“...Əslində bilirsiniz, bir daha demək istəyirəm, İkinci Qarabağ müharibəsindən sonra Minsk qrupundan bu günə qədər bizə hər hansı bir təklif verilmədi. Təklif olmadığı təqdirdə Minsk Qrupunun fəaliyyəti haqqında danışmaq yersizdir. Yəni bir il artıq keçir. Nə təklif edirsən? Deyirsən ki, bu münaqişə həll edilməlidir. Mən Azərbaycan olaraq deyirəm ki, bunu həll etmişəm, təkbaşına, bütün təzyiqlərə rəğmən. Ona görə bu təklif olmalıdır. Nə ilə məşğul olmalıdır? Mən öz fikirlərimi ifadə etdim. Qalan şeylər isə onların məsuliyyətidir.”. Bu fikirləri Prezident İlham Əliyev Türkiyənin Anadolu agentliyinə müsahibəsində deyib.
“Səs” Media Qrupunun rəhbəri, politoloq Bəhruz Quliyev “Bakı-Xəbər”ə şərhində bildirdi ki, ölkə başçısı əksər müsahibə və çıxışlarında bu 30 ildə Minsk Qrupunun həmsədrlərinin fəaliyyətsiz olduğunu vurğulayıb. Sözün əsl mənasında Minsk Qrupunun özünün fəaliyyətsiz olduğunu və heç vaxt münaqişənin həlli üçün heç bir addım atmadığını deyən B.Quliyevin sözlərinə görə, Azərbaycan münaqişəni təkbaşına həll etdikdən sonra indi ortaya çıxıb məntiqsiz fikirlər irəli sürürlər. “Əslinə baxanda, Minsk Qrupu Ermənistanyönümlü fəaliyyət göstərib, ikili standartlar, ikili yanaşmalar nümayiş etdirib, illərlə münaqişənin həlli prosesinin uzadılması üçün hansı addımların atılması lazım olubsa o addımı da atıb. Yəni bu 30 ildə status-kvonun saxlanması prosesi gedib. Azərbaycan tərəfi münaqişənin sülh yolu ilə həll edilməsinə çalışırdı, amma bilirsiz ki, Minsk Qrupunun həmsədr ölkələri hansı mövqeni tutdu. Münaqişə danışıqlar və sülh yolu, yaxud Minsk Qrupunun dəstəyi ilə həll olunsaydı, onda 44 günlük müharibəyə nə ehtiyac vardı? Minsk Qrupu öz məsuliyyətini dərk edib zamanında addım atsaydı müharibə olmazdı. Əgər hansısa bir beynəlxalq qurum, təşkilat bunu həll edə bilirdisə və həll etmək istəyində idisə, onda həll etməli idi. Cənab Prezident müsahibəsində qeyd edir ki, Minsk Qrupu bu münaqişəni həll etmədi, bütün təzyiqlərə baxmayaraq, mən özüm təkbaşına həll etdim. Bütün ictimaiyyətə məlumdur ki, 44 günlük müharibə dönəmində biz haqq yolumuzda, torpaqlarımızı işğaldan azad etmək yolunda idik. Biz 44 günlük müharibə dövründə beynəlxalq təşkilatların da təzyiqləri ilə qarşılaşdıq. Həmin dönəmin özündə Minsk Qrupunun həmsədrlərinin fəaliyyətinin nədən ibarət olduğu açıldı. Yəni Rusiya, Amerika, Fransa hər üç həmsədr ölkə, demək olar ki, öz fikrini ifdadə etdi və Ermənistan tərəfdən çıxış etdi. Yəni bu o deməkdir ki, Minsk Qrupunun bu 30 ildə hansı istiqamətdə fəaliyyət göstərdiyi açıldı. 44 gün ərzində müharibəni dayandırmağımızla bağlı bizə çox güclü təzyiqlər oldu. Amma buna baxmayaraq, cənab Prezident dayanmadı, irəli getdi və Ermənistanı kapituliyasiya sənədinə imza atmağa məcbur etdi. Bu bizim diplomatiyanın və hərbinin gücü idi”.
