“Ermənistan və Rusiyada fəaliyyət göstərən erməni lobbisi hər gün Rusiya ilə Azərbaycanın münasibətlərində çatlar yaratmaq üçün çalışır”. Bunu Prezident İlham Əliyev Türkiyənin “Anadolu” agentliyinə müsahibəsində deyib.
Ölkə başçısının sözlərinə görə, məqsəd iki ölkə münasibətlərinə kölgə salmaqdır: “Hər gün, davamlı olaraq. Onların gündəlik işi Azərbaycana qara yaxmaq, Rusiya mətbuatında Azərbaycan barədə mənfi imic formalaşdırmaq, Azərbaycanla Rusiyanın münasibətlərinə kölgə salmaqdır. Düşünürlər ki, bu durumda qisasçı qüvvələr yenidən baş qaldıraraq bizə qarşı müharibə başlada bilər. Amma onlar yanılırlar. Birincisi, Rusiya-Azərbaycan münasibətləri kifayət qədər yüksək səviyyəli münasibətlərdir və biz bütün mövzuları açıq müzakirə edə bilirik. Prezidentlər səviyyəsində, müdafiə nazirləri, xarici işlər nazirləri səviyyəsində. Hər hansı tərəfi narahat edən məsələ ilə bağlı biz dərhal təmas qururuq və bu məsələləri həll edirik. Bunu deyə bilərəm ki, Rusiya-Azərbaycan münasibətlərində hər hansı təcili məsələni həll etməklə bağlı mövzu da yoxdur. Çünki bu münasibətlər kifayət qədər konstruktivdir. Ermənistanın bu təbliğat cəhdləri onlara uğur gətirməyəcək”.
Görünən odur ki, erməni lobbisi bütün vasitələrlə iki ölkə münasibətlərini korlamağa çalışır.
“Bunlar Rusiya dövlətinin yox, məhz erməni lobbisinin maraqlarından çıxış edirlər”
Məsələyə münasibət bildirən media eksperti, Demokratik Jurnalistlər Liqasının sədri Yadigar Məmmədlinin fikrincə, burada söhbət Rusiya media orqanlarında fəaliyyət göstərən erməni əsilli şəxslərin təxribatçı fəaliyyətindən gedir: “Rusiya mətbuatında erməni lobbisinin təsirləri zaman-zaman özünü göstərib. Məlum olduğu kimi, erməni lobbisi dünyanın müxtəlif ölkələrində güc mərkəzləri yaradıb. Onlardan ən böyüyü Rusiyadadır. Zaman-zaman Azərbaycan-Rusiya münasibətlərinin gərginləşməsində məhz erməni lobbisi xüsusi rol oynayıb. Bu ölkənin mətbuatında təmsil olunan erməni əsilli şəxslər münasibətləri pisləşdirmək üçün həqiqətə uyğun olmayan məlumatlar yayır. Nəticədə ən böyük zərbəni Rusiya dövlətinə vururlar. Erməni lobbisinin basqısı həm də Ermənistanı müstəqil dövlət kimi inkişaf etdirməyə qoymur. İş elə gətirib ki, Rusiyada milyonlarla erməni məskunlaşıb. Özü də ermənilər Rusiyanın önəmli strateji yerlərində işləyirlər. Təkcə indi deyil, sovet dönəmindən bəri ermənilər Rusiyanın media qurumlarında aktiv təmsil olunurlar. Xüsusən də Rusiya telekanallarında erməni əsilli şəxslər çoxdur. Elələri var ki, media qurumlarının rəhbərləridir. Məsələn, Marqarita Simonyan “Raşa Tudey” media qurumunun rəhbəridir. Bunlar Rusiya dövlətinin yox, məhz erməni lobbisinin maraqlarından çıxış edirlər. Həqiqətə uyğun olmayan məlumatların yayılması məhz buradan qaynaqlanır”.
Media eksperti hesab edir ki, Rusiyada media siyasətini tənzimləyən dairələr bu cür təxribatçı fəaliyyətlərə şərait yaratmamalıdır.
Vidadi ORDAHALLI
