunda döyüşlərdə həlak olmuş əsgər və zabitlərimizə, qətlə yetirilən mülki vətəndaşlarımıza və itkin düşmüş soydaşlarımıza ehtiram əlaməti olaraq sentyabrın 27-də - Anım Günündə Bakı şəhərində yürüş təşkil edilib.
Azərbaycan Prezidenti, müzəffər Ali Baş Komandan İlham Əliyev, birinci xanım Mehriban Əliyeva, gənc kursantlar və hərbçilər Vətən müharibəsi zamanı Azərbaycanın ərazi bütövlüyü uğrunda şəhid olan igidlərimiz, itkin düşən hərbçilərimiz və Ermənistan dövləti tərəfindən törədilən insanlıq əleyhinə və müharibə cinayətləri nəticəsində qətlə yetirilən mülki əhalimizin hər birinin fotolarından ibarət plakatlarla yürüş edərək xalqın birliyinin daimi və sarsılmaz olduğunu, Vətənə sevgi, şəhidlərimizə ehtiramın əbədiliyini bir daha nümayiş etdiriblər.
Dövlət başçısı yürüşdə şəhid Adil Asəm oğlu İbrahimlinin fotosu əks olunmuş plakatı aparırdı. Müdafiə Nazirliyinin hərbi hissəsinin zabiti, baş leytenant Adil İbrahimli 2020-ci il noyabrın 7-də Xocavənd rayonu ərazisində gedən hərbi əməliyyatlar zamanı həlak olub. Birinci xanım Mehriban Əliyeva isə yürüşdə şəhid Narin Teymur qızı Xalıqovanın fotosu əks olunmuş plakatla irəliləyirdi. Narin Xalıqova 2019-cu il dekabrın 17-də Gəncə şəhərində doğulub. Ailənin tək övladı olan Narin 5 illik həsrətin sonunda dünyaya göz açmışdı.
Qeyd edək ki, Neftçilər prospektindən başlayan yürüş Azərbaycan Respublikasının Prezidenti İlham Əliyev tərəfindən həmin gün təməli qoyulan Vətən Müharibəsi Memorial Kompleksi və Zəfər muzeyinədək davam edib.
Anım günündən ölkə başçısı İlham Əliyevin və Birinci xanım Mehriban Əliyevanın hərbçilərlə birlikdə yürüşdə iştirak etməsi xalqa, cəmiyyətə nə kimi mesajlar verdi?
“Məmurlar da Prezident və onun ailəsinin hərəkətlərindən örnək götürməli, xalqın yanında olmalı, şəhidlərə hörmət etməli, qazilərə dəstək olmalıdırlar”
“Novoye vremya” qəzetinin baş redaktoru Şakir Ağayev bildirdi ki, ölkə rəhbəri İlham Əliyevin və birinci xanım Mehriban Əliyevanın Anım günündə yürüşdə iştirak etməsi cəmiyyətə bir sıra mesajlar verdi: “İlk olaraq cəmiyyət bir daha anladı ki, ölkə başçısı, hər zaman olduğu kimi, xalqın yanındadır. Torpaqlarımız şəhidlərimizin qanı bahasına alınıb. Onlara hörmət etmək lazımdır. Ölkənin birinci şəxsi şəhid Adil Asəm oğlu İbrahimlinin fotosu əks olunmuş plakatı yürüşdə öz əlində aparırdı. Eynilə, Mehriban xanım da yürüşdə şəhid Narin Teymur qızı Xalıqovanın fotosu əks olunmuş plakatla irəliləyirdi. Bu o deməkdir ki, şəhidlər hər kəsdən üstün zirvədədir. İlham Əliyevin anım günündə yürüşdə iştirak etməsi digər məmurlara da örnək olmalıdır. Məmurlar da Prezidentdən və onun ailəsinin hərəkətlərindən örnək götürməlidirlər. Məmurlar da xalqın yanında olmalı, şəhidlərə hörmət etməli, qazilərə dəstək olmalıdırlar”.
Ş.Ağayevin sözlərinə görə, Azərbaycan xalqı uzun müddətdən sonra ərazi bütövlüyünü bərpa etdi: “Biz bu haqq yoluna 27 sentyabrda qədəm qoyduq və sonda qələbə qazandıq. Şanlı ordumuz 30 illik həsrətə 44 gün ərzində son qoydu. Torpaqlarımız uğrunda şəhid olan ordumuzun nümayəndələrini hörmətlə anırıq”.
Günel CƏLİLOVA