B.Quliyev onu da qeyd etdi ki, Prezident İlham Əliyev bu fikirlərlə bir daha reallığı çatdırıb və münaqişənin həllindən sonra belə Minsk Qrupunun Azərbaycana qarşı hansı əməllərlə məşğul olduğunu açıb göstərib. “Münaqişə arıq Azərbaycan tərəfindən həll olunub. Bir ildir ki, Minsk Qrupunun həmsədrləri hansısa təkliflərinin olduğunu deyir, amma ortada heç bir təklif yoxdur, sadəcə bunu sözdə deyirlər. Cənab Prezident də bunu dedi ki, təklifləriniz varsa təqdim edin. Yoxdu axı təklifləri. 30 ili qoyaq qırağa. 10 noyabrda imzalanmış üçtərəfli Bəyanatın bəndlərində təsbit olunan məsələlərin icrası, yerinə yetirilməsi ilə bağlı Minsk Qrupu indiyə hər hansı bir fikir bildirməyib, bu bir il ərzində hansısa təkliflər verməyib. Bu özü də açıq göstərir ki, Minsk Qrupu birtərəfli, qərəzli bir qurumdu. Minsk Qrupu artıq öz iç üzünü açıb, gerçək simasını göstərib. İndiyə qədər Minsk Qrupu, həmsədrlər Azərbaycanın xeyrinə bir iş görməyib. İndən sonra da inanmıram ki, Minsk Qrupunun həmsədrləri Azərbaycanla Ermənistan arasında sülhün təmin olunmasına, hansısa məsələlərin həllinə cəhd etsinlər. Onların bu məsələyə hər hansı bir töhfə verməsi inandırıcı görünmür. Münaqişənin həll olunmasından bir ilə yaxın vaxt keçib, amma hələ Minsk Qrupu sözdə hansısa təkliflərdən danışır, amma əməldə bunu göstərmir. Minsk Qrupu nəyəsə cəhd göstərmək istəyirsə, onun cəhdləri yalnız birtərəfli qaydada olacaq və Ermənistan tərəfindən çıxış edəcəklər, Ermənistanın xeyrinə hər hansı addımı atmaq mümkündürsə o istiqamətdə fəaliyyət göstəcəklər. Buyursunlar təkliflərini etsinlər, görək bunların təklifində nələr nəzərdə tutulur? Əgər yaxşı təklif olsa, təbii, Azərbaycan tərəfi bu təklifi dəyərləndirə bilər. Amma inanmıram ki, münaqişənin bəzi predmetlərinin həlli istiqmətində Minsk Qrupu hansısa səmərəli təklif versin. Mən buna inanmıram. Baxmayaraq ki, Minsk Qrupu bu 30 ildə özünü fəaliyyətsiz bir qurum kimi təqdim edib, Ermənisanın xeyrinə hərəkət edib, amma indi özünü hansısa şəkildə doğrultmağa cəhd edir. Münaqişə onsuz da artıq həll olunub, biz hərb yolu ilə öz torpaqlarımızı geri qaytardıq. Bəzi nüanslar vardı ki, Minsk qrupu ortaya çıxıb onunla bağlı hər hansı bir təklif irəli sürsə, bu, ATƏT-ə daha çox başucalığı gətirər, nəinki onun fəaliyyətsiz qurumunun varlığı. Bəzi kiçik nüanslar, müzakirələr qalıb ki, onun həllində Minsk Qrupu hər hansı bir təkliflərini verə bilər. Minsk Qrupu öz məsuliyyətini başa düşsə, öz məsuliyyətini dərk etsə və bu hadisələrə həqiqətən də loyal münasibət bəsləsə təklif verə bilər. Amma yenə də deyirəm, mən buna inanmıram. Çünki Minsk Qrupunun tutduğu qərəzli yol imkan vermir ki, o normal qərar qəbul etsin, hər hansısa addım atsın, təklif versin”-deyə B.Quliyev əlavə etdi.
İradə SARIYEVA
